Is jy bewus van die tye waarin ons lewe?
OM BEWUS te wees van gevaar kan die verskil tussen die lewe en die dood beteken. Dit kan toegelig word deur wat op twee vulkaaneilande gebeur het.
Mont Pelée, die dodelikste vulkaan van die 20ste eeu, het op 8 Mei 1902 op die Karibiese eiland Martinique uitgebars. Dit het gelei tot die dood van byna al 30 000 inwoners van St. Pierre, ’n stad aan die voet van die vulkaan.
In Junie 1991 het die berg Pinatubo ontplof in wat moontlik die grootste uitbarsting van die eeu was. Dit het in ’n dig bevolkte gebied van die Filippyne plaasgevind en het sowat 900 lewens geëis. Maar hierdie keer het twee faktore gehelp om duisende lewens te red: (1) ’n bewustheid van die gevaar en (2) ’n bereidwilligheid om in ooreenstemming met waarskuwings op te tree.
Gepaste optrede het lewens gered
Die berg Pinatubo was al honderde jare lank rustend toe dit in April 1991 tekens van ’n dreigende uitbarsting begin toon het. Stoom en swaweldioksied het uit die keël begin ontsnap. Die plaaslike inwoners het ’n reeks aardskuddings gevoel, en ’n onheilspellende koepel van gestolde lawa het uit die berg te voorskyn begin kom. Wetenskaplikes van die Filippynse Instituut vir Vulkanologie en Seismologie het ’n wakende oog daaroor gehou en het amptenare mettertyd oortuig dat dit verstandig sou wees om 35 000 inwoners uit nabygeleë dorpe en nedersettings in die gebied te verwyder.
Dit is te verstane dat mense onwillig is om hulle huise sonder rede te ontruim, maar hulle teësinnigheid is oorkom deur ’n videovertoning wat die gevare van ’n vulkaanuitbarsting op aanskoulike wyse uitgebeeld het. Die massa-uittog was net betyds. Twee dae later het ’n kragtige ontploffing agt kubieke kilometer as in die atmosfeer in uitgeskiet. Honderde mense het later in modderstrome, of lahars, omgekom. Maar moontlik duisende is gered, omdat die mense teen die gevaar gewaarsku is en in ooreenstemming met die waarskuwings opgetree het.
Ontsnapping aan ’n mensgemaakte ramp
In die eerste eeu van ons Gewone Jaartelling moes die Christene wat in Jerusalem gewoon het ook besluit of hulle hulle huise moet ontruim. Omdat hulle in 66 G.J. uit daardie stad gevlug het, het hulle ontkom aan die vernietiging wat die ander inwoners en duisende Jode getref het wat vir die Pasga van 70 G.J. na Jerusalem gekom het. Meer as ’n miljoen mense was in daardie ommuurde stad vir die Pasgaviering toe die Romeinse leërs dit onmoontlik gemaak het vir enigiemand om te ontsnap. Hongersnood, magstryde en die meedoënlose aanvalle van die Romeine het tot ’n dodetal van meer as ’n miljoen gelei.
Die ramp wat ’n einde gemaak het aan die Joodse opstand teen Rome het nie onverwags gekom nie. Etlike dekades vroeër het Jesus Christus voorspel dat Jerusalem beleër sou word. Hy het gesê: “Wanneer julle Jerusalem deur leërkampe omsingel sien, dan moet julle weet dat sy verwoesting naby gekom het. Laat dié wat in Judea is dan na die berge begin vlug, en laat dié wat in die midde van die stad is, uitgaan, en laat dié wat in die plattelandse plekke is nie daar ingaan nie” (Lukas 21:20, 21). Daardie instruksies was duidelik, en Jesus se volgelinge het dit ernstig opgeneem.
Die vierde-eeuse geskiedskrywer Eusebius van Sesarea vertel dat die Christene van die hele Judea op Jesus se waarskuwing ag geslaan het. Toe die Romeine hulle eerste beleëring van Jerusalem in 66 G.J. gestaak het, het baie Joodse Christene in die nie-Joodse stad Pella, in die Romeinse provinsie Perea, gaan woon. Deur bewus te wees van die tye waarin hulle gelewe het en in ooreenstemming met Jesus se waarskuwing op te tree, het hulle ontkom aan wat al as “een van die verskriklikste beleërings in die geskiedenis” beskryf is.
Vandag is soortgelyke waaksaamheid nodig. So ook is daadwerklike optrede. Die volgende artikel sal verduidelik waarom.
[Foto-erkenning op bladsy 3]
Godo-Foto, West Stock