‘Op die wagtoring staan ek’
“En hy het geroep soos ’n leeu. Op die wagtoring, Here, staan ek gedurig by dag, en op my wagpos stel ek my al die nagte.”—JESAJA 21:8.
1, 2. (a) Watter doelwit het Charles T. Russell gehad? (b) Hoe sou Bybellektuur help om sy doelwit te bereik?
’N GODVRESENDE 21-jarige man wat in die noordoostelike Verenigde State gewoon het, het ’n roeping gehad. Dit was sy doel om die valse godsdiensleerstellings van sy dag, veral die leerstellings oor ewige foltering en predestinasie, aan die kaak te stel. Hy wou ook die waarheid oor die losprys en die doel en wyse van Christus se koms verdedig. Hoe kon hy al hierdie dinge doen? Deur die lig van God se Woord, die Heilige Bybel, op godsdiensoortuigings te laat val.—Psalm 43:3; 119:105.
2 Charles T. Russell, die eerste president van die Wagtoringgenootskap, was daardie man, en hy het in 1873 besluit om godsdienslektuur uit te gee om Bybelwaarheid bekend te maak. Vir opregte lesers sou daardie publikasies die krake in die valse Christendom se leerstellings toon. Enige verborge leerstellige gebreke sou nie die Bybel se skerp lig ontkom nie (Efesiërs 5:13). Hierdie lektuur sou terselfdertyd ‘die gesonde leer’ uitlig om die geloof van lesers te versterk (Titus 1:9; 2:11; 2 Timotheüs 1:13). Het die ywer vir Bybelwaarheid wat Russell in sy soeke aangevuur het ’n presedent gehad?—Vergelyk 2 Konings 19:31.
Die vroeë Christene: Voorstanders van God se Woord
3. Hoe het Christus Jesus die pas aangegee vir voorstanders van die waarheid?
3 Die eerste-eeuse Christene het die gebruik van God se Woord onder die Jode en die nie-Jode voorgestaan. Dit was asof hulle op ’n wagtoring gestaan en die waarheid aangekondig het aan almal wat wou luister (Mattheüs 10:27). Hulle Leier, Jesus Christus, het die pas aangegee. Hy het gesê: “Hiervoor is Ek gebore en hiervoor het Ek in die wêreld gekom, om vir die waarheid te getuig” (Johannes 18:37). Al was hy volmaak, het hy geweier om op sy eie wysheid en persoonlike menings staat te maak. Sy leerstellings het eerder van sy Oortreffende Onderrigter, Jehovah God, gekom. “Uit Myself doen Ek niks nie”, het hy ’n groep Jode meegedeel. “Maar net wat my Vader My geleer het, dit spreek Ek.” (Johannes 8:28; kyk ook Johannes 7:14-18.) Volgens die Evangelieverslae van Jesus se aardse bediening het hy uit ongeveer die helfte van die boeke van die Hebreeuse Skrifte aangehaal (of parallelle gedagtes uitgespreek).—Lukas 4:18, 19; (Jesaja 61:1, 2); Lukas 23:46; (Psalm 31:6).
4. Verstrek voorbeelde van hoe Jesus God se Woord gebruik het om die waarheid te leer.
4 Selfs na sy dood en opstanding het Christus nog steeds God se Woord gebruik om die waarheid te leer. Toe Kleopas en sy metgesel byvoorbeeld van Jerusalem na Emmaüs gereis het, het Jesus daardie dissipels gehelp om oor die Skrifte te redeneer. Die verhaal sê: “En Hy het begin van Moses en al die profete af en vir hulle uitgelê in al die Skrifte die dinge wat op Hom betrekking het” (Lukas 24:25-27). Later daardie selfde dag het Jesus aan die 11 apostels en sommige van sy dissipels verskyn om hulle geloof te versterk. Hoe? Deur die vaardige gebruik van die Skrifte. Lukas skryf: “Toe open Hy [Jesus] hulle verstand om die Skrifte te verstaan. En Hy sê vir hulle: So is dit geskrywe, en so moes die Christus ly en op die derde dag uit die dode opstaan.”—Lukas 24:45, 46.
