Hoofstuk 24

Wat moet ek doen as my ouers stry?

Stry jou ouers ooit voor jou? Indien wel, oor watter van die volgende kwessies stry hulle die meeste?

□ Geld

□ Huishoudelike take

□ Familie

□ Jou

Wat wens jy dat jy vir jou ouers kon sê oor hoe dit jou laat voel? Skryf jou kommentare hieronder neer.

․․․․․

DIS altyd ontstellend as jou ouers stry. Jy is immers lief vir hulle, en jy maak staat op hulle vir ondersteuning. Daarom krap dit jou dalk vreeslik om wanneer jy hulle hoor stry. Jy stem moontlik saam met Marie, wat sê: “Dis moeilik vir my om my ouers te respekteer as dit lyk of hulle mekaar nie respekteer nie.”

Wanneer jy jou ouers sien stry, bring dit ’n pynlike waarheid by jou tuis: Hulle is nie naastenby so volmaak as wat jy dalk gedink het nie. Wanneer jy dít besef, kan dit allerhande vrese laat ontstaan. As hulle dikwels of baie erg stry, is jy dalk bekommerd dat hulle huwelik besig is om te verbrokkel. “Wanneer ek my ouers hoor stry”, sê Marie, “dink ek dat hulle gaan skei en dat ek sal moet kies by wie ek wil bly. Ek is ook bang dat ek nie meer by my broers en susters sal bly nie.”

Waarom stry ouers, en wat moet jy doen wanneer dit gebeur?

Waarom ouers stry

Oor die algemeen ‘verdra jou ouers mekaar dalk in liefde’ (Efesiërs 4:2). Maar die Bybel sê: “Almal het gesondig en skiet te kort aan die heerlikheid van God” (Romeine 3:23). Jou ouers is nie volmaak nie. Daarom moet dit jou nie verbaas as irritasies ophoop en dit soms op ’n stryery uitloop nie.

Onthou ook dat ons in “kritieke tye [lewe] wat moeilik is om deur te kom” (2 Timoteus 3:1). Die druk om ’n bestaan te maak, die rekeninge te betaal, die atmosfeer by die werk te verduur—dit alles veroorsaak geweldige spanning in ’n huwelik. En as albei ouers sekulêr werk, kan die besluit oor wie wat in die huis gaan doen, ’n stryery veroorsaak.

Al het jou ouers meningsverskille, wees verseker dat dit nie noodwendig beteken dat hulle huwelik verbrokkel nie. Jou ouers is heel moontlik nog steeds lief vir mekaar—al stem hulle nie altyd oor alles saam nie.

Ter toeligting: Het jy al ooit ’n fliek saam met goeie vriende gekyk en gevind dat jy nie dieselfde daarvan dink as hulle nie? Dit kan gebeur. Selfs mense wat na aan mekaar is, sal sekere dinge verskillend beskou. Dit kan dieselfde wees met jou ouers. Miskien is hulle albei besorg oor die gesin se finansies, maar elkeen het ’n ander beskouing van hoe om te begroot; albei wil ’n gesinsvakansie beplan, maar elkeen het ’n ander idee van wat ontspanning is; of albei wil graag hê dat jy goed moet vaar op skool, maar elkeen het ’n ander siening oor wat die beste manier is om jou te motiveer.

Die punt is, eenheid vereis nie eendersheid nie. Twee mense wat mekaar liefhet, kan dinge soms verskillend beskou. Nietemin is dit dalk vir jou moeilik om na jou ouers se stryery te luister. Wat kan jy doen of sê wat jou sal help om dit te hanteer?

Wat jy kan doen

Wees respekvol. Dis maklik om geïrriteerd te raak met ouers wat alewig stry. Hulle is immers veronderstel om die voorbeeld vir jou te stel—nie andersom nie. Maar as jy ’n ouer minagtend behandel, sal dit net die spanning in die gesin laat vererger. Nog belangriker, Jehovah God beveel jou om jou ouers te respekteer en te gehoorsaam—selfs wanneer dit nie maklik is om dit te doen nie.—Eksodus 20:12; Spreuke 30:17.

Maar sê nou jou ouers sit vas oor iets waarby jy regstreeks betrokke is? Byvoorbeeld, veronderstel een van jou ouers is ’n Christen en die ander een is ’n ongelowige. Op godsdiensgebied ontstaan daar dalk verskille waarin jy saam met jou godvresende ouer ’n standpunt vir regverdigheid moet inneem (Matteus 10:34-37). Doen dit te alle tye “met sagmoedigheid en diep respek”. Jou voorbeeld in dié verband help dalk om eendag jou ongelowige ouer te wen.—1 Petrus 3:15.

