Hoofstuk 32

Hoe kan ek my teen seksuele uitbuiters beskerm?

Elke jaar word miljoene mense verkrag of op ander maniere seksueel misbruik, en navorsing toon dat jongmense ’n vername teiken is. Daar word byvoorbeeld geskat dat omtrent die helfte van alle slagoffers van verkragting in die Verenigde State jonger as 18 is. Omdat seksuele misbruik so algemeen is, is dit belangrik dat jy hierdie onderwerp ondersoek.

“Voordat ek besef het wat gebeur, het hy my gegryp en my op die grond neergegooi. Ek het hard teen hom baklei. Ek het ’n kannetjie pepersproei uitgehaal, maar hy het dit uit my hand gestamp. Ek het probeer skreeu, maar kon nie ’n woord uitkry nie. Ek het gestamp en gestoot, geskop, geslaan en gekrap. En toe het ek gevoel hoe ’n mes in my vel wegsink. Ek was verlam van vrees.”—Annette.

SEKSUELE uitbuiters word vandag oral gevind, en jongmense is dikwels hulle teiken. Party jongmense, soos Annette, word deur ’n vreemdeling aangeval. Ander word deur iemand in hulle buurt gemolesteer. Dit is wat gebeur het met Natalie, wat net 10 jaar oud was toe ’n tiener wat naby hulle huis gewoon het, haar seksueel gemolesteer het. “Ek was so bang en skaam dat ek eers vir niemand vertel het nie”, sê sy.

Baie jongmense is al deur ’n familielid gemolesteer. “Ek is tussen die ouderdom van 5 en 12 deur my pa gemolesteer”, sê ’n vrou met die naam Carmen. “Toe ek 20 was, het ek hom uiteindelik daaroor gekonfronteer. Hy het gesê dat hy jammer is, maar ’n paar maande later het hy my uit die huis geskop.”

Seksuele misbruik deur iemand in die buurt, ’n vriend of ’n familielid is vandag ontstellend algemeen.a Maar die uitbuiting van jongmense is niks nuuts nie. Sulke afstootlike dinge het selfs plaasgevind in die dae toe die Bybel geskryf is (Joël 3:3; Matteus 2:16). Vandag lewe ons in kritieke tye. Mense het geen “natuurlike geneentheid” nie, en meisies (en selfs seuns) word dikwels seksueel misbruik (2 Timoteus 3:1-3). Hoewel geen veiligheidsmaatreël jou veiligheid sal waarborg nie, is daar baie wat jy wel kan doen om jou te beskerm. Kyk na die volgende wenke:

Wees wakker. As jy op straat is, moet jy let op wat voor jou, agter jou en weerskante van jou gebeur. Sommige gebiede is daarvoor bekend dat dit gevaarlik is, veral saans. Probeer sulke gebiede sover moontlik vermy of maak ten minste seker dat jy nie alleen is nie.—Spreuke 27:12.

Moenie verwarrende boodskappe uitstuur nie. Moenie flirt of uitlokkende klere dra nie. Dit kan die boodskap uitstuur dat jy in seks belangstel—of ten minste dat jy geen beswaar daarteen sal hê nie.—1 Timoteus 2:9, 10.

Praat oor perke. As jy met iemand uitgaan, moet julle bespreek watter gedrag gepas en watter gedrag ongepas is.b Wanneer jy perke gestel het, moet jy situasies vermy waarin jy seksueel misbruik kan word.—Spreuke 13:10.

Moenie stilbly nie. Daar is niks daarmee verkeerd nie om ferm te sê: “Moenie dit doen nie!” of “Vat jou hand van my af!” Moenie stilbly omdat jy bang is dat jy jou kêrel sal verloor nie. As hy jou hieroor afsê, is hy nie die moeite werd nie! Jy verdien immers ’n ware man, een wat jou liggaam en jou beginsels respekteer.c

Wees versigtig wanneer jy op die Internet is. Moet nooit persoonlike inligting bekend maak of foto’s op die Internet plaas wat verklap waar jy woon nie.d As jy ’n seksueel eksplisiete boodskap ontvang, is die beste antwoord gewoonlik geen antwoord nie. Absolute stilte maak dit gewoonlik vir uitbuiters op die Internet onmoontlik om jou te bereik.