5. Hoe het Petrus op Pinkster, 33 G.J., Christus se voorbeeld gevolg deur die Skrifte te gebruik?
5 In navolging van hulle Voorbeeld het die Christengemeente in die jaar 33 G.J. hulle openbare bediening met die gebruik van die Skrifte begin. Die agtergrond: ’n oop gebied buitekant ’n huis in Jerusalem. Nadat ’n skare van duisende Jode van Jerusalem en Joodse pelgrims die geluid soos van “’n geweldige rukwind” oor hierdie huis gehoor het, is hulle na hierdie plek getrek en het hulle daar saamgekom. Petrus tree vorentoe—die 11 ander apostels om hom—en begin om met ’n sterk stem te praat: “Joodse manne en almal wat in Jerusalem woon, dit moet julle weet, en luister na my woorde.” Nadat Petrus die aandag gevestig het op “wat deur die profeet Joël gespreek is” en wat “Dawid sê”, verklaar hy die wonderwerk wat pas tevore plaasgevind het en verduidelik hy dat “God Hom Here en Christus gemaak het, hierdie Jesus wat julle gekruisig het”.—Handelinge 2:2, 14, 16, 25, 36.
6. (a) Verduidelik wat plaasgevind het tydens ’n vergadering van die eerste-eeuse bestuursliggaam. (b) Hoe is die gemeentes van die bestuursliggaam se besluit verwittig, en met watter voordeel?
6 Toe die vroeë Christene opheldering oor geloof en gedrag nodig gehad het, het die eerste-eeuse bestuursliggaam ook die Skrifte goed gebruik. Tydens die vergadering van die bestuursliggaam in die jaar 49 G.J. vestig die dissipel Jakobus, wat as voorsitter optree, byvoorbeeld hulle aandag op ’n pertinente teks in Amos 9:11, 12. “Broeders, luister na my!” sê hy. “Simeon het vertel hoe God in die begin uitgesien het om ’n volk uit die heidene vir sy Naam aan te neem. En hiermee stem die woorde van die profete ooreen, soos geskrywe is” (Handelinge 15:13-17). Die hele liggaam het Jakobus se voorstel onderskryf en toe hulle Skriftuurlike besluit op skrif gestel sodat dit aan al die gemeentes oorgegee en deur hulle gelees kon word. Wat was die gevolg? Die Christene was “bly oor die bemoediging” en “die gemeentes is versterk in die geloof en het elke dag vermeerder in getal” (Handelinge 15:22-31; 16:4, 5). Die vroeë Christengemeente het gevolglik “’n pilaar en grondslag van die waarheid” geword. Maar wat van die eietydse geskiedenis? Sou C. T. Russell en sy mede-Bybelstudente hierdie goeie voorbeeld uit die eerste eeu navolg? Hoe sou hulle die waarheid voorstaan?—1 Timotheüs 3:15.
Versiende tydskrifte
7. (a) Wat was die doel van Zion’s Watch Tower? (b) Op wie het dit staat gemaak vir steun?
7 In Julie 1879 het Russell se vernaamste medium vir Bybelverligting—Zion’s Watch Tower and Herald of Christ’s Presence—die lig gesien. Die eerste nommer het die tydskrif se verhewe doel uiteengesit: “Soos sy naam aandui, beoog hy om ’n uitkyk te wees van waar sake van belang en voordeel vir die ‘klein kuddetjie’ aangekondig kan word, en as die ‘herout van Christus se teenwoordigheid’, om die ‘voedsel op tyd’ aan die ‘huisgenote van die geloof’ te gee.” Vertroue op die almagtige God was die tydskrif se hoeksteen. Sy tweede nommer het gesê: “Ons glo dat JEHOVAH die ondersteuner van ‘Sion se Wagtoring’ is, en daar dit die geval is, sal hy nooit bedel of mense om ondersteuning smeek nie. Wanneer Hy wat sê: ‘Aan My behoort die silwer en aan My die goud’, nie die nodige geld voorsien nie, sal ons verstaan dat dit tyd is om die publikasie te staak.”
8. Verklaar Die Wagtoring se groei in die lig van Jesaja 60:22 en Sagaria 4:10.
8 Zion’ s Watch Tower, nou The Watchtower, word al meer as 107 jaar lank ononderbroke uitgegee. Dit het gegroei van ’n maandelikse tydskrif met ’n oplaag van 6 000 eksemplare in een taal tot ’n halfmaandelikse tydskrif met ’n oplaag van 12 315 000 eksemplare wat in 103 tale beskikbaar is.—Vergelyk Jesaja 60:22; Sagaria 4:10.
9. Hoe was die titel Watch Tower gepas?
9 Die titel, Watch Tower, was ’n gepaste keuse deur Russell. Die woord wat gewoonlik in die Hebreeuse Skrifte vir “wagtoring” gebruik word, beteken “uitkyk” of “waarnemingspunt”, van waar ’n wag ’n vyand maklik in die verte kon waarneem en vroegtydig kon waarsku dat daar gevaar dreig. Heel gepas het die voorblad die eerste 59 jaar van publikasie hierdie aanhaling uit Jesaja 21:11, 12 bevat: “Wagter, hoe ver in die nag?” “Die môre kom.”
