Jesus se lewe en bediening

Die voorbereider van die weg word gebore

DIT is amper tyd dat Elisabet se baba gebore word. Maria het die afgelope drie maande by haar gebly. Maar dit is nou tyd vir Maria om tot siens te sê en die lang reis terug na haar huis in Nasaret aan te pak. Oor sowat ses maande sal ook haar baba gebore word.

Kort na Maria se vertrek skenk Elisabet die lewe aan haar baba. Hoe bly is hulle tog toe die geboorte goed afloop en Elisabet en die baba albei gesond is! Toe Elisabet die kleintjie vir haar bure en familie wys, is hulle almal saam met haar bly.

’n Seuntjie in Israel moet volgens God se wet op die agtste dag na sy geboorte besny word. Vriende en familie kom vir hierdie geleentheid kuier. Hulle sê dat die seuntjie na sy vader Sagaria vernoem moet word. Maar Elisabet weier. ,Nee!’ sê sy. ,Hy moet Johannes genoem word.’ Onthou, dit is wat die engel Gabriël gesê het die kind genoem moet word.

Maar hulle vriende maak beswaar: ,Daar is niemand in julle familie met daardie naam nie.’ Toe vra hulle deur middel van gebare wat sy vader die seun wil noem. Sagaria vra ’n skryfbordjie en skryf tot almal se verbasing: ,Sy naam is Johannes.’

Toe word Sagaria se spraak wonderdadig herstel. Jy sal onthou dat hy sy spraak verloor het toe hy nie die engel se aankondiging dat Elisabet ’n kind sou hê, geglo het nie. Wel, toe Sagaria praat, was almal wat in die buurt woon verbaas en het hulle onder mekaar gesê: ,Wat sal hierdie kindjie tog word?’

Sagaria is nou vervul met die heilige gees en hy voorspel aangaande sy seun: ,Hy sal ’n profeet van die Allerhoogste genoem word, en hy sal voor Jehovah uitgaan en sy pad gereed maak. Hy sal die volk vertel dat hulle deur vergifnis van hulle sondes gered moet word.’

Teen hierdie tyd kom Maria, wat skynbaar steeds ’n ongetroude vrou is, by die huis in Nasaret aan. Wat sal met haar gebeur wanneer dit duidelik word dat sy swanger is? Lukas 1: 56-80; Levitikus 12: 2, 3.

♦ Hoeveel ouer was Johannes as Jesus?

♦ Wat het gebeur toe Johannes agt dae oud was?

♦ Watter werk sou Johannes doen, soos voorspel is?