Hoofstuk 132

Aan God se regterhand

DIE uitstorting van die heilige gees met Pinkster is ’n bewys dat Jesus weer terug is in die hemel. Die gesig wat kort hierna aan die dissipel Stefanus gegee word, is ook ’n bewys dat Hy daar is. Net voordat Stefanus as gevolg van sy getroue getuieniswerk gestenig word, roep hy uit: “Kyk, ek sien die hemele geopend en die Seun van die mens aan die regterhand van God staan.”

Terwyl Jesus aan God se regterhand is, wag hy op sy Vader se bevel: “Heers te midde van u vyande.” Maar wat doen Jesus intussen, totdat hy teen sy vyande optree? Hy regeer, of heers, oor sy gesalfde dissipels en rig hulle in hulle predikingsbedrywighede en berei hulle voor om, deur ’n opstanding, medekonings saam met hom in sy Vader se Koninkryk te word.

Jesus kies byvoorbeeld vir Saulus (wat later bekender geword het onder sy Romeinse naam, Paulus) om die voortou te neem met die dissipelmaakwerk in ander lande. Saulus is ywerig vir God se Wet, maar hy is deur die Joodse godsdiensleiers mislei. Saulus keur gevolglik nie net die moord op Stefanus goed nie, maar hy gaan ook na Damaskus met die magtiging van die hoëpriester Kajafas om elke man en vrou wat hy daar vind wat ’n volgeling van Jesus is in hegtenis te neem en na Jerusalem terug te bring. Maar terwyl Saulus daarheen op pad is, omstraal ’n skerp lig hom skielik, en hy val op die grond neer.

“Saul, Saul, waarom vervolg jy My?” vra ’n stem uit ’n onsigbare bron. “Wie is U, Here?” vra Saulus.

“Ek is Jesus wat jy vervolg”, kom die antwoord.

Jesus sê vir Saulus, wat deur die wonderbaarlike lig verblind is, om Damaskus binne te gaan en op instruksies te wag. Jesus verskyn dan in ’n visioen aan Ananias, een van sy dissipels. Jesus sê vir Ananias van Saulus: “Hy is vir my ’n uitverkore werktuig om my Naam te dra voor nasies en konings en die kinders van Israel.”

Saulus (wat nou as Paulus bekend staan) en ander evangeliedienaars behaal inderdaad met Jesus se ondersteuning baie groot welslae met hulle predikings- en onderrigtingswerk. Trouens, omtrent 25 jaar ná Jesus se verskyning aan hom op die pad na Damaskus skryf Paulus dat die “evangelie . . . in die ganse mensdom onder die hemel” verkondig is.

Ná verloop van baie jare gee Jesus ’n reeks visioene aan sy geliefde apostel, Johannes. Deur hierdie visioene wat Johannes in die Bybelboek Openbaring beskryf, leef hy as ’t ware om Jesus se terugkeer in Koninkryksmag te sien. Johannes sê dat hy “in die Gees” tot in die toekomstige “dag van die Here” gebring is. Wat is hierdie “dag”?

’n Noukeurige studie van Bybelprofesieë, onder andere Jesus se eie profesie oor die laaste dae, toon dat “die dag van die Here” in die geskiedkundige jaar 1914 begin het, ja, in hierdie geslag! Jesus het dus in 1914 onsigbaar teruggekeer, sonder ’n groot ophef en met net sy getroue knegte wat van sy koms bewus was. Jehovah het Jesus daardie jaar die opdrag gegee om te midde van sy vyande te begin heers!

Jesus het sy Vader se opdrag gehoorsaam en die hemele van Satan en sy demone gereinig en hulle na die aarde toe neergewerp. Nadat Johannes dit in ’n visioen sien plaasvind het, hoor hy ’n hemelse stem sê: “Nou het die heil en die krag en die koningskap die eiendom van onse God geword, en die mag van sy Christus.” Ja, Christus het in 1914 as Koning begin heers!

Watter goeie nuus is dit tog vir aanbidders van Jehovah in die hemel! Hulle word aangespoor: “Wees verheug, o hemele en die wat daarin woon.” Maar wat is die situasie vir diegene op aarde? “Wee die bewoners van die aarde en die see”, gaan die stem uit die hemel voort, “want die duiwel het na julle neergedaal met groot woede, omdat hy weet dat hy min tyd het.”

Ons leef nou in daardie kort tydjie. Mense word tans van mekaar afgeskei om òf God se nuwe wêreld binne te gaan, òf vernietig te word. Om die waarheid te sê, jy bepaal nou jou eie toekoms deur jou reaksie op die goeie nuus van God se Koninkryk, wat wêreldwyd onder Christus se leiding verkondig word.

Wanneer die skeiding van mense voltooi is, sal Jesus Christus as God se Verteenwoordiger optree om die aarde van Satan se hele stelsel van dinge en almal wat dit ondersteun te reinig. Jesus sal al sulke goddeloosheid verwyder tydens die oorlog wat die Bybel Armageddon noem. Daarna sal Jesus, die grootste Persoon in die heelal naas Jehovah God self, Satan en sy demone gevange neem en hulle duisend jaar lank in ’n “afgrond”, dit wil sê, in ’n toestand van doodse onaktiwiteit, bind. Handelinge 7:55-60; 8:1-3; 9:1-19; 16:6-10; Psalm 110:1, 2; Hebreërs 10:12, 13; 1 Petrus 3:22; Lukas 22:28-30; Kolossense 1:13, 23; Openbaring 1:1, 10; 12:7-12; 16:14-16; 20:1-3; Mattheüs 24:14; 25:31-33.

▪ Waar bevind Jesus hom ná sy hemelvaart, en waarop wag hy?

▪ Oor wie regeer Jesus nadat hy na die hemel opgevaar het, en hoe word sy heerskappy geopenbaar?

▪ Wanneer het “die dag van die Here” begin, en wat het aan die begin daarvan plaasgevind?

▪ Watter skeidingswerk wat vandag plaasvind, raak elkeen van ons persoonlik, en op grond waarvan word die skeiding gedoen?

▪ Watter gebeurtenisse vind plaas wanneer die skeidingswerk voltooi is?