10. Wie is die wagter van Jesaja 21:11, en watter boodskap kondig hy aan?
10 Die opgestelde wagter van Jesaja se profesie sou kort daarna na vore tree. Te midde van die aarde se heersende goddelose duisternis het Russell met genoeë die goeie nuus oor “die môre” wat aan die kom is, uitbasuin. Jesus Christus se Duisendjarige Vrederyk is die tema van ’n welkome mededeling. Maar voordat “die môre” kom, waarsku die klas wat as wagter dien—die oorblyfsel van geestelike Israel vandag—moedig oor die vordering van “die nag”, wat sy donkerste punt sal bereik in “die oorlog van daardie groot dag van die almagtige God” te Armageddon.—Openbaring 16:14-16.
11, 12. (a) Hoe toon die woorde in Jesaja 21:8 dat die wagterklas getrou en waaksaam is? (b) Deur middel van watter agent word die hedendaagse berig oorgedra, en hoofsaaklik hoe word dit uitgedra?
11 Vroeër, in Jesaja 21:8, word ons voorgestel aan hierdie getroue wagter met hierdie woorde: “En hy het geroep soos ’n leeu. Op die wagtoring, Here, staan ek gedurig by dag, en op my wagpos stel ek my al die nagte.”
12 Stel jou ’n wagter voor wat op ’n hoë toring uitgesit is en vorentoe leun, wat gedurende die dag die horison bespied, gedurende die nag in die donkerte tuur—immer waaksaam. Jy het nou die hoofgedagte wat oorgedra word deur die Hebreeuse woord vir “wagtoring” (mits·peʹ) soos dit in Jesaja 21:8 gebruik word. Watter weldenkende persoon sal, met so ’n waaksame wagter, sy weerklinkende berig in twyfel trek? Die wagterklas het hom vandag eweneens ingespan om die Skrif te ondersoek om te sien wat Jehovah vir hierdie stelsel voorhet (Jakobus 1:25). Hierdie wagter kondig dan daardie boodskap luid en onverskrokke aan, hoofsaaklik deur die bladsye van Die Wagtoring. (Vergelyk Amos 3:4, 8.) Hierdie tydskrif sal nooit uit vrees ophou om die waarheid voor te staan nie!—Jesaja 43:9, 10.
13. Watter medetydskrif het in 1919 verskyn, en watter soortgelyke doel het dit?
13 Op 1 Oktober 1919 het ’n nuwe tydskrif op die wêreldtoneel verskyn: The Golden Age.a Die wagterklas sou hierdie instrument as ’n medetydskrif van Die Wagtoring gebruik. Hoewel die artikels daarvan nie so diep in Bybelonderwerpe sou ingaan soos dié in Die Wagtoring nie, sou dit die mensdom op hulle hoede stel vir valse godsdiensleerstellings en die komende vernietiging van die teenswoordige goddelose stelsel en hulle bewus maak van die komende nuwe aarde van geregtigheid. Ja, dit sou ook die waarheid voorstaan!
14. Wat was die doel van Vertroosting, en later van Ontwaak!?
14 Agttien jaar later is die naam van The Golden Age na Consolation (Vertroosting) verander. “Die nuwe naam staan vir die waarheid”, het die nommer van 6 Oktober 1937 gesê. Met die nommer van 22 Augustus 1946 is die naam Consolation tot Awake! (Ontwaak!) verander. In daardie nommer het dit beloof: “Onkreukbaarheid teenoor die waarheid is die hoogste doelwit van hierdie tydskrif.” Tot vandag toe het dit daardie belofte gehou. Die Wagtoring en Ontwaak! is uniek in die wyse waarop hulle die waarheidsbanier hooghou sodat almal dit kan sien. Die tydskrif volg sodoende die pad wat deur die vroeë Christengemeente gebaan is.—3 Johannes 3, 4, 8.
Die Wagtoring en Ontwaak!: Voorstanders van die waarheid
15. (a) Watter hedendaagse metode om geestelike voedsel uit te gee, kom ooreen met dié wat in die vroeë Christengemeente gebruik is? (b) Wat meer is nodig as om net Bybelverse aan te haal? Verstrek voorbeelde.
