Jongmense vra

Hoe kan ek my selfrespek opbou?

JA | NEE

Hou jy van wat jy sien wanneer jy in die spieël kyk?

Dink jy dat jy prysenswaardige vaardighede het?

Kan jy portuurdruk weerstaan?

Kan jy geldige kritiek hanteer?

Kan jy onregverdige aanmerkings wat ander oor jou maak, hanteer?

Voel jy geliefd?

Sien jy om na jou gesondheid?

Is jy saam met ander bly wanneer hulle suksesvol is?

Beskou jy jouself oor die algemeen as suksesvol?

As jy nee geantwoord het op ’n hele paar van die vrae hierbo, het ’n gebrek aan selfrespek jou moontlik vir jou sterk punte verblind. Hierdie artikel sal jou help om dit te ontdek!

DIE meeste jongmense voel onseker oor hulle voorkoms en hulle vermoëns, asook hoe hulle met ander vergelyk. Val jy in hierdie kategorie? Indien wel, is jy nie alleen nie!

● “My onvolmaakthede laat my mismoedig voel. Gewoonlik is ek my grootste kritikus.”—Leticia.a

● “Maak nie saak hoe mooi of aantreklik ’n mens is nie, jy sien altyd ander wat mooier of aantrekliker is.”—Haley.

● “Ek word baie selfbewus in ander se geselskap. Ek is bang hulle sal dink ek is ’n mislukking.”—Rachel.

As jy jou kan vereenselwig met die stellings hierbo, moet jy nie moed opgee nie. Jy kan hulp kry. Kyk na drie dinge wat jou selfrespek kan opbou en jou sal help om jouself in ’n positiewer lig te beskou.

1. Maak vriende

Sleutelteks. “’n Ware metgesel het te alle tye lief en is ’n broer wat gebore word vir die tyd wanneer daar benoudheid is.”—Spreuke 17:17.

Wat dit beteken. ’n Goeie vriend kan ’n baie groot hulp gedurende moeilike tye wees (1 Samuel 18:1; 19:2). Selfs net die wete dat iemand vir jou omgee, kan jou beter laat voel (1 Korintiërs 16:17, 18). Daarom moet jy vriende maak met dié wat ’n positiewe invloed op jou het.

“Ware vriende sal nie toelaat dat jy terneergedruk bly nie.”—Donnell.

“Partykeer is die belangrikste ding die wete dat iemand opreg vir jou omgee. Dit kan jou waardevol laat voel.”—Heather.

Waarskuwing: Maak seker dat jou vriende jou ware persoonlikheid na vore bring—nie ’n karakter wat jy skep net om in te pas nie (Spreuke 13:20; 18:24; 1 Korintiërs 15:33). As jy onverstandige dinge doen net om ander te beïndruk, sal jy later verneder en gebruik voel.—Romeine 6:21.

Jou beurt. Skryf die naam van ’n vriend(in) hieronder neer wat jou kan help om jou selfrespek op te bou.

․․․․․

Kan jy reël om meer tyd saam met hierdie persoon deur te bring? Let wel: Die persoon hoef nie in jou ouderdomsgroep te wees nie.

2. Gee van jouself

Sleutelteks. “Dit verskaf groter geluk om te gee as om te ontvang.”—Handelinge 20:35.

Wat dit beteken. Wanneer jy ander help, help jy jouself. Hoe? “Vrygewigheid sal beloon word”, sê ’n Bybelspreuk. “Gee ’n glas water, en jy sal ’n glas water ontvang” (Spreuke 11:25, Contemporary English Version). Dit kan nie ontken word nie—jy voel gelukkiger wanneer jy ander help!b

“Ek dink aan wat ek vir ander kan doen en probeer help as iemand in my gemeente hulp nodig het. As ek liefde en aandag aan ander gee, laat dit my beter voel.”—Breanna.

“Die Christelike bediening is lonend, want dit dwing jou om op te hou om aan jouself te dink en aan ander te begin dink.”—Javon.

Waarskuwing: Moenie ander help bloot om iets in ruil te kry nie (Matteus 6:2-4). Dit help nie om met die verkeerde beweegrede te gee nie. Dit word gewoonlik gesien vir wat dit is—’n skyn van opregtheid!—1 Tessalonisense 2:5, 6.

Jou beurt. Dink aan iemand wat jy in die verlede gehelp het. Wie was dit, en wat het jy vir hom of haar gedoen?

․․․․․

Hoe het jy daarna gevoel?

․․․․․

Dink aan iemand anders wat jy kan help, en skryf neer hoe jy dit kan doen.

․․․․․

3. Moenie toelaat dat jou foute jou onderkry nie

Sleutelteks. “Almal het gesondig en skiet te kort aan die heerlikheid van God.”—Romeine 3:23.

Wat dit beteken. Een ding is seker—jy is onvolmaak. Dit beteken dat jy soms die verkeerde ding sal sê of selfs sal doen (Romeine 7:21-23; Jakobus 3:2). Jy kan foute nou wel nie vermy nie, maar jy kan beheer hoe jy daarop reageer. Die Bybel sê: “Selfs as goeie mense sewe keer val, sal hulle weer opstaan.”—Spreuke 24:16, CEV.

“Soms dink ons min van onsself wanneer ons ons swakhede met iemand anders se sterk punte vergelyk.”—Kevin.

“Almal het goeie en slegte eienskappe. Ons moet trots wees op die goeies en werk aan die slegtes.”—Lauren.

Waarskuwing: Moenie jou onvolmaaktheid as ’n verskoning gebruik om sonde te beoefen nie (Galasiërs 5:13). As jy opsetlik verkeerde dinge doen, sal jy die belangrikste goedkeuring wat jy kan geniet, verloor—dié van Jehovah God!—Romeine 1:24, 28.

Jou beurt. Skryf ’n eienskap hieronder neer waarin jy graag wil verbeter.

․․․․․

Skryf vandag se datum langs die eienskap neer. Doen navorsing oor hoe om daarin te verbeter, en kyk oor ’n maand hoeveel vordering jy gemaak het.

Jou werklike waarde

Die Bybel sê: “God is groter as ons hart” (1 Johannes 3:20). Dit beteken dat hy iets waardevols in jou kan sien wat jy dalk nie in jouself sien nie. Maar verander jou onvolmaakthede die situasie? Wel, stel jou voor dat jy ’n R100-noot het met ’n klein skeurtjie daarin. Sou jy dit weggooi of dit as waardeloos beskou omdat dit geskeur is? Glad nie! Dit is nog steeds R100 werd—met of sonder ’n skeur.

Dit is ook so met God se beskouing van jou waarde. Hy sien en waardeer jou pogings om hom te behaag, ongeag hoe klein dit dalk vir jou lyk! Ja, die Bybel verseker ons: “God is nie onregverdig sodat hy julle werk sal vergeet en die liefde wat julle vir sy naam getoon het [nie].”—Hebreërs 6:10.

Nog artikels uit die reeks “Jongmense vra” kan gevind word op die webwerf www.watchtower.org/ype

[Voetnote]

IETS OM OOR TE DINK

Wat sal jy doen as jy terneergedruk begin voel omdat

● Jou portuurs jou kritiseer?

● Jy dink dat jy nie so goed soos ander is nie?

● Jy dalk net jou swakhede raaksien?

[Lokteks op bladsy 27]

“Iemand kan baie mooi wees en nog steeds lelik voel. Of iemand kan nie so aantreklik wees nie en dink dat hy of sy die mooiste persoon op aarde is. Dit het alles te doen met ’n mens se gesindheid.”—Alyssa

[Venster/Prente op bladsy 27]

WAT JOU PORTUURS SÊ

“Selfs die sterkste gebou moet ondersteun en soms herstel word. My ondersteuning het dikwels gekom van die liefdevolle woorde van ’n vriend of selfs net ’n glimlag of ’n drukkie.”

“In plaas daarvan om sleg te voel oor ander se goeie eienskappe, kan ons by hulle goeie eienskappe baat vind—net soos hulle by ons s’n kan baat vind.”

[Prente]

Aubrey

Lauren

[Prent op bladsy 28]

Die waarde van geld neem nie af omdat dit geskeur is nie. Net so neem jou waarde in God se oë nie af omdat jy onvolmaak is nie