Bly neutraal. Wat kan jy doen as jou ouers druk op jou plaas om kant te kies in sake waarby jy nie regstreeks betrokke is nie? Probeer neutraal bly. Jy kan jou dalk op ’n mooi manier verskoon deur iets te sê soos: “Ma en Pa, ek is lief vir julle albei. Maar moet my tog asseblief nie vra om kant te kies nie. Dis iets wat julle maar onder mekaar moet uitsorteer.”

Kommunikeer. Verduidelik aan jou ouers hoe hulle stryery jou laat voel. Kies ’n tyd wanneer jy dink hulle na jou sal luister en sê dan respekvol vir hulle hoe hulle bakleiery jou ontstel, kwaad maak of selfs bang laat voel.—Spreuke 15:23; Kolossense 4:6.

Wat jy nie moet doen nie

Moenie huweliksberader speel nie. As ’n jongmens is jy eenvoudig nie bevoeg om jou ouers se geskille op te los nie. Ter toeligting: Stel jou voor jy is ’n passasier in ’n klein vliegtuigie en jy hoor die vlieënier en die medevlieënier stry. Dis te verstane dat jy ontsteld sal wees. Maar wat sou gebeur as jy dit sommer op jou neem om vir die vlieëniers te sê hoe hulle die vliegtuig moet bestuur of selfs probeer om die stuur oor te neem?

So ook sal dit sake heel moontlik net vererger as jy ‘die stuur probeer oorneem’ deur jou in te meng met jou ouers se huweliksprobleme. Die Bybel sê: “Deur vermetelheid veroorsaak ’n mens net ’n stryd, maar by dié wat saam beraadslaag, is wysheid” (Spreuke 13:10). Jou ouers sal probleme dalk beter kan oplos as hulle sake privaat bespreek.—Spreuke 25:9.

Moenie betrokke raak nie. Twee mense wat stry, is al erg genoeg. Moenie nog ’n derde stem daarby voeg nie. Ongeag hoe graag jy dalk betrokke wil raak, die feit is dat dit jou ouers se verantwoordelikheid is om hulle verskille uit te stryk—nie joune nie. Strewe dus daarna om die Bybel se raad te volg om jou in sulke persoonlike aangeleenthede “met [jou] eie sake te bemoei” (1 Tessalonisense 4:11). Weier om betrokke te raak.

Moenie jou ouers teen mekaar uitspeel nie. Party jongmense veroorsaak in werklikheid dat hulle ouers stry deur hulle teen mekaar te stel. Wanneer Ma nee sê, speel hulle op Pa se gevoelens en probeer hulle hom sover kry om ja te sê. Met slim manipulasie kry jy dalk ’n bietjie vryheid, maar op die lange duur laat dit net die spanning in die gesin voortduur.

Moenie toelaat dat hulle gedrag jou gedrag beïnvloed nie. ’n Jong man met die naam Peter het besef dat hy deur onchristelike gedrag sy pa probeer terugbetaal het omdat hy hulle so sleg behandel het. “Ek wou hom seermaak”, sê Peter. “Ek het bitter gevoel teenoor hom vir die manier waarop hy my, my ma en my suster behandel het.” Maar kort voor lank moes Peter die gevolge van sy dade dra. Die les? Slegte gedrag sal die probleme wat jy by die huis het, net vererger.—Galasiërs 6:7.

Skryf hier neer aan watter van die punte in hierdie hoofstuk jy die hardste moet werk. ․․․․․

Dis duidelik dat jy nie kan keer dat jou ouers stry nie. Maar wees verseker dat Jehovah jou kan help om die ontsteltenis te verwerk wat hulle stryery vir jou veroorsaak.—Filippense 4:6, 7; 1 Petrus 5:7.

Doen jou bes om die wenke hierbo toe te pas. Mettertyd sal jou ouers hulle dalk daarop toelê om hulle probleme op te los. Wie weet—hulle hou dalk selfs heeltemal op om te stry.

SLEUTELTEKSTE

“Laat julle woorde altyd aangenaam wees.”—Kolossense 4:6.

WENK

As jou ouers herhaaldelik en hewig stry, kan jy respekvol voorstel dat hulle hulp probeer kry.

HET JY GEWEET . . . ?

Selfs mense wat mekaar liefhet, stem nie altyd met mekaar saam nie.

AKSIEPLAN!

Wanneer my ouers begin stry, sal ek ․․․․․

As my ouers my vra om kant te kies, sal ek sê ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom stry party ouers?

