Publisering van Die Wagtoring

Toe die tydskrif aanvanklik in Julie 1879 verskyn het, is dit Zion’s Watch Tower and Herald of Christ’s Presence genoem. Hierdie tydskrif, wat die losprysoffer van Jesus Christus verdedig het, is uitgegee om geestelike voedsel aan die huisgenote van die geloof te gee. Op 1 Januarie 1909 is die naam na The Watch Tower and Herald of Christ’s Presence verander om die aandag duideliker op die doel van die tydskrif te vestig. Van 1 Januarie 1939 af is die naam na The Watchtower and Herald of Christ’s Kingdom verander om groter klem te lê op die feit dat Christus reeds as Koning uit die hemel regeer. Toe, op 1 Maart 1939, is die naam na Die Wagtoring verkondig Jehovah se Koninkryk aan verander, wat die aandag meer prominent op Jehovah as die Universele Soewerein gevestig het; die een wat aan sy Seun die gesag gegee het om te heers.

Toe Die Wagtoring aanvanklik in Engels verskyn het, was dit ’n maandelikse tydskrif met agt bladsye. In 1891 is dit vergroot tot 16 bladsye, en dit het in 1892 ’n halfmaandelikse tydskrif geword. In 1950 het dit in baie tale ’n formaat met 32 bladsye aangeneem.

Vertaling van Die Wagtoring in ander tale het stadig begin. ’n Enkele monsteruitgawe is in 1883 in Sweeds gepubliseer om as ’n traktaat gebruik te word. Van 1886 tot 1889 is ’n kleinformaatuitgawe van die tydskrif in Duitsland gedruk. Maar dit was eers in 1897 dat die Watch Tower weer in Duits verskyn het en gereeld uitgegee is. Teen 1916 is dit in sewe tale gedruk—Deens-Noors, Duits, Engels, Fins, Frans, Pools en Sweeds. Toe die verkondiging van die goeie nuus in 1922 groter momentum aangeneem het, is die aantal tale waarin die Wagtoring gepubliseer is tot 16 vermeerder. Teen 1993 is dit egter gereeld in 112 tale uitgegee—tale wat deur ’n groot deel van die aarde se bevolking gebruik word. Dit het nie net tale soos Engels, Spaans en Japannees, waarin miljoene eksemplare per nommer gedruk is, ingesluit nie, maar ook Palauaans, Tuvaluaans en ander waarin slegs ’n paar honderd eksemplare versprei is.

Baie jare lank is Die Wagtoring beskou as ’n tydskrif wat hoofsaaklik vir die “klein kuddetjie” toegewyde Christene bedoel is. Die sirkulasie daarvan was ietwat beperk; teen 1916 is slegs 45 000 eksemplare gedruk. Maar van 1935 af is dit herhaaldelik beklemtoon dat “die Jonadabs”, of “groot menigte”, aangemoedig moet word om Die Wagtoring gereeld te kry en te lees. In 1939, toe die voorblad van die tydskrif die Koninkryk begin beklemtoon het, is die publiek gedurende ’n internasionale intekeningkampanje van vier maande aangemoedig om op Die Wagtoring in te teken. Gevolglik het die intekenlys tot 120 000 gestyg. Die jaar daarna is Die Wagtoring gereeld vir mense op straat aangebied. Die sirkulasie het vinnig toegeneem. Teen vroeg in 1993 was die drukoplaag per nommer in al die tale 16 400 000.