Die voorgenoemde stappe kan jou in ’n mate teen seksuele misbruik beskerm (Spreuke 22:3). Maar ’n mens moet realisties wees en besef dat jy miskien nie altyd ten volle in beheer van jou omstandighede sal wees nie. Byvoorbeeld, jy sal dalk nie altyd gevaarlike gebiede kan vermy of iemand hê wat jou kan vergesel nie. Jy woon miskien selfs in ’n gevaarlike gebied.

Dalk het jy al uit bittere ondervinding geleer dat slegte dinge kan gebeur ondanks jou pogings om moeilikheid te vermy. Soos Annette, wat in die begin aangehaal is, is jy dalk onkant gevang en fisies oorweldig. Of soos Carmen is jy dalk as ’n kind gemolesteer en was jy dus magteloos om die situasie te beheer—of dalk het jy selfs nie heeltemal verstaan wat gebeur nie. Hoe kan jy die skuldgevoelens verwerk waardeur diegene wat seksueel misbruik is, dikwels geteister word?

Hoe om skuldgevoelens te verwerk

Annette voel nog steeds skuldig oor wat gebeur het. “Ék is my grootste vyand”, sê sy. “Die gebeure van daardie aand speel oor en oor in my gedagtes af. Dit voel asof ek harder teen hom moes baklei het. Maar nadat hy my met die mes gesteek het, was ek lam van vrees. Ek kon niks verder doen nie, maar ek voel ek moes.”

Natalie worstel ook met skuldgevoelens. “Ek moes ander mense nie so maklik vertrou het nie”, sê sy. “My ouers het gesê dat ek en my suster bymekaar moet bly as ons buite speel, maar ek het nie geluister nie. Daarom voel dit asof ek daardie seun die geleentheid gegee het om my seer te maak. Wat gebeur het, het my gesin geraak, en ek voel dis my skuld dat hulle soveel pyn moes deurmaak. Dit is waarmee ek die meeste sukkel.”

Hoe kan jy jou skuldgevoelens verwerk as jy soos Annette of Natalie voel? As jy verkrag is, moet jy altyd probeer onthou dat jy nie gewillig seks gehad het nie. Party mense neem hierdie saak ligtelik op en gebruik die verskoning dat “seuns maar seuns sal bly” en dat meisies wat verkrag word, daarna gesoek het. Maar niemand verdien om verkrag te word nie. As jy die slagoffer van so ’n verskriklike daad was, onthou: Dit is nie jou skuld nie!

Dit is natuurlik maklik om die woorde “dit is nie jou skuld nie” te lees, maar dit is dalk baie moeiliker om dit te glo. Party mense krop alles op en word geteister deur skuldgevoelens en ander negatiewe emosies. Maar wie trek die meeste voordeel daaruit as jy stilbly—jy of die verkragter? Jy is dit aan jouself verskuldig om ’n ander opsie te oorweeg.

Vertel iemand wat gebeur het

Die Bybel vertel ons dat die regverdige man Job, toe hy die moeilikste tyd in sy lewe deurgemaak het, gesê het: “Ek sal uiting gee aan my besorgdheid oor myself. Ek sal in die bitterheid van my siel praat!” (Job 10:1). Dit sal vir jou goed wees om dit ook te doen. As jy iemand wat jy kan vertrou, vertel wat gebeur het, kan dit jou met verloop van tyd help om die verkragting te verwerk en verligting van jou ontstellende emosies te kry.

Wat meer is, as jy ’n Christen is, is dit belangrik dat jy met ’n gemeentelike ouer man praat oor wat gebeur het. Die vertroostende woorde van ’n liefdevolle herder kan jou verseker dat jy, as ’n slagoffer van verkragting, nie deur iemand anders se sonde besoedel is nie. Dit is wat Annette ondervind het. Sy sê: “Ek het met ’n goeie vriendin gepraat, en sy het my aangemoedig om met ’n paar Christen- ouer manne in my gemeente te praat. Ek is bly dat ek dit gedoen het. Hulle het ’n paar keer met my gesels en vir my gesê presies wat ek moes hoor—dat wat gebeur het, nie my skuld was nie. Geen deel daarvan was my skuld nie.”

