Hoofstuk 12
Hoe kan ek my selfvertroue opbou?
Ja Nee
Hou jy van wat jy sien wanneer □ □
jy in die spieël kyk?
Dink jy dat jy prysenswaardige □ □
vaardighede het?
Kan jy portuurdruk weerstaan? □ □
Kan jy geldige kritiek hanteer? □ □
Kan jy onregverdige aanmerkings wat □ □
ander oor jou maak, hanteer?
Voel jy geliefd? □ □
Sien jy om na jou gesondheid? □ □
Is jy saam met ander bly wanneer hulle sukses behaal? □ □
Beskou jy jouself oor die algemeen as suksesvol? □ □
As jy nee geantwoord het op ’n hele paar van die vrae hierbo, het ’n gebrek aan selfvertroue jou moontlik verblind vir jou sterk punte. Hierdie hoofstuk sal jou help om dit te ontdek!
DIE meeste jongmense voel onseker oor hulle voorkoms en hulle vermoëns, asook hoe hulle met ander vergelyk. Val jy in hierdie kategorie? Indien wel, is jy nie alleen nie!
“My onvolmaakthede laat my mismoedig voel. Gewoonlik is ék my grootste kritikus.”—Leticia.
“Maak nie saak hoe mooi of aantreklik ’n mens is nie, jy sien altyd ander wat mooier of aantrekliker is.”—Haley.
“Ek word baie selfbewus in ander se geselskap. Ek is bang hulle sal dink ek is ’n mislukking.”—Rachel.
As jy jou met die stellings hierbo kan vereenselwig, moet jy nie moed opgee nie. Jy kan hulp kry. Kyk na drie dinge wat jou meer selfvertroue sal gee en jou sal help om jouself in ’n positiewer lig te beskou.
Gee van jouself
Sleutelteks. “Dit verskaf groter geluk om te gee as om te ontvang.”—Handelinge 20:35.
Wat dit beteken. Wanneer jy ander help, help jy jouself. Hoe? “Vrygewigheid sal beloon word”, sê ’n Bybelspreuk. “Gee ’n glas water, en jy sal ’n glas water ontvang” (Spreuke 11:25, Contemporary English Version). Dit kan nie ontken word nie—jy voel gelukkiger wanneer jy ander help!a
“Ek dink aan wat ek vir ander kan doen en probeer help as iemand in my gemeente hulp nodig het. As ek liefde en aandag aan ander gee, laat dit my beter voel.”—Breanna.
“Die Christelike bediening is lonend, want dit dwing jou om op te hou om aan jouself te dink en om aan ander te begin dink.”—Javon.
Waarskuwing: Moenie ander help bloot om iets in ruil daarvoor te kry nie (Matteus 6:2-4). Dit help nie om met die verkeerde beweegrede te gee nie. Mense sien dit gewoonlik vir wat dit is—net ’n skyn van opregtheid!—1 Tessalonisense 2:5, 6.
Jou beurt. Dink aan iemand wat jy in die verlede gehelp het. Wie was dit, en wat het jy vir hom of haar gedoen?
․․․․․
Hoe het jy daarna gevoel?
․․․․․
Dink aan iemand anders wat jy kan help, en skryf neer hoe jy dit kan doen.
․․․․․
Maak vriende
Sleutelteks. “’n Ware metgesel het te alle tye lief en is ’n broer wat gebore word vir die tyd wanneer daar benoudheid is.”—Spreuke 17:17.
Wat dit beteken. ’n Goeie vriend kan gedurende moeilike tye ’n baie groot hulp wees (1 Samuel 18:1; 19:2). Selfs net die wete dat iemand vir jou omgee, kan jou beter laat voel (1 Korintiërs 16:17, 18). Daarom moet jy vriende maak met mense wat ’n positiewe invloed op jou het.
“Ware vriende sal nie toelaat dat jy terneergedruk bly nie.”—Donnell.
“Partykeer is die belangrikste ding die wete dat iemand opreg vir jou omgee. Dit kan jou waardevol laat voel.”—Heather.
Waarskuwing: Maak seker dat jou vriende jou ware persoonlikheid na vore bring—nie ’n karakter wat jy skep net om in te pas nie (Spreuke 13:20; 18:24; 1 Korintiërs 15:33). As jy onverstandige dinge doen net om ander te beïndruk, sal jy later verneder en gebruik voel.—Romeine 6:21.
Jou beurt. Skryf die naam van ’n vriend(in) hieronder neer wat jou kan help om jou selfvertroue op ’n heilsame manier op te bou.
