Hoofstuk 4

Waarom het my pa en ma uitmekaar gegaan?

“Ek was by die huis saam met my ma toe my pa ons verlaat het. Ek was net ses jaar oud en het nie verstaan wat aangaan nie. Ek het op die vloer gesit en TV kyk, en ek kon hoor hoe my ma huil en hoe sy my pa smeek om te bly. Hy het met sy tas na my toe gekom, afgebuk, my gesoen en gesê: ‘Pappa sal altyd lief wees vir jou.’ Toe het hy by die deur uitgeloop. ’n Lang tyd het verbygegaan voordat ek my pa weer gesien het. Van toe af was ek bang dat my ma ook sou weggaan.”—Elaine, 19.

AS JOU ouers skei, kan dit vir jou soos die einde van die wêreld voel, ’n ramp wat soveel hartseer veroorsaak dat dit voel of dit vir altyd sal duur. Dit wek dikwels gevoelens van skaamte, woede, angs, vrees om in die steek gelaat te word, skuld, depressie en ’n swaar verlies—selfs ’n begeerte om wraak te neem.

As jou ouers onlangs uitmekaar is, voel jy dalk ook so, en dit is natuurlik, want ons Skepper het bedoel dat kinders deur ’n pa sowel as ’n ma grootgemaak moet word (Efesiërs 6:1-3). Nou is ’n ouer vir wie jy dalk baie lief is, nie meer deel van jou daaglikse lewe nie. “Ek het regtig na my pa opgesien en wou by hom wees”, sê Daniel, wie se ouers uitmekaar is toe hy sewe was. “Maar my ma het toesig oor ons gekry.”

Waarom ouers uitmekaar gaan

Wanneer ouers uitmekaar gaan, is dit dikwels ’n skok vir die kinders omdat die ouers hulle probleme so goed weggesteek het. “Ek was uit die veld geslaan”, sê Rachel, wat 15 was toe haar ouers geskei het. “Ek het altyd gedink dat hulle vir mekaar lief is.” Selfs al stry ouers, kan dit nog steeds ’n skok wees wanneer hulle wel uitmekaar gaan!

In baie gevalle gaan hulle uitmekaar omdat een ouer skuldig is aan seksuele wangedrag. Onder hierdie omstandighede laat God die onskuldige huweliksmaat wel toe om te skei en weer te trou (Matteus 19:9). In ander gevalle ontaard “gramskap en geskreeu en smadende taal” in geweld, sodat die een ouer vrees dat hy of sy asook die kinders fisies leed aangedoen sal word.—Efesiërs 4:31.

Dit is so dat party egpare om minder geldige redes uitmekaar gaan. Pleks van hulle probleme op te los, skei sommige uit selfsug en sê hulle dat hulle “ongelukkig” is of “nie meer vir mekaar lief” is nie. Dit mishaag God, wat hierdie soort ‘egskeiding haat’ (Maleagi 2:16). Jesus het aangedui dat party gesinne dalk sal verbrokkel wanneer een van die huweliksmaats ’n Christen word.—Matteus 10:34-36.

Wat die geval ook al is, die feit dat jou ouers dalk besluit het om stil te bly of jou vrae oor die egskeiding net vaagweg te beantwoord, beteken nie dat hulle jou nie liefhet nie. Dit is dalk vir jou ouers moeilik om oor die egskeiding te praat omdat hulle self deur pyn oorweldig word (Spreuke 24:10). Hulle kan dit ook moeilik en pynlik vind om hulle foute te erken.

Wat jy kan doen

Identifiseer jou vrese. Omdat ’n egskeiding jou wêreld onderstebo kan keer, is jy miskien nou bekommerd oor dinge wat jy voorheen as vanselfsprekend aanvaar het. Maar jy sal jou vrese dalk beter kan hanteer en in die regte perspektief kan sien nadat jy dit geïdentifiseer het. Maak ’n ✔ hieronder langs jou grootste vrees, of skryf jou grootste vrees langs “Ander” neer.

□ My ander ouer gaan my ook verlaat.

□ My gesin sal nie genoeg geld hê om kop bo water te hou nie.

□ Om die een of ander rede is die egskeiding my skuld.

□ As ek trou, sal mý huwelik misluk.

□ Ander ․․․․․

Praat oor jou bekommernisse. Koning Salomo het gesê dat daar “’n tyd [is] om te praat” (Prediker 3:7). Probeer dus die regte tyd kies om met jou ouers te praat oor die vrese wat jy hierbo geïdentifiseer het. Vertel hulle hoe hartseer en verward jy is. Miskien sal hulle vir jou kan verduidelik wat aangaan en jou sodoende minder angstig laat voel. As jou ouers jou nie die ondersteuning kan of wil gee wat jy op die oomblik nodig het nie, kan jy dalk ’n geestelik volwasse vriend in jou vertroue neem. Neem die inisiatief om met so ’n persoon te praat. Net die feit dat iemand na jou luister, kan groot verligting bring.—Spreuke 17:17.

