Deel 5
Die wonderlike gawe van wilsvryheid
1, 2. Watter wonderlike gawe is ’n deel van ons samestelling?
OM TE verstaan waarom God lyding toegelaat het en wat hy daaromtrent gaan doen, moet ons waardering hê vir die wyse waarop hy ons geskep het. Hy het meer gedoen as om ons net met ’n liggaam en ’n brein te skep. Hy het ons ook met spesiale geestes- en emosionele eienskappe geskep.
2 ’n Belangrike deel van ons geestes- en emosionele samestelling is wilsvryheid. Ja, God het ons geskep met die vermoë om ons eie keuses te maak. Dit is inderdaad ’n wonderlike gawe wat ons van hom ontvang het.
Hoe ons gemaak is
3-5. Waarom waardeer ons die feit dat ons wilsvryheid het?
3 Kom ons kyk hoe wilsvryheid betrokke is by God se toelating van lyding. Dink eerstens hieraan: Waardeer jy jou vryheid om te kies wat jy gaan doen en sê, wat jy gaan eet en aantrek, watter soort werk jy gaan doen en waar en hoe jy gaan leef? Of sal jy wil hê dat iemand aan jou moet voorskryf wat jy elke oomblik van jou lewe gaan sê en doen?
4 Geen normale mens wil hê sy lewe moet so volkome buite sy beheer wees nie. Waarom nie? Omdat God ons nie so gemaak het nie. Die Bybel sê vir ons dat God die mens ‘na sy beeld en gelykenis’ geskep het, en een van die eienskappe wat God self besit, is keusevryheid (Genesis 1:26; Deuteronomium 7:6). Toe hy die mens geskep het, het hy hom daardie selfde wonderlike eienskap gegee—die gawe van wilsvryheid. Dit is een rede waarom ons gefrustreerd voel wanneer ons deur tirannieke heersers onderdruk word.
5 Die begeerte na vryheid is gevolglik geen toeval nie, want God is ’n God van vryheid. Die Bybel sê: “Waar die gees van Jehovah is, daar is vryheid” (2 Korinthiërs 3:17, NW). God het derhalwe vir ons wilsvryheid as ’n deel van ons samestelling gegee. Aangesien hy geweet het hoe ons verstandelik en emosioneel sou funksioneer, het hy geweet dat ons op ons gelukkigste sou wees as ons wilsvryheid het.
6. Hoe het God ons brein geskep om in harmonie met wilsvryheid te funksioneer?
6 Saam met die gawe van wilsvryheid het God ons ook die vermoë gegee om te dink, dinge goed te oorweeg, besluite te neem en reg van verkeerd te onderskei (Hebreërs 5:14). Wilsvryheid moes dus op intelligente keuse berus. Ons is nie soos redelose robotte gemaak wat sonder ’n eie wil is nie. Ons is ook nie soos die diere geskep, wat op instink reageer nie. Ons wonderlike brein is eerder ontwerp om in harmonie met ons keusevryheid te funksioneer.
Die beste begin
7, 8. Watter goeie begin het God ons eerste ouers gegee?
7 God se sorgsaamheid word getoon deur die feit dat hy ons eerste ouers, Adam en Eva, benewens die gawe van wilsvryheid, alles gegee het wat enigeen in alle redelikheid sou wou hê. Hulle is in ’n groot, parkagtige paradys geplaas. Hulle het materiële oorvloed gehad. Hulle het volmaakte verstande en liggame gehad sodat hulle nie oud of siek hoef te geword het of hoef te gesterf het nie—hulle kon vir ewig gelewe het. Hulle sou volmaakte kinders gehad het wat ook ’n gelukkige, ewige toekoms kon geniet het. En die groeiende bevolking sou bevrediging daaruit kon put om die hele aarde mettertyd in ’n paradys te omskep.—Genesis 1:26-30; 2:15.
8 Die Bybel sê aangaande alles wat God voorsien het: “Toe sien God alles wat Hy gemaak het, en—dit was baie goed” (Genesis 1:31). Die Bybel sê ook van God: “Sy werk is volmaak” (Deuteronomium 32:4, NAV). Ja, die Skepper het die mensdom ’n volmaakte begin gegee. Dit kon nie beter gewees het nie. Wat ’n sorgsame God is hy tog nie!
