Jehovah—Wie is hy?

TERWYL Henri Mouhot, ’n 19de-eeuse Franse ontdekkingsreisiger, sy pad deur die oerwoud in Kambodja oopgekap het, het hy afgekom op ’n tempel met ’n breë grag rondom. Dit was Angkor Wat, die grootste godsdiensmonument op aarde. Mouhot kon met een oogopslag sien dat die mosbedekte geboue die werk van mensehande was. “Dit is deur die een of ander eertydse Michelangelo opgerig”, het hy geskryf, “en dit is indrukwekkender as enigiets wat Griekeland of Rome vir ons nagelaat het.” Hoewel dit eeue lank verlate was en verwaarloos is, het hy geensins getwyfel dat die komplekse geboue deur iemand ontwerp is nie.

Dit is interessant dat ’n boek van wysheid wat eeue gelede geskryf is ’n soortgelyke redenasie gebruik het: “Elke huis word natuurlik deur iemand gebou, maar hy wat alles gebou het, is God” (Hebreërs 3:4). Maar party sê dalk: ‘Die werke van die natuur is anders as mensgemaakte voorwerpe.’ Nie alle wetenskaplikes is dit egter met hierdie beswaar eens nie.

Michael Behe, adjunk-professor van biochemie aan die Lehigh-universiteit, Pennsilvanië, VSA, erken eers dat “biochemiese stelsels nie lewelose voorwerpe is nie”, en vra dan: “Is lewende biochemiese stelsels die produk van intelligente ontwerp?” Hy verduidelik verder dat wetenskaplikes tans basiese veranderinge in lewende organismes ontwerp deur metodes soos geenmanipulering. Ja, lewelose sowel as lewende dinge kan “gebou” word! Behe het die mikroskopiese wêreld van lewende selle ondersoek en ongelooflik ingewikkelde stelsels opgemerk wat uit komponente bestaan wat van mekaar afhanklik is om hulle werk te doen. Sy gevolgtrekking? “Die resultaat van al hierdie pogings om die sel te ondersoek—om lewe op molekulêre vlak te ondersoek—is ’n luide, duidelike, deurdringende uitroep: ‘ontwerp!’”

Wie is dan die Ontwerper agter al hierdie ingewikkelde stelsels?

Wie is die Ontwerper?

Die antwoord kan gevind word in daardie antieke boek van wysheid wat vroeër aangehaal is—die Bybel. Die Bybel se openingswoorde gee met merkwaardige eenvoud en duidelikheid die antwoord op die vraag: Wie het alle dinge ontwerp? Dit sê: “In die begin het God die hemel en die aarde geskep.”—Genesis 1:1.

Die Skepper onderskei hom egter van ander wat God genoem word en identifiseer homself deur ’n unieke naam: “Só het die ware God, Jehovah, gesê, die Skepper van die hemele . . ., die Een wat die aarde en die opbrengs daarvan uitsprei, die Een wat asem aan die mense daarop gee” (Jesaja 42:5, 8). Jehovah is die naam van die God wat die heelal ontwerp het en wat manne en vroue op die aarde geskep het. Maar wie is Jehovah? Watter soort God is hy? En waarom moet jy na hom luister?

Die betekenis van Sy naam

Eerstens, wat beteken die Skepper se naam, Jehovah? Die Goddelike naam word met vier Hebreeuse letters (יהוה) geskryf en kom byna 7 000 keer in die Hebreeuse deel van die Bybel voor. Hierdie naam word beskou as die kousatiewe vorm van die Hebreeuse werkwoord ha·wahʹ (“word”) en beteken dus “Hy laat word”. Met ander woorde, in sy wysheid laat Jehovah homself word wat hy ook al moet wees om sy voornemens uit te voer. Hy word die Skepper, Regter, Redder, Onderhouer van die lewe, ensovoorts, om sy beloftes na te kom. Wat meer is, die Hebreeuse werkwoord neem die grammatikale vorm aan wat dui op ’n aksie wat besig is om uitgevoer te word. Dit toon dat Jehovah homself nog steeds die vervuller van sy voornemens laat word. Ja, hy is ’n lewende God!