As jy praat oor wat gebeur het en sê hoe jy voel, kan dit keer dat jy deur woede en gegriefdheid verteer word (Psalm 37:8). Dit kan jou ook help om verligting te kry, dalk vir die eerste keer in jare. Dit is hoe Natalie gevoel het nadat sy vir haar ouers vertel het dat sy seksueel gemolesteer is. “Hulle het my ondersteun”, sê sy. “Hulle het my aangemoedig om daaroor te praat, en dit het my gehelp om nie so hartseer en kwaad te wees nie.” Natalie het ook gevind dat gebed vir haar vertroosting gebring het. “Om met God te praat, het my baie gehelp”, sê sy, “veral wanneer ek gevoel het dat ek met niemand anders kon praat nie. Wanneer ek bid, kan ek vryelik praat. Dit gee my werklik ’n gevoel van vrede en kalmte.”e

Daar kan ook vir jou ’n tyd vir genesing wees (Prediker 3:3). Steun op simpatieke vriende wat, soos die ouer manne, vergelyk kan word met “’n skuilplek teen die wind en ’n skuiling teen die reënstorm” (Jesaja 32:2). Sien fisies en emosioneel na jouself om. Kry die nodige rus. En vertrou bowenal op die God van alle vertroosting, Jehovah, wat binnekort ’n nuwe wêreld sal bring. Die Bybel belowe: “Die kwaaddoeners sal uitgeroei word, maar dié wat op Jehovah hoop, hulle sal die aarde besit.”—Psalm 37:9.

[Voetnote]

SLEUTELTEKSTE

“In die laaste dae [sal daar] kritieke tye . . . wees wat moeilik is om deur te kom. Want mense sal liefhebbers van hulleself wees, . . . sonder natuurlike geneentheid, . . . sonder selfbeheersing, wreedaardig, sonder liefde vir die goeie.”—2 Timoteus 3:1-3.

WENK

As jy seksueel misbruik was, kan jy ’n lys Bybelverse byderhand hou wat jou vertroos. Dit kan verse insluit soos: Psalm 37:28; 46:1; 118:5-9; Spreuke 17:17 en Filippense 4:6, 7.

HET JY GEWEET . . . ?

Meer as 90 persent van die jongmense in die Verenigde State wat verkrag is, ken hulle aanvaller.

AKSIEPLAN!

Wanneer ek skuldig voel oor wat gebeur het, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Hoe sal jy daarby baat vind as jy iemand van die seksuele misbruik vertel?

● Wat kan gebeur—met jou en met ander—as jy stilbly?

[Lokteks op bladsy 232]

Dis baie moeilik om oor die molestering te praat, maar dis die beste ding wat jy kan doen. As jy daaroor praat, help dit jou om van die hartseer en woede ontslae te raak en weer moed te skep.’’—Natalie

[Venster op bladsy 230]

“as jy vir my lief is . . . ”

Een soort seksuele uitbuiter dwing hom nie aan meisies op nie, maar speel op ’n slim manier op hulle gevoelens. Hoe? Deur dinge te sê soos: “Al die ander jongmense het seks”, “Niemand sal ooit uitvind nie” of, soos in Hoofstuk 24 van hierdie boek gemeld word, “As jy vir my lief is, sal jy dit doen”. Moenie ’n seun glo wat vir jou probeer sê dat seks liefde beteken nie. Die feit is dat enigiemand wat so dink, net in sy eie bevrediging belangstel. Hy dink nie aan jou of jou welsyn nie. In teenstelling hiermee sal ’n ware man jou belange bo sy eie stel en toon dat hy die krag het om by God se sedelike standaarde te bly (1 Korintiërs 10:24). ’n Ware man sal meisies nie as seksvoorwerpe behandel nie. Hy sal “jonger vroue [eerder] soos susters met alle kuisheid” beskou.—1 Timoteus 5:1, 2.

[Prent op bladsy 233]

Die gevoelens wat seksuele misbruik by jou laat ontstaan, kan te moeilik wees om alleen te dra. Kry hulp deur met iemand te praat.