Die Bybel ’n unieke boek

Dit is al die wêreld se grootste suksesboek genoem, en tereg ook. Die Bybel word meer as enige ander boek gelees en op prys gestel. Daar word geskat dat daar tot op hede meer as viermiljard eksemplare daarvan (in sy geheel of dele daarvan) in meer as 2000 tale versprei is.

Iets wat egter baie interessanter as die Bybel se verspreiding is, is die feit dat dit sê dat God die outeur daarvan is. “Die hele Skrif is deur God geïnspireer”, het die Christenapostel Paulus geskryf (2 Timoteus 3:16). Wat beteken dit? Die uitdrukking “deur God geïnspireer” (Grieks, the·oʹpneu·stos) beteken letterlik “deur God ingeblaas”. ’n Verwante Griekse woord, pneuʹma, beteken “gees”. Dit sê dus dat God se heilige gees menseskrywers beweeg het, as ’t ware op hulle geblaas het, sodat die eindproduk waarlik die Woord van God genoem kan word, en nie dié van mense nie. Trouens, baie mense wat die Bybel bestudeer het, verwonder hulle oor die algehele harmonie en die wetenskaplike juistheid daarvan, die eerlikheid en openhartigheid van die skrywers en die belangrikste, die vervulde profesieë daarin—alles feite wat miljoene denkende lesers oortuig het dat hierdie boek van ’n hoër bron as mense afkomstig is.a

Maar in watter mate was God by die skryf van die Bybel betrokke? Party sê dat hy die Bybel woord vir woord gedikteer het. Ander sê dat hy bloot die gedagtes geïnspireer het wat in die Bybel gevind word, en nie die woorde nie. Maar inspirasie kan in werklikheid nie tot ’n enkele proses beperk word nie, want God het “op baie maniere met ons voorvaders . . . deur middel van die profete” gespreek. (Hebreërs 1:1; vergelyk 1 Korintiërs 12:6.) In die volgende artikel sal ons ondersoek instel na die maniere waarop God met die sowat 40 menseskrywers gespreek het wat die Bybel neergepen het.

[Voetnoot]