․․․․․
Kan jy reël om meer tyd saam met hierdie persoon deur te bring?—Let wel: Die persoon hoef nie in jou ouderdomsgroep te wees nie.
Moenie toelaat dat jou foute jou onderkry nie
Sleutelteks. “Almal het gesondig en skiet te kort aan die heerlikheid van God.”—Romeine 3:23.
Wat dit beteken. Een ding is seker—jy is onvolmaak. Dit beteken dat jy soms die verkeerde ding sal sê of selfs sal doen (Romeine 7:21-23; Jakobus 3:2). Jy kan foute nou wel nie vermy nie, maar jy kan beheer hoe jy daarop reageer. Die Bybel sê: “Selfs as goeie mense sewe keer val, sal hulle weer opstaan.”—Spreuke 24:16, CEV.
“Wanneer ons ons swakhede met iemand anders se sterk punte vergelyk, kan dit ons ’n swak selfbeeld gee.”—Kevin.
“Almal het goeie en slegte eienskappe. Ons moet trots wees op die goeies en werk aan die slegtes.”—Lauren.
Waarskuwing: Moenie jou onvolmaaktheid gebruik as ’n verskoning om sonde te beoefen nie (Galasiërs 5:13). As jy opsetlik verkeerde dinge doen, sal jy die belangrikste goedkeuring wat jy kan geniet, verloor—dié van Jehovah God!—Hebreërs 10:26, 27.
Jou beurt. Skryf ’n eienskap hieronder neer waarin jy graag wil verbeter.
․․․․․
Skryf vandag se datum langs die eienskap neer. Doen navorsing oor hoe om daarin te verbeter, en kyk oor ’n maand hoeveel vordering jy gemaak het.
Jou werklike waarde
Die Bybel sê: “God is groter as ons hart” (1 Johannes 3:20). Dit beteken onder andere dat hy iets waardevols in jou kan sien wat jy dalk nie in jouself sien nie. Maar verander jou onvolmaakthede hierdie feit? Wel, stel jou voor dat jy ’n R100-noot het met ’n klein skeurtjie daarin. Sou jy dit weggooi of dit as waardeloos beskou omdat dit geskeur is? Glad nie! Dit is nog steeds R100 werd—met of sonder ’n skeur.
Dit geld ook vir God se beskouing van jou waarde. Jou foute verblind hom nie vir jou waarde nie. Hy sien en waardeer jou pogings om hom te behaag, ongeag hoe klein dit dalk vir jou lyk! Ja, die Bybel verseker ons: “God is nie onregverdig sodat hy julle werk sal vergeet en die liefde wat julle vir sy naam getoon het [nie].”—Hebreërs 6:10.
Voel jy soms verskriklik hartseer? Indien wel, wat kan jy daaromtrent doen?
[Voetnoot]
a As jy een van Jehovah se Getuies is, dink aan die groot vreugde wat jy kan smaak deur die Koninkryksboodskap aan ander te verkondig.—Jesaja 52:7.
SLEUTELTEKSTE
“Laat elkeen sy eie werk op die proef stel, en dan sal hy net met betrekking tot homself rede tot vreugde hê, en nie in vergelyking met die ander persoon nie.”—Galasiërs 6:4.
WENK
Moenie vir jouself dinge sê soos: ‘Ek misluk altyd’ of ‘Ek kan niks reg doen nie’. Sulke oordrywings laat jou net terneergedruk bly. Hoewel jy jou tekortkominge moet erken, moet jy ook jou sterk punte erken.
HET JY GEWEET . . . ?
Hoe jy jouself beskou, kan ’n uitwerking hê op hoe ander jou beskou . . . en selfs behandel.
AKSIEPLAN!
Wanneer my portuurs my kritiseer, sal ek ․․․․․
Wanneer ek agterkom dat ek net my swakhede raaksien, sal ek ․․․․․
Wat ek graag vir my ouer(s) hieroor wil vra ․․․․․
WAT DINK JY?
● Waarom kan veral jongmense geneig wees om te min selfvertroue te hê?
● Waarom is dit belangrik om ’n gesonde mate van selfrespek te hê?
[Lokteks op bladsy 88]
Iemand kan baie mooi wees en nog steeds lelik voel. Of iemand kan nie so aantreklik wees nie en dink dat hy of sy die mooiste persoon op aarde is. Dit het alles te doen met ’n mens se gesindheid.’’—Alyssa
[Prent op bladsy 90]]
Die waarde van geld neem nie af omdat dit geskeur is nie. Net so neem jou waarde in God se oë nie af omdat jy onvolmaak is nie