Bowenal kan jy ’n horende oor vind by jou hemelse Vader, die “Hoorder van die gebed” (Psalm 65:2). Stort jou hart voor hom uit, “want hy sorg vir [jou]”.—1 Petrus 5:7.

Wat om nie te doen nie

Moenie ’n wrok koester nie. “My ouers was selfsugtig”, sê Daniel, wat vroeër aangehaal is. “Hulle het nie werklik aan ons gedink en hoe hulle dade ons sou raak nie.” Dit is te verstane dat Daniel so voel, en wat hy sê, is dalk waar. Maar hoe sou jy die volgende vrae beantwoord? Skryf jou antwoorde hieronder neer.

Hoe sal Daniel homself benadeel as hy nie sy woede en gegriefdheid oorkom nie? (Lees Spreuke 29:22.) ․․․․․

Waarom sal dit goed wees vir Daniel om sy ouers te probeer vergewe vir die feit dat hulle hom seergemaak het, selfs al sal dit moeilik wees? (Lees Efesiërs 4:31, 32.) ․․․․․

Hoe kan die grondwaarheid in Romeine 3:23 Daniel help om ’n realistiese beskouing van sy ouers te hê? ․․․․․

Vermy selfvernietigende gedrag. “Ek was ongelukkig en terneergedruk ná my ouers se egskeiding”, vertel Denny. “Ek het probleme op skool begin ondervind en het een jaar gedruip. Daarna . . . het ek die hanswors in die klas geword en baie baklei.”

Wat dink jy het Denny laat besluit om die hanswors in die klas te word? ․․․․․

Waarom het hy baie begin baklei? ․․․․․

Dalk het jy al gevoel dat jy jou ouers wil straf deur jou sleg te gedra. Hoe kan die beginsel in Galasiërs 6:7 jou help om die regte perspektief te behou?

Wat om in die toekoms te verwag

’n Letterlike besering, soos ’n gebreekte been, kan weke of selfs maande neem om heeltemal te genees. Net so is tyd nodig vir emosionele wonde om te genees. Party deskundiges meen dat die ergste gevolge van ’n egskeiding binne drie jaar verby is. Dit klink dalk lank, maar onthou, baie moet gebeur voordat jou lewe kan stabiliseer.

Om maar een ding te noem, die huishoudelike roetine—wat deur die egskeiding ontwrig is—moet herstel word. Dit sal ook ’n ruk duur voordat jou ouers emosioneel herstel het. Eers dan sal hulle dalk in staat wees om jou uiteindelik die nodige ondersteuning te gee. Namate jou lewe weer begin stabiliseer, sal jy weer normaal begin voel.

LEES MEER OOR HIERDIE ONDERWERP IN DEEL 2, HOOFSTUK 25

SLEUTELTEKSTE

Daar is ’n tyd om te genees.—Prediker 3:1, 3.

WENK

As jou ouers geskei het, het een of heel moontlik albei van hulle foute gemaak. Probeer om daardie foute te identifiseer sodat jy dit kan vermy as jy eendag besluit om te trou.—Spreuke 27:12.

HET JY GEWEET . . . ?

Ongelukkigheid in die huwelik is nie iets wat jy van jou ouers kan erf nie.

AKSIEPLAN!

Iemand met wie ek oor my vrese kan praat, is (skryf die naam van ’n volwasse persoon neer met wie jy wil praat) ․․․․․

As ek voel dat ek my ouers wil straf deur my sleg te gedra, kan ek my beheers deur die volgende te doen: ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom wil jou ouers dalk nie met jou oor hulle egskeiding praat nie?

● Waarom is dit belangrik om te onthou dat egskeiding ’n onenigheid tussen jou ouers is—nie tussen hulle en jou nie?

[Lokteks op bladsy 32]

Nadat my ma ons verlaat het, was ek neerslagtig en het ek elke dag gehuil. Maar ek het gereeld gebid, besig gebly deur ander te help en na aan volwasse vriende gebly. Ek voel dat Jehovah God my hierdeur gehelp het om die mas op te kom.’’—Natalie

[Prent op bladsy 33]

Om jou ouers se egskeiding te verwerk, is soos om te herstel nadat jy jou arm gebreek het dit is pynlik, maar jy sal uiteindelik genees