15 Die “getroue en verstandige dienskneg”-klas, die “wagter”, gebruik vandag Die Wagtoring onder leiding van die Bestuursliggaam van Jehovah se Getuies as sy vernaamste kanaal om geestelike “voedsel op tyd” uit te gee (Mattheüs 24:45). Dit volg die patroon van die eerste-eeuse gemeente wat verhelderende inligting oor leerstellings en sedes op skrif gestel het sodat dit “aan al die heilige broeders voorgelees [kan] word” (1 Thessalonicense 5:27). Reg uit die staanspoor was Die Wagtoring ’n tydskrif wat die Bybel gebruik en die Bybel aan ander geleer het. Die eerste nommer van Zion’s Watch Tower het byvoorbeeld meer as 200 tekste uit ten minste 30 Bybelboeke aangehaal of gesiteer. Maar meer is nodig as om net Bybelverse aan te haal. Mense het hulp nodig om dit te verstaan. Die Wagtoring het nog altyd Bybelbegrip bevorder. Van 1892 tot 1927 het elke nommer weeklikse skriflesings en ’n bespreking van ’n sleutelteks uit elke lesing bevat. Kyk die tabel met die titel “Geskiedkundige Wagtoring-artikels, dekade vir dekade” vir ander voorbeelde.
16, 17. Wat het Die Wagtoring se eerste redakteur gedoen om te verseker dat hierdie tydskrif altyd Bybelwaarheid sal voorstaan?
16 Hoe sou Die Wagtoring die reinheid van sy gedrukte boodskap bewaar? Die tydskrif se eerste redakteur, C. T. Russell, het voorsorgmaatreëls getref om te verseker dat wat in Die Wagtoring gedruk word, die waarheid is soos dit op daardie tydstip verstaan word. Een van daardie voorsorgmaatreëls word gevind in sy testament wat op 27 Junie 1907 gemaak is. (Russell het op 31 Oktober 1916 gesterf.) Sy testament sê:
“Ek gelas dat die hele redaksionele verantwoordelikheid van ZION’S WATCH TOWER berus by ’n komitee van vyf broers, wat ek tot groot versigtigheid en getrouheid aan die waarheid maan. Alle artikels wat in die kolomme van ZION’S WATCH TOWER verskyn, moet die algehele goedkeuring van ten minste drie van die komitee van vyf wegdra, en ek maan dat indien dit bekend is of daar vermoed word dat enige saak wat deur die drie goedgekeur word, bots met die sienings van een of albei van die ander lede van die komitee, sulke artikels drie maande lank moet oorstaan sodat hulle daaroor kan dink, bid en dit kan bespreek voordat dit gepubliseer word—sodat die eenheid van die geloof en die vredesbande, sover moontlik, in die redaksionele bestuur van die tydskrif bewaar kan word.”
17 Volgens Russell se testament moes elke lid van die redaksie “volkome lojaal aan die leerstellings van die Skrif” wees en moes hulle, as opvallende eienskappe, “reinheid van lewe, ’n duidelik begrip van die waarheid, ywer vir God, liefde vir die broers en getrouheid aan die Verlosser” openbaar. Russell het ook gestipuleer dat “daar hoegenaamd geen aanduiding sal wees van wie die verskillende artikels wat in die tydskrif verskyn, geskryf het nie . . . sodat die waarheid op grond van sy eie waarde herken en waardeer kan word, en veral sodat die Here as die Hoof van die kerk en die Bron van waarheid erken kan word.”
18. Waarom kan ons Die Wagtoring en Ontwaak! met vertroue lees?
18 Die Bestuursliggaam volg tot vandag toe soortgelyke riglyne. Elke artikel in Die Wagtoring sowel as Ontwaak! en elke bladsy, die kunswerk inkluis, word sorgvuldig deur gekose lede van die Bestuursliggaam bestudeer voordat dit gedruk word. Daarbenewens is diegene wat help om artikels vir Die Wagtoring te skryf Christen- ouere manne wat die erns van hulle toewysing besef. (Vergelyk 2 Kronieke 19:7.) Hulle bestee baie ure daaraan om die Bybel en ander naslaanmateriaal na te vors om te verseker dat wat geskryf is, die waarheid is en dat dit getrou by die Skrif bly (Prediker 12:9, 10; 2 Timotheüs 1:13). Dit is nie buitengewoon dat van twee weke tot meer as ’n maand bestee word aan die voorbereiding van een tydskrifartikel wat jy in 15 minute kan lees nie.
19. Wat kan jy doen om Bybelwaarheid voor te staan?
19 Jy kan gevolglik Die Wagtoring en Ontwaak! met vertroue lees. Maar jy kan meer doen. Jy kan hierdie tydskrifte geesdriftig vir ander aanbied sodat hulle ook die waarheid kan leer en baat kan vind by die boodskappe van die ‘wagter wat op die wagtoring staan’ (Jesaja 21:8). Ja, tesame met die hedendaagse wagter kan ook jy Bybelwaarheid voorstaan.
