Hoofstuk 20
Sê nou my gesin is arm?
Gregory, ’n jong man in Oos-Europa, kan nie die klere of elektroniese toerusting bekostig wat party jongmense in die Weste kan bekostig nie. Hy is so gefrustreerd met sy lewensomstandighede dat hy Oostenryk toe wil trek. Dink jy Gregory is arm?
□ Ja □ Nee
Duisende kilometers daarvandaan woon Loyiso, ’n jong man uit ’n plattelandse dorpie in Suider-Afrika. Loyiso woon saam met sy gesin in ’n klein hutjie en beny die jongmense in ’n dorp daar naby wat wonderlike “luukshede” geniet—lopende water en elektrisiteit. Sou jy sê Loyiso is arm?
□ Ja □ Nee
DIS duidelik dat “arm” ’n relatiewe term is, wat verskillende dinge in verskillende lande beteken. Byvoorbeeld, Gregory het gedink dat hy brandarm is, maar in vergelyking met Loyiso lewe hy in weelde. Dit laat ’n mens nogal dink as jy besef dat, ongeag hoe arm jy ook al is, daar heel moontlik ander is met wie dit nog erger gaan. Maar as jy nie ordentlike skoolklere of basiese geriewe, soos lopende water, het nie, laat dit jou dalk nie juis beter voel om te hoor dat ander mense nog minder het nie.
Party jongmense wat arm grootword, voel of hulle niks werd en minderwaardig is, en hulle probeer hulle probleme vergeet deur alkohol of dwelms te gebruik. Maar as jy probeer om van die werklikheid af weg te kom, maak dit dinge eintlik net erger. Diegene wat alkohol misbruik, vind dit “byt . . . soos ’n slang, en dit skei gif af soos ’n adder” (Spreuke 23:32). Maria, ’n meisie uit ’n arm enkelouergesin in Suid-Afrika, sê: “Om van die werklikheid te probeer wegkom, veroorsaak meer probleme as wat dit oplos.”
Jy gebruik miskien nie alkohol of dwelms nie, maar jy het dalk nie veel hoop dat jou lot in die lewe ooit sal verbeter nie. Waarheen kan jy jou wend vir hulp? Die Bybel se wyse raad kan soos ’n sleutel wees wat jou van die kettings van wanhoop bevry en jou in staat stel om ’n gesonde gesindheid aan te kweek. Kom ons kyk hoe.
Dink aan wat jy het
Een positiewe stap wat jy kan doen, is om te konsentreer op wat jy het, nie op wat jy nie het nie. Dinge soos ’n huis en ’n liefdevolle gesin is beslis waardevoller as geld! ’n Bybelspreuk sê: “’n Bak groente waar daar liefde is, is beter as ’n vetgemaakte bul en haat daarby” (Spreuke 15:17). Christenjongmense het iets besonder waardevols—die ondersteuning van “die hele gemeenskap van broers”.—1 Petrus 2:17.
Miskien kan jy ook probeer om ’n positiewer beskouing van jou materiële besittings te kry. Toegegee, jy woon miskien in ’n eenvoudige, moontlik selfs armoedige, huis. Jy dra dalk ou, verslete of gelapte klere. En jy wil dalk graag ’n groter verskeidenheid kos hê om te eet. Maar het jy modieuse klere of ’n weelderige huis nodig om God se goedkeuring te geniet? Het jy uitheemse disse nodig om aan die lewe en gesond te bly? Nie regtig nie. Die apostel Paulus het ’n waardevolle les in hierdie verband geleer. Hy het rykdom sowel as armoede ervaar (Filippense 4:12). Sy gevolgtrekking? “As ons dan kos en klere het, moet ons daarmee tevrede wees.”—1 Timoteus 6:8, Nuwe Afrikaanse Bybelvertaling.
Eldred, ’n Suid-Afrikaanse man wat in ’n arm gesin grootgeword het, sê: “Ons het maar net aanvaar dat die gesin versigtig met geld moet werk en dat ons nie alles kan kry wat ons wil hê nie.” Eldred vertel dat sy ma sy skoolbroek eenvoudig keer op keer gelap het as dit verslete geraak het. “Die kinders het my partykeer geterg daaroor”, erken Eldred. “Maar die belangrikste was dat ons klere skoon en heel was.”
Bou selfrespek op
James, 11, het saam met sy ma en suster in ’n plakkerskamp naby Johannesburg gewoon. Hulle het omtrent geen materiële besittings gehad nie. Maar James het nogtans waardevolle dinge gehad—tyd en energie—en hy het dit met graagte gebruik om ander te help. Elke naweek het James sy dienste aangebied om ’n plaaslike Koninkryksaal van Jehovah se Getuies te help bou. Hierdie werk het hom nie net gehelp om sy tyd produktief te gebruik nie, maar het hom ook laat voel dat hy iets bereik en het hom selfrespek gegee. “Ná ’n dag van saalbou het ek ’n gevoel van tevredenheid diep in my binneste!” sê hy.
