Met oortuiging uitgedruk

WANNEER iemand met oortuiging praat, sien ander dat hy vas glo aan wat hy sê. Sulke oortuiging kon duidelik gesien word in die apostel Paulus se bediening. Aan diegene wat in Tessalonika gelowiges geword het, het hy geskryf: ‘Die goeie nuus wat ons verkondig, het nie met woorde alleen tot julle gekom nie, maar ook met sterk oortuiging’ (1 Tess. 1:5). Daardie oortuiging was duidelik in die manier waarop hy gepraat het sowel as in sy lewenswyse. Sterk oortuiging moet ook duidelik wees in die manier waarop ons Bybelwaarhede oordra.

Om met oortuiging te praat, is nie dieselfde as om eiesinnig, dogmaties of verwaand te wees nie. Wanneer iemand met oortuiging oor die dinge in God se Woord praat, doen hy dit eerder op ’n manier wat van sterk geloof getuig.—Heb. 11:1.

Geleenthede om met oortuiging te praat. Dit is belangrik om met oortuiging te praat wanneer jy aan die veldbediening deelneem. Mense skenk dikwels net soveel aandag aan hoe jy praat as aan wat jy sê. Hulle voel aan hoe jy werklik voel oor wat jy sê. Jou oortuiging kan, met groter krag as woorde alleen, toon dat jy iets van groot waarde het om oor te dra.

Dit is ook belangrik om met oortuiging te praat wanneer jy medegelowiges toespreek. Die apostel Petrus het sy eerste geïnspireerde brief geskryf “om aanmoediging te gee en ’n ernstige getuienis dat dít die ware onverdiende goedhartigheid van God is”. Hy het die broers aangespoor: “Staan hierin vas” (1 Pet. 5:12). Toe die apostel Paulus aan die gemeente in Rome geskryf het, het hy oortuiging uitgespreek wat hulle gehelp het. Hy het geskryf: “Ek is daarvan oortuig dat nie die dood of die lewe of engele of regerings of teenswoordige dinge of toekomstige dinge of magte of hoogte of diepte of enige ander skepping ons sal kan skei van God se liefde wat in Christus Jesus, ons Here, is nie” (Rom. 8:38, 39). Paulus het ook oorredingskrag gebruik toe hy geskryf het oor die noodsaaklikheid daarvan om vir ander te getuig, en sy ywer in daardie werk het duidelik getoon dat hy self oortuig was van die belangrikheid daarvan (Hand. 20:18-21; Rom. 10:9, 13-15). Hedendaagse Christen- ouer manne moet net soveel oortuiging openbaar wanneer hulle uit God se Woord onderrig.

Tydens studiesessies en op ander tye moet ouers hulle met oortuiging uitdruk wanneer hulle geestelike sake met hulle kinders bespreek. Dit vereis dat ouers liefde vir God en sy weë in hulle eie harte moet aankweek. Dan kan hulle met hartgrondige oortuiging met hulle kinders praat, ‘want uit die oorvloed van die hart praat die mond’ (Luk. 6:45; Deut. 6:5-7). Hierdie oortuiging sal ouers ook beweeg om ’n voorbeeld van ‘geloof sonder huigelary’ te stel.—2 Tim. 1:5.

Dit is veral belangrik om jou met oortuiging uit te druk wanneer jou geloofsoortuigings in twyfel getrek word. ’n Skoolmaat, ’n onderwyser of ’n werksmaat spreek dalk hulle verbasing uit dat jy nie aan ’n sekere viering deelneem nie. ’n Ferm, goed beredeneerde antwoord sal hom moontlik help om jou Bybelse standpunt te respekteer. Sê nou iemand probeer om jou by verkeerde gedrag te betrek—oneerlikheid, dwelmmisbruik of geslagsonsedelikheid? Dit is belangrik om duidelik te maak dat jy beslis nie so iets sal doen nie en dat niks jou van besluit sal laat verander nie. Dit vereis dat jy met oortuiging praat wanneer jy die voorstel verwerp. Toe Josef die onsedelike toenaderings van Potifar se vrou weerstaan het, het hy ferm gesê: “Hoe kan ek dan hierdie groot kwaad doen en in werklikheid teen God sondig?” Toe sy volgehou het, het hy uit die huis uit gevlug.—Gen. 39:9, 12.

Hoe oortuiging geopenbaar word. Die woorde wat jy gebruik, kan baie help om jou oortuiging oor te dra. Jesus het dikwels belangrike verklarings ingelei deur te sê: “Voorwaar, voorwaar, ek sê vir jou” (Joh. 3:3, 5, 11; 5:19, 24, 25). Paulus se oortuiging is weerspieël in uitdrukkings soos “ek is daarvan oortuig”, “ek weet en is daarvan oortuig in die Here Jesus” en “ek vertel die waarheid, ek lieg nie” (Rom. 8:38; 14:14; 1 Tim. 2:7). Jehovah het sy profete soms geïnspireer om nadruklike verklarings aangaande die vervulling van sy woord te maak, soos: “Dit sal vir seker uitkom” (Hab. 2:3). Wanneer jy na daardie profesieë verwys, kan jy soortgelyke uitdrukkings gebruik. As jy nie op jouself nie, maar op Jehovah vertrou, en as jy op ’n eerbiedige wyse met ander praat, sal uitdrukkings wat soortgelyke oortuiging weerspieël, toon dat jy sterk geloof het.

Oortuiging kan ook deur die erns en die intensiteit van jou woorde getoon word. Jou gesigsuitdrukkings, jou gebare en jou lyftaal dra alles hiertoe by, hoewel dit ietwat van persoon tot persoon kan verskil. Selfs as jy skaam is of van nature ’n sagte stem het, sal jou oortuiging duidelik wees as jy heeltemal oortuig is dat wat jy sê, die waarheid is en dat ander dit moet hoor.

Enige uitdrukking van oortuiging moet natuurlik opreg wees. As mense agterkom dat dit nie die geval is nie en dat ons nie uit die hart praat nie, sal hulle waarskynlik nie ons boodskap ernstig opneem nie. Daarom is dit baie belangrik dat jy jouself moet wees. Na gelang van die grootte van jou gehoor sal jy dalk harder as gewoonlik en met meer intensiteit moet praat. Maar jou doel moet wees om jou opreg en natuurlik uit te druk.

Wat jou sal help om met oortuiging te praat. Aangesien daar ’n verband is tussen jou oortuiging en jou gevoelens oor jou materiaal, is goeie voorbereiding die sleutel. Dit is nie genoeg om materiaal bloot uit ’n publikasie te neem en dit dan woord vir woord op te sê nie. Jy moet die materiaal duidelik verstaan en dit in jou eie woorde kan stel. Jy moet heeltemal oortuig wees dat dit waar is en dat jou materiaal vir jou gehoor van waarde is. Dit beteken dat jy in ag moet neem wat hulle omstandighede is sowel as wat hulle reeds oor die onderwerp weet of hoe hulle daaroor voel wanneer jy jou aanbieding voorberei.

Dit is makliker vir ander om ons oortuiging aan te voel wanneer ons voordrag vlot is. Moet dus nie net goeie materiaal voorberei nie, maar werk ook hard aan jou voordrag. Skenk veral aandag aan die dele van jou materiaal wat met groter erns aangebied moet word sodat jy dit kan voordra sonder om aan jou aantekeninge gebonde te wees. Onthou ook om vir Jehovah se seën op jou pogings te bid. Sodoende sal jy ‘deur middel van ons God die vrymoedigheid bymekaarskraap’ om op ’n manier te praat wat toon dat jy oortuig is van die waarheid en belangrikheid van jou boodskap.—1 Tess. 2:2.