● Waarom is jou ouers se probleme nie jou skuld nie?

● Wat kan jy uit jou ouers se gedrag leer?

[Lokteks op bladsy 201]

Ek het besef dat my ouers nie volmaak is nie en dat hulle net soos ek probleme het, en dít help my om dit te hanteer wanneer hulle stry.’’—Kathy

[Venster/Prente op bladsy 206, 207]

Sê nou my ouers gaan uitmekaar?

Hoe kan jy verstandig optree as jou ouers uitmekaargaan, al is jy bitter ontsteld? Oorweeg die volgende wenke:

● Moenie valse verwagtinge koester nie. Jou eerste reaksie is dalk om jou ouers weer bymekaar te probeer kry. Anne vertel: “Nadat my ouers uitmekaargegaan het, het hulle ons nog steeds partykeer saam uitgeneem. Ek en my suster het dan vir mekaar gefluister: ‘Kom ons hardloop vooruit en los hulle twee alleen.’ Maar dit het nie gewerk nie. Hulle het nie weer bymekaargekom nie.”

Spreuke 13:12 sê: “’n Uitgestelde verwagting maak die hart siek.” Om te voorkom dat jy te ontsteld raak, onthou dat jy nie kan beheer wat jou ouers doen nie. Jy is nie die rede waarom hulle uitmekaargegaan het nie, en jy kan moontlik ook niks doen om hulle huwelik te red nie.—Spreuke 26:17.

● Moet hulle nie haat nie. Dit kan jou op die lange duur groot skade aandoen as jy woede en haat teenoor een of albei jou ouers in jou omdra. Tom onthou hoe hy gevoel het toe hy 12 was: “Ek was regtig baie kwaad vir my pa. Ek hou nie daarvan om die woord ‘haat’ te gebruik nie, maar ek het ’n vreeslike wrok gekoester. Ek kon nie insien dat hy vir ons kon omgee as hy ons verlaat het nie.”

Maar wanneer ouers uitmekaargaan, is dit selde ’n kwessie van die een wat heeltemal goed is en die ander een wat heeltemal sleg is. Die feit is, jou ouers het jou moontlik nie alles vertel omtrent hulle huwelik of hoekom dit verbrokkel het nie; hulle verstaan dit dalk self nie. Moet dus nie ’n opinie vorm as jy nie al die feite het nie (Spreuke 18:13). Toegegee, dis moeilik om nie kwaad te wees nie, en dis net natuurlik dat jy ’n tyd lank hewig ontsteld sal wees. Maar as jy woedend en hatig bly, kan dit jou persoonlikheid geleidelik vergiftig. Die Bybel sê met goeie rede vir ons: “Laat staan die toorn en laat vaar die woede.”—Psalm 37:8.

● Wees realisties. Party jongmense haat nie die ouer wat hulle verlaat het nie; hulle gaan oor na die ander uiterste en verafgod hom of haar. Byvoorbeeld, een jong man se pa was ’n alkoholis en ’n vrouejagter wat die gesin dikwels verlaat en uiteindelik van sy ma geskei het. Maar hierdie jong man onthou dat hy sy pa om die een of ander rede feitlik aanbid het!

Sulke misplaaste verering is nie ongewoon nie. In een land woon omtrent 90 persent van die kinders van geskeide ouers by hulle ma en besoek hulle hulle pa. Gevolglik is dit dikwels die ma wat verantwoordelik is vir die daaglikse versorging van haar kinders—insluitende dissipline. En al ontvang die ma dalk geldelike onderhoud, gaan dit gewoonlik finansieel baie slegter met haar ná die egskeiding. Aan die ander kant verbeter die pa se posisie dalk. Die gevolg: ’n Besoek aan Pa beteken geskenke en hope pret! Die lewe saam met Ma beteken dat elke sent omgedraai moet word en dat jy die hele tyd gesê word wat jy moet en nie moet doen nie. Ongelukkig het party jongmense ’n Christenouer verlaat en by ’n ongelowige ouer gaan bly wat ryker is en hulle meer toelaat.—Spreuke 19:4.

As jy in die versoeking kom om so iets te doen, ondersoek jou prioriteite. Onthou dat jy sedelike leiding en dissipline nodig het. Niks anders wat ’n ouer jou kan gee, sal so ’n groot uitwerking op jou karakter en die gehalte van jou lewe hê nie. —Spreuke 4:13.

[Prent op bladsy 202, 203]

’n Jong persoon wat vir sy ouers sê hoe hulle hulle geskille moet oplos, is soos ’n passasier wat vir die vlieëniers sê hoe hulle die vliegtuig moet bestuur