Jesus laat ’n storm op die see bedaar

Jesus het ’n lang, uitputtende dag agter die rug. Wanneer dit aand word, sê hy vir die dissipels: “Kom ons gaan oor na die oorkantste oewer”, wat in die gebied oorkant Kapernaum is. – Markus 4:35.

Aan die oostelike oewer van die See van Galilea lê die gebied van die Geraseners, wat deel is van die Dekapolis. Die stede van die Dekapolis is ’n middelpunt van die Griekse kultuur, maar baie Jode woon ook daar.

Mense sien dat Jesus uit Kapernaum vertrek. Daar is ook ander bote wat begin vertrek (Markus 4:36). Die oorkantste oewer is eintlik nie so ver nie. Die See van Galilea is ’n groot en diep varswatermeer, sowat 21 kilometer lank en sowat 12 kilometer op sy breedste.

Al is Jesus volmaak, is dit verstaanbaar dat hy moeg is ná sy bedrywige dag in die bediening. Nadat hulle vertrek, gaan lê hy dus in die agterste deel van die boot, sit hy sy kop op ’n kussing en word hy aan die slaap.

Baie van die apostels is vaardige seemanne, maar dit gaan nie ’n maklike bootrit wees nie. Daar is berge om die See van Galilea, en die oppervlak van die water word soms redelik warm. Soms vloei kouer lug vinnig uit die berge af na die warm water, wat skielike, hewige windstorms veroorsaak. Dit is wat nou gebeur. Kort voor lank slaan die golwe teen die boot. ‘Hulle boot begin vol water word en is in gevaar’ (Lukas 8:23). Maar Jesus word nie wakker nie!

Die manne werk kliphard om die boot te stuur, soos hulle al voorheen in ander storms gedoen het. Maar hierdie keer is dit anders, en hulle is bang dat hulle gaan verdrink. Hulle maak Jesus wakker en roep uit: “Here, red ons, ons staan op die punt om dood te gaan!” – Matteus 8:25.