[Voetnote]
a Dit is interessant dat sommige lesers aanvanklik teleurgesteld was met die voorbladontwerp van The Golden Age. Dit het vir hulle te alledaags gelyk. In antwoord hierop het die Wagtoringgenootskap se jaarverslag gesê: “In hierdie verband wil ons net sê dat daar ’n drukkerstaking in New York en omstreke was toe daar met die publikasie van The Golden Age begin is. Slegs ’n paar dae tevore is ’n kontrak aangegaan vir die publikasie van The Golden Age, en die manne wat die perse bedien het wat die betrokke soort papier en omslag gebruik, het nie gestaak nie. Dit lyk dus na ’n bestiering dat daardie soort omslag en papier gekies is, want as enige ander soort gekies is, sou dit onmoontlik gewees het om die tydskrif te begin uitgee. Dit lyk dus asof die Heer die nuwe publikasie begunstig het.”
Onthou jy?
◻ Waarom het C. T. RusseIl begin om Bybellektuur uit te gee?
◻ Hoe het die vroeë Christene die waarheid voorgestaan?
◻ Waarom kom die woord “Wagtoring” voor in die titel van hierdie tydskrif?
◻ Wie is die hedendaagse “wagter”, en watter instrument gebruik hy by uitstek om sy stem te versterk?
◻ Hoe staan Die Wagtoring en Ontwaak! Bybelwaarheid voor?
[Tabel op bladsy 13]
Geskiedkundige Wagtoring-artikels, dekade vir dekade
1879: “God is liefde”—het Jesus se losprysoffer as die grondslag vir die mensdom se verlossing voorgestaan
1879: “Waarom boosheid toegelaat is”—het verduidelik waarom Jesus Christus se teenwoordigheid onsigbaar sou wees
1880: “Een liggaam, een gees, een hoop”—het 1914 as die einde van die Heidense Tye aangedui
1882: “Die loon van die sonde is die dood”—het die leerstelling oor ewige foltering as loëning van God se liefde blootgelê
1885: “Evolusie en die Brein-eeu”—het die evolusieteorie as vals blootgelê
1897: “Wat sê die Skrif oor spiritisme?”—het bewys gelewer van spiritisme se demoniese oorsprong
1902: “God eerste—sy aanstellings”—het gehoorsaamheid aan God se wet in die gesin en in saketransaksies beklemtoon
1919: “Geseënd is die onverskrokkenes”—het nuwe lewe in ’n ontwakende organisasie van onverskrokke aanbidders geblaas
1925: “Die geboorte van die nasie”—het die profesieë verklaar wat toon dat God se Koninkryk in 1914 gebore is
1931: “’n Nuwe naam”—voortaan sou die naam Jehovah se Getuies ware Christene van die afvallige Christendom onderskei
1935: “Die groot menigte”—het getoon dat daar begin is met die insameling van diegene wat vir ewig op aarde sou lewe
1938: “Organisasie”—het ’n waarlik teokratiese reëling onder Jehovah se Getuies ingevoer
1939: “Neutraliteit”—het Jehovah se Getuies wêreldwyd versterk om die druk van die Tweede Wêreldoorlog te weerstaan
1942: “Die enigste lig”—het die teken gegee dat die moedige getuieniswerk moet voortgaan
1945: “Onbeweeglik vir die regte aanbidding”—het getoon dat Christene hulle van bloedoortappings moet onthou
1952: “Om die organisasie rein te hou”—het getoon dat uitsetting deur gemeentes Skriftuurlik is
1962: “Onderdanigheid aan die ‘hoëre owerhede’—Waarom?”—het redes aangevoer vir betreklike onderdanigheid aan mensemagte
1973: “Hou God se gemeente skoon in die tyd van sy oordeel”—het mense aangespoor om nie tabak te gebruik nie
1979: “Ywer vir Jehovah se huis”—het herhaal dat die predikingswerk van huis tot huis die apostoliese voorbeeld volg
1982: “Geliefdes, . . . Bly in die liefde van God”—het Christene op hulle hoede gestel vir die maniere waarop afvalliges te werk gaan
1983: “Wandel met God in ’n gewelddadige wêreld”—het bevestig dat Christene niks met geweld te doen moet hê nie
1984: “Die onlangse kraal vir ‘ander skape’”—het verduidelik hoe hierdie aardse klas verenig word met diegene in die nuweverbond-“kraal”
1987: “Die Christelike Jubilee bereik sy hoogtepunt in die Millennium”—het getoon hoe alle lojale Christene vryheid en lewe verkry