Deel 4
God lig ons in omtrent sy voornemens
1, 2. Hoe weet ons dat God antwoorde verskaf aan diegene wat opreg vrae vra?
’N LIEFDEVOLLE God openbaar inderdaad sy voornemens aan mense wat opreg na hom soek. Hy verskaf inderdaad aan soekende mense antwoorde op vrae soos waarom hy lyding toegelaat het.
2 Die Bybel sê: “As jy [God] soek, sal Hy Hom deur jou laat vind.” “Daar is ’n God in die hemel wat geheime openbaar.” “Die Here HERE doen niks tensy Hy sy raadsbesluit aan sy knegte, die profete, geopenbaar het nie.”—1 Kronieke 28:9; Daniël 2:28; Amos 3:7.
Waar is die antwoorde?
3. Waar kan ons uitvind waarom God lyding toelaat?
3 Die antwoorde op vrae soos waarom God lyding toelaat en wat hy daaromtrent gaan doen, word gevind in die verslag wat hy geïnspireer het om ons te help. Daardie verslag is sy Woord, die Heilige Bybel. “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid, sodat die mens van God volkome kan wees, vir elke goeie werk volkome toegerus.”—2 Timotheüs 3:16, 17.
4, 5. Wat maak die Bybel ’n unieke boek?
4 Die Bybel is waarlik ’n unieke boek. Dit bevat die akkuraatste verslag van die mens se geskiedenis en gaan selfs verder terug in die geskiedenis as die skepping van mense. Daarbenewens is die Bybel aktueel, aangesien sy profesieë betrekking het op gebeure in ons tyd en ook dié in die nabye toekoms.
5 Geen ander boek het getuigskrifte soos dié wat die Bybel het om sy geskiedkundige akkuraatheid te staaf nie. Daar bestaan byvoorbeeld slegs enkele manuskripte van antieke klassieke skrywers. Maar daar bestaan baie manuskripte, party gedeeltelik en ander volledig, van die Bybel: omtrent 6 000 manuskripte van die Hebreeuse Geskrifte (die 39 boeke van die “Ou Testament”) en omtrent 13 000 van die Christelike Griekse Geskrifte (die 27 boeke van die “Nuwe Testament”).
6. Waarom kan ons seker wees dat die Bybel vandag wesenlik dieselfde is as toe God dit geïnspireer het?
6 Die almagtige God, wat die Bybel geïnspireer het, het toegesien dat die tekstuele getrouheid van daardie manuskripkopieë behoue gebly het. Ons Bybels is dus vandag in wese dieselfde as die oorspronklike geïnspireerde geskrifte. ’n Ander faktor wat ons help om dit te besef is die feit dat sommige manuskripkopieë van die Christelike Griekse Geskrifte terugdateer tot binne honderd jaar nadat die oorspronklike manuskrip geskryf is. Die paar manuskripkopieë van eertydse sekulêre skrywers wat nog bestaan, dateer selde sover terug as selfs etlike eeue nadat hulle deur die oorspronklike skrywers geskryf is.
God se gawe
7. Hoe groot is die Bybel se verspreiding?
7 Die Bybel is die boek met die grootste verspreiding in die geskiedenis. Sowat driemiljard eksemplare is al gedruk. Geen ander boek kom naby die Bybel wat sy verspreidingsyfer betref nie. En die Bybel of dele daarvan is in sowat 2 000 tale vertaal. Na raming is die Bybel dus nou vir 98 persent van die bevolking van ons planeet beskikbaar.
8-10. Wat is sommige van die redes waarom die Bybel dit werd is om deur ons ondersoek te word?
8 ’n Boek wat sê dat hy van God af kom en al die eksterne en interne bewyse van egtheid het, is tog sekerlik werd om deur ons ondersoek te word.a Dit verduidelik wat die doel van die lewe is, die betekenis van wêreldtoestande en wat die toekoms inhou. Geen ander boek kan dit doen nie.
9 Ja, die Bybel is God se kommunikasie met die mensdom. Hy het dit deur sy werkende krag, of gees, laat skryf, en sowat 40 mense het dit op skrif gestel. God praat dus met ons deur sy Woord, die Heilige Bybel. Die apostel Paulus het geskryf: “Toe julle die woord van God ontvang het wat deur ons verkondig is, [het] julle dit aangeneem . . . nie as die woord van mense nie, maar, soos dit waarlik is, as die woord van God.”—1 Thessalonicense 2:13.
10 Abraham Lincoln, die 16de president van die Verenigde State, het gesê die Bybel is “die beste gawe wat God die mens ooit gegee het . . . Daarsonder kan ons nie tussen reg en verkeerd onderskei nie.” Wat vertel hierdie voortreflike gawe ons dan oor hoe lyding begin het, waarom God dit toegelaat het en wat hy daaromtrent gaan doen?
[Voetnoot]
a Sien die boek Die Bybel—God se woord of die mens s’n?, wat in 1989 deur die Watchtower Bible and Tract Society of New York, Inc. uitgegee is vir meer besonderhede oor die egtheid van die Bybel.
[Prent op bladsy 10]
Die Bybel wat deur God geïnspireer is, is sy kommunikasie met die mensdom