Nog ’n produktiewe werk is die Bybelonderrigtingswerk wat van deur tot deur gedoen word (Matteus 24:14). Jongmense onder Jehovah se Getuies neem gereeld aan hierdie werk deel. Deur dit te doen, gee hulle ander hoop op ’n beter lewe in die toekoms, en hulle vergroot ook hulle eie selfrespek en eiewaarde. Hulle maak weliswaar nie geld uit hierdie werk nie. Maar onthou die boodskap wat Jesus aan Christene in die eertydse gemeente in Smirna gegee het. Hulle was materieel redelik arm. Nietemin kon Jesus, weens hulle diep geestelikheid, vir hulle sê: “Ek ken jou verdrukking en armoede—maar jy is ryk.” Omdat hulle daadwerklik geloof beoefen het in Jesus se vergote bloed, sou hulle op die ou end groot rykdom verkry deur die kroon van onsterflike lewe te ontvang.—Openbaring 2:9, 10.
Kyk vooruit
Jy kan ’n hegte verhouding met Jehovah opbou, of jy nou ryk of arm is. Die Bybel sê: “Die ryke en die arme het mekaar ontmoet. Jehovah is die Maker van hulle almal” (Spreuke 22:2). Hierdie feit het duisende jong Getuies van Jehovah gehelp om armoede die hoof te bied. Hulle besef dat geluk nie afhang van die materiële dinge wat ’n mens besit nie, maar van vriendskap met Jehovah God, wat almal verwelkom wat hom wil dien. God bied die hoop op lewe in ’n toekomstige nuwe wêreld wat vry sal wees van knellende armoede.—2 Petrus 3:13; Openbaring 21:3, 4.
Gebruik intussen jou middele wyslik. Dink aan die toekoms. Maak geestelike skatte bymekaar (Matteus 6:19-21). Beskou armoede as ’n uitdaging wat jy die hoof kan bied!
SLEUTELTEKSTE
“Selfs wanneer iemand oorvloed het, spruit sy lewe nie voort uit die dinge wat hy besit nie.”—Lukas 12:15.
WENK
Vermy dobbelary, rook en drankmisbruik. As ander gesinslede hierdie gewoontes het, stel vir hulle ’n voorbeeld deur jou gedrag.
HET JY GEWEET . . . ?
As jy Bybelbeginsels toepas, kan dit jou help om tevredenheid aan te kweek ten spyte van jou omstandighede.—Filippense 4:12, 13; 1 Timoteus 6:8; Hebreërs 13:5.
AKSIEPLAN!
Wat ek het ․․․․․
Ek sal hierdie dinge gebruik om ander te help deur ․․․․․
Wat ek graag vir my ouer(s) hieroor wil vra ․․․․․
WAT DINK JY?
● Waarom is “armoede” ’n relatiewe term?
● Waarom is dit onverstandig om dwelms, alkohol of iets anders te gebruik om van die werklikheid te probeer wegkom?
● Watter praktiese stappe kan jy doen om armoede die hoof te bied?
[Lokteks op bladsy 168]
Al het ek vasgevang gevoel in armoede, het ek besef dat dit niks sou help om by ’n bende aan te sluit of om te steel om ’n bestaan te maak nie. Vandag is baie in my ouderdomsgroep wat daardie dinge gedoen het, hopelose mislukkings, verslaaf aan drank of dwelms of in die tronk.’’—George
[Venster/Prente op bladsy 164]
Werkblad
Moet ek in ’n ander land gaan woon?
Party jongmense wil in ’n ander land gaan woon om geld te verdien, hetsy vir hulleself of om hulle gesin te onderhou. Ander trek om ’n ander taal te leer, verder te gaan studeer of van probleme by die huis weg te kom. Party Christenjongmense het na lande getrek waar evangeliedienaars nodig is. Om na ’n ander land te trek, is ’n groot besluit wat nie sommer maklik geneem moet word nie. As jy dit dan oorweeg om in ’n ander land te gaan woon, lees die tekste wat hieronder aangegee word, en dink goed daaroor na. Vra jou die volgende vrae af, en skryf jou antwoorde op ’n stuk papier neer. Bid dan oor jou besluit.
□ Watter wetlike vereistes is daarby betrokke?—Romeine 13:1.
□ Wat sal die totale finansiële koste daarvan wees om in ’n ander land te gaan woon?—Lukas 14:28.
□ Wat doen ek nou wat bewys dat ek in ’n ander land vir myself sal kan sorg?—Spreuke 13:4.
□ Watter raad het ek gekry by geestelike ryp persone wat al in ’n ander land gewoon het?—Spreuke 1:5.
□ Wat dink my ouers van die idee?—Spreuke 23:22.
□ Waarom wil ek in ’n ander land gaan woon?—Galasiërs 6:7, 8.
□ As ek by ander mense gaan bly, sal hulle my aanmoedig om goeie geestelike gewoontes te handhaaf?—Spreuke 13:20.
□ Voor watter sedelike, fisiese en geestelike gevare sal ek dalk te staan kom?—Spreuke 5:3, 4; 27:12; 1 Timoteus 6:9, 10.
□ Watter voordele kan ek realisties gesproke verwag as ek in ’n ander land woon?—Spreuke 14:15.
[Prent op bladsy 167]
Die Bybel se raad kan soos ’n sleutel wees wat jou van die kettings van wanhoop bevry