Vryheid binne perke
9, 10. Waarom moet wilsvryheid behoorlik gereguleer word?
9 Maar het God bedoel dat wilsvryheid sonder perke sou wees? Stel jou ’n besige stad voor sonder enige verkeersreëls, waar almal in enige rigting en teen enige spoed kan ry. Sou jy onder sulke omstandighede wou bestuur? Nee, dit sou verkeersanargie wees en sou gewis baie ongelukke tot gevolg hê.
10 Dit is ook die geval met God se gawe van wilsvryheid. Onbeperkte vryheid sal anargie in die gemeenskap tot gevolg hê. Daar moet wette wees om die mens se bedrywighede te rig. God se Woord sê: “Tree op soos vry mense, en moet nooit julle vryheid as ’n verskoning vir goddeloosheid gebruik nie” (1 Petrus 2:16, JB). God wil hê dat wilsvryheid gereguleer word tot die voordeel van almal. Hy het nie bedoel dat ons algehele vryheid moet hê nie, maar relatiewe vryheid wat aan wette onderworpe is.
Wie se wette?
11. Wie se wette is ons gemaak om te gehoorsaam?
11 Wie se wette is ons gemaak om te gehoorsaam? ’n Ander deel van die teks in 1 Petrus 2:16 (JB) sê: “Julle is slawe van geeneen behalwe God nie.” Dit beteken nie tirannieke slawerny nie, maar dit beteken eerder dat ons so gemaak is dat ons op ons gelukkigste is wanneer ons aan God se wette onderworpe is (Mattheüs 22:35-40). Sy wette, meer as enige wette wat deur die mens ontwerp is, gee die beste leiding. “Ek is die HERE jou God, wat jou leer wat heilsaam is, wat jou lei op die weg wat jy moet gaan.”—Jesaja 48:17.
12. Watter keusevryheid het ons binne die perke van God se wette?
12 God se wette laat terselfdertyd groot vryheid binne hulle perke toe. Dit sorg vir verskeidenheid en maak die mensdom interessant. Dink aan die verskillende soorte disse, klere, musiek, kuns en huise wat ons wêreldwyd aantref. Ons wil tog sekerlik in hierdie opsigte eerder ons eie keuse maak as wat iemand anders vir ons besluit.
13. Watter fisiese wette moet ons vir ons eie beswil gehoorsaam?
13 Ons is dus geskep om op ons gelukkigste te wees wanneer ons ons aan God se wette met betrekking tot mensegedrag onderwerp. Dit is dieselfde as om aan God se fisiese wette onderworpe te wees. As ons byvoorbeeld die wet van swaartekrag ignoreer en van ’n hoë plek afspring, sal ons seerkry of sterf. As ons die interne wette van ons liggaam ignoreer en ophou eet, drink of asemhaal, sal ons sterf.
14. Hoe weet ons dat die mens nie geskep is om onafhanklik van God op te tree nie?
14 Net soos ons geskep is met die behoefte om ons aan God se fisiese wette te onderwerp, net so is ons geskep met die behoefte om ons aan God se morele en sosiale wette te onderwerp (Mattheüs 4:4). Die mens is nie geskep om onafhanklik van sy Maker te wees en nogtans sukses te behaal nie. Die profeet Jeremia sê: ‘Dit behoort nie aan ’n man om te loop en sy voetstappe te rig nie. Tugtig my, Jehovah’ (Jeremia 10:23, 24). Die mens is dus geskep om in alle opsigte onder God se heerskappy, en nie onder sy eie nie, te lewe.
15. Sou God se wette vir Adam en Eva ’n las gewees het?
15 Gehoorsaamheid aan God se wette sou nie vir ons eerste ouers ’n las gewees het nie. Dit sou eerder tot hulle welsyn en dié van die hele mensdom gestrek het. As die eerste egpaar binne die perke van God se wette gebly het, sou niks skeef geloop het nie. Trouens, ons sou nou as ’n liefdevolle en verenigde mensdom in ’n wonderlike paradys van vreugde geleef het! Daar sou nie goddeloosheid, lyding en die dood gewees het nie.
[Prent op bladsy 11]
Die Skepper het die mens ’n volmaakte begin gegee
[Prent op bladsy 12]
Sou jy in swaar verkeer wou bestuur as daar geen verkeerswette was nie?