Hulle lewe is gered omdat hulle op ’n waarskuwing ag geslaan het
JESUS CHRISTUS het ’n waarskuwing gegee oor die einde van die Joodse stelsel van dinge, waarvan die tempel in Jerusalem die middelpunt was. Hy het nie ’n datum verstrek wanneer dit sou gebeur nie. Maar hy het gebeure beskryf wat daardie vernietiging sou voorafgaan. Hy het sy dissipels aangespoor om aan te hou waak en uit die gevaargebied pad te gee.
Jesus het voorspel: “Wanneer julle Jerusalem deur leërkampe omsingel sien, dan moet julle weet dat sy verwoesting naby gekom het.” Hy het ook gesê: “Wanneer julle . . . die walglike ding wat verwoesting veroorsaak . . . in ’n heilige plek sien staan . . . , laat dié wat in Judea is, dan na die berge begin vlug.” Jesus het sy dissipels aangespoor om nie terug te gaan om materiële besittings te red nie. Dit was noodsaaklik om te vlug as hulle hulle lewe wou red.—Lukas 21:20, 21; Matteus 24:15, 16.
In 66 G.J. het Cestius Gallus Romeinse magte teen Jerusalem aangevoer om die voortdurende opstande te onderdruk. Hy het selfs in die stad ingegaan en die tempel beleër. Die stad was in beroering. Diegene wat aangehou waak het, kon sien dat ’n ramp op hande was. Maar was dit moontlik om te vlug? Onverwags het Cestius Gallus sy troepe onttrek. Joodse rebelle het hulle agternagesit. Dít was die tyd om uit Jerusalem en die hele Judea te vlug!
Die volgende jaar het Romeinse troepe onder Vespasianus en sy seun Titus teruggekeer. Die hele land was in oorlog gewikkel. Vroeg in 70 G.J. het die Romeine ’n verskansing met spits pale rondom Jerusalem gebou. Alle ontsnappingsroetes was afgesny (Lukas 19:43, 44). Faksies in die stad het mekaar uitgemoor. Die res van die mense is deur die Romeine doodgemaak of in gevangenskap weggevoer. Die stad en sy tempel is heeltemal vernietig. Volgens die eerste-eeuse geskiedskrywer Josefus het meer as ’n miljoen Jode gely en gesterf. Daardie tempel is nooit weer herbou nie.
As die Christene nog in 70 G.J. in Jerusalem was, sou hulle saam met al die ander mense wat daar was, doodgemaak of as slawe weggevoer gewees het. Maar eertydse geskiedskrywers sê dat die Christene gehoor gegee het aan die goddelike waarskuwing en uit Jerusalem sowel as die hele Judea gevlug het na die berge oos van die Jordaanrivier. Party het hulle in Pella, in die provinsie Perea, gevestig. Hulle het Judea verlaat en nie weer teruggegaan nie. Hulle lewe is gered omdat hulle op Jesus se waarskuwing ag geslaan het.
Neem jy waarskuwings uit betroubare bronne ernstig op?
Omdat hulle gehoor het van baie waarskuwings oor dinge wat nooit gebeur het nie, neem baie mense alle waarskuwings ligtelik op. Maar dit kan jou lewe red as jy aan waarskuwings gehoor gee.
In 1975 is waarskuwings in China gegee dat daar ’n aardbewing sou wees. Amptenare het opgetree. Die mense het gereageer. Derduisende lewens is gered.
In April 1991 het mense in die Filippyne wat in dorpies teen die hange van die berg Pinatubo gewoon het, gesê dat die berg stoom en as uitblaas. Nadat die Filippynse Instituut vir Vulkanologie en Seismologie die situasie twee maande lank dopgehou het, het hulle gewaarsku oor dreigende gevaar. Onmiddellik is tienduisende mense uit die gebied verwyder. Vroeg op 15 Junie is meer as agt kubieke kilometer vergruisde materiaal met ’n oorverdowende ontploffing die lug ingeskiet en het dit op die grond neergereën. Duisende lewens is gered omdat mense op die waarskuwing ag geslaan het.
Die Bybel waarsku oor die einde van die teenswoordige stelsel van dinge. Ons lewe nou in die laaste dae. Hou jy aan waak terwyl die einde nader kom? Tree jy op sodat jy buite die gevaargebied kan bly? Waarsku jy ander met ’n gevoel van dringendheid om dieselfde te doen?
[Prent op bladsy 20]
Omdat hulle op die waarskuwing ag geslaan het, is baie mense se lewe gered toe die berg Pinatubo vulkaniese as uitgeblaas het
[Prent op bladsy 21]
Die lewens van Christene wat gehoor gegee het aan Jesus se waarskuwing, is gespaar toe Jerusalem in 70 G.J. vernietig is