Jehovah se oorheersende eienskappe

Die Bybel toon dat hierdie Skepper en vervuller van sy beloftes iemand is tot wie ’n mens aangetrokke kan voel. Jehovah self het sy vernaamste eienskappe geopenbaar en gesê: “Jehovah, Jehovah, ’n barmhartige en genadige God, wat nie gou toornig word nie en oorvloedig is in liefderyke goedhartigheid en waarheid, wat liefderyke goedhartigheid vir duisende bewaar, wat ongeregtigheid en oortreding en sonde vergewe” (Eksodus 34:6, 7). Jehovah word beskryf as ’n God van liefderyke goedhartigheid. Die Hebreeuse woord wat hier gebruik word, kan ook as “lojale liefde” vertaal word. Ten einde sy ewige voorneme te volbring, gaan Jehovah lojaal voort om liefde teenoor sy skepsele te toon. Waardeer jy nie sulke liefde nie?

Jehovah word ook nie gou toornig nie, en hy vergewe ons dwalinge geredelik. Dit is verkwikkend om in die geselskap te wees van iemand wat nie gedurig fout vind nie, maar bereid is om te vergewe. Dit beteken egter nie dat Jehovah oortreding deur die vingers sien nie. Hy het gesê: “Ek, Jehovah, het geregtigheid lief; ek haat roof tesame met onregverdigheid” (Jesaja 61:8). As die God van geregtigheid sal hy verstokte sondaars wat in hulle goddeloosheid volhard, nie vir ewig duld nie. Ons kan dus seker wees dat Jehovah op sy bestemde tyd die ongeregtighede in die wêreld om ons sal regstel.

Dit verg wysheid om ’n volmaakte ewewig tussen die eienskappe liefde en geregtigheid te handhaaf. Jehovah hou hierdie twee eienskappe op ’n wonderlike manier in ewewig wanneer hy met ons handel (Romeine 11:33-36). Sy wysheid kan natuurlik oral gesien word. Die skeppingswonders getuig daarvan.—Psalm 104:24; Spreuke 3:19.

Maar dit is nie genoeg om net wysheid te hê nie. Die Skepper moet ook krag hê om wat hy wil doen, ten volle uit te voer. Die Bybel toon dat hy so ’n God is: “Slaan julle oë op in die hoogte en kyk. Wie het hierdie dinge geskep? Die Een wat hulle leër volgens getal uitlei . . . Weens die oorvloed van dinamiese energie . . . , ontbreek nie een van hulle nie” (Jesaja 40:26). Jehovah het inderdaad “die oorvloed van dinamiese energie” tot sy beskikking om sy wil te volbring. Trek hierdie eienskappe jou nie tot Jehovah aan nie?

Die voordele daarvan om Jehovah te ken

Jehovah “het [die aarde] nie verniet geskep nie”, maar het “dit gevorm . . . om bewoon te word” deur mense wat ’n sinvolle verhouding met hom het (Jesaja 45:18; Genesis 1:28). Hy gee om vir sy aardse skepsele. Hy het die mensdom ’n volmaakte begin in ’n tuintuiste, ’n paradys, gegee. Mense is besig om die aarde te verderf en haal hulle sodoende Jehovah se groot misnoeë op die hals. Maar in ooreenstemming met die betekenis van sy naam sal Jehovah sy oorspronklike voorneme met die mens en die aarde vervul (Psalm 115:16; Openbaring 11:18). Hy sal die Paradys op aarde herstel vir diegene wat gewillig is om hom as sy kinders te gehoorsaam.—Spreuke 8:17; Matteus 5:5.

Die laaste boek van die Bybel beskryf die wonderlike lewe wat jy in daardie Paradys kan geniet: “Hy sal elke traan van hulle oë afvee, en die dood sal daar nie meer wees nie, en ook verdriet en angsgeroep en pyn sal daar nie meer wees nie. Die vorige dinge het verbygegaan” (Openbaring 21:3, 4). Dít is die werklike lewe wat Jehovah wil hê ons moet geniet. Wat ’n welwillende Vader is hy tog! Is jy gewillig om meer te leer van hom en van wat van jou verwag word om in die Paradys te lewe?

Tensy anders aangedui, kom Skrifaanhalings uit die Nuwe Wêreld-vertaling van die Heilige Skrif.