Deel 1
Gee God werklik vir ons om?
1, 2. Watter vraag vra mense oor God, en waarom?
JY HET moontlik al die een of ander tyd in jou lewe gevra: ‘As daar ’n God is wat werklik vir ons omgee, waarom laat hy soveel lyding toe?’ Ons het almal al gely of iemand geken wat groot lyding verduur het.
2 Trouens, mense het deur die geskiedenis heen pyn en hartseer verduur as gevolg van oorlog, wreedheid, misdaad, ongeregtigheid, armoede, siekte en die dood van geliefdes. In ons 20ste eeu alleen het daar al meer as 100 miljoen mense in oorloë gesterf. Honderdmiljoene ander is beseer of het huise en besittings verloor. Daar het in ons tyd al soveel afgryslike dinge gebeur wat tallose mense groot verdriet en baie trane besorg het en wat ook ’n gevoel van wanhoop by hulle laat ontstaan het.
3, 4. Wat is baie se mening oor die feit dat God lyding toelaat?
3 Party raak verbitterd en dink dat as daar ’n God is, hy nie werklik vir ons omgee nie. Of hulle dink selfs dat daar geen God is nie. Byvoorbeeld, ’n man wat gely het weens etniese vervolging wat tot die dood van vriende en familie in die Eerste Wêreldoorlog gelei het, het gevra: “Waar was God toe ons hom nodig gehad het?” ’n Ander man wat die moord op miljoene deur die Nazi’s tydens die Tweede Wêreldoorlog oorleef het, is só gegrief deur hierdie lyding dat hy gesê het: “As jy aan my hart kon lek, sou dit jou vergiftig.”
4 Baie mense kan dus nie verstaan waarom ’n liefdevolle God sal toelaat dat slegte dinge gebeur nie. Hulle twyfel of hy werklik vir ons omgee en selfs of hy werklik bestaan. En baie van hulle meen dat lyding altyd deel van die mens se bestaan sal wees.
[Prent op bladsy 2, 3]
Is ’n nuwe wêreld sonder lyding ophande?