Bied die Goeie Nuus Aan—Met oortuiging
1 Toe die apostel Paulus na die harde werk van die gemeente in Thessalonika verwys het, het hy vir hulle gesê: “Die evangelie wat ons aan julle verkondig het, het nie bloot met woorde tot julle gekom nie, maar ook met krag en deur die Heilige Gees en met volle oortuiging.... En julle het ons voorbeeld gevolg en volgelinge van die Here geword” (1 Thess. 1:5, 6, NAV). Ja, Paulus en sy metgeselle, asook die gemeente in Thessalonika, was daarvan oortuig dat hulle God reg aanbid. Hierdie oortuiging het uit hulle spraak geblyk. Ons bediening moet ook van volle oortuiging getuig.
PRAAT UIT DIE HART
2 Hoe kan ons in ons bediening blyk gee van ons oortuiging? Dit beteken basies dat ons uiting gee aan wat in ons hart is. Die manier waarop ons die goeie nuus aanbied, moet toon dat ons werklik glo wat ons se. As ons uit die hart praat, sal ons opregtheid en oortuiging duidelik wees, want “uit die oorvloed van die hart spreek sy mond”.—Luk. 6:45.
3 As ons oortuiging wil weerspieël, moet ons ’n diepe waardering vir die waarheid en vir Jehovah se organisasie hê. Aangesien jy die waarheid het, is dit jou verantwoordelikheid om ander te help om dit te leer, ’n Positiewe beskouing hiervan sal jou aanspoor om die waarheid met oortuiging aan te bied. Jesus het vir ons ’n uitstekende voorbeeld gestel toe hy met die Samaritaanse vrou gepraat het.—Joh. 4:21-24.
4 Die manier waarop ons lektuur aanbied, toon of ons uit die hart praat. Wanneer ons die goeie nuus aanbied, moet ons vertroud wees met die lektuuraanbod en spesifieke punte kies wat gebruik kan word om die huisbewoner se belangstelling te wek. Dit sal ons ook meer vertroue gee wanneer ons die lektuur aanbied.
VERMY AANWENSELS
5 Sekere aanwensels kan soms die huisbewoner se beskouing van ons opregtheid en oortuiging beïnvloed. As ons onnodig na ons lektuur kyk of toelaat dat ons blik dwaal terwyl ons met die huisbewoner praat, kan dit die indruk wek dat ons nie opreg is nie. Ons moet na die huisbewoner kyk terwyl ons praat en so toon dat ons glo wat ons sê.
6 Dit is vir party skaam verkondigers moeilik om die huisbewoner heeltyd in die oë te kyk. Is dit jou probleem? Wat kan dan daaromtrent gedoen word? Hierdie probleem is soms daaraan te wyte dat ons te veel aan ons swakhede en onbekwaamhede dink terwyl ons praat. Ons meen dalk dat iemand anders bekwamer is om die persoon te help. Dit is egter Jehovah se werk. Dink aan Jehovah en sy eindelose krag in plaas van jou eie swakhede. Toe die apostel Paulus in ’n situasie beland het waar hy alleen moes staan, het hy gesê: “Die Here het my bygestaan en my krag gegee, sodat deur my die prediking heertemal volbring kan word” (2 Tim. 4:17). Jy kan ook deur gebed krag van Jehovah ontvang.
7 Ander aanwensels, soos om jou gewig van die een voet na die ander te versit, of om onnodig deur jou Bybel of die lektuur te blaai, kan senuweeagtigheid verraai. Hierdie aanwensels kan beheer word as jy daarvan bewus is en op Jehovah vertrou om jou te help om moediger te wees.
8 Gesigsuitdrukkings is ook belangrik, aangesien hulle gewoonlik toon wat in jou hart is. Sterk oortuiging en opregte belangstelling in die huisbewoner moet op jou gesig weerspieël word.
9 Ons woordkeuse speel ook ’n belangrike rol in die indruk wat ons wek. As ons herhaaldelik uitdrukkings gebruik soos “ek dink” of “dalk” kan die huisbewoner die indruk kry dat ons nie seker is van wat ons sê nie. Ons woordkeuse moet ons oortuiging weerspieël.—Vergelyk Mattheüs 7: 28, 29.
10 As jy jou daarop toelê om die goeie nuus met oortuiging aan te bied, kan jy die versekering hê dat ‘jou arbeid in die Here nie tevergeefs is nie’.—1 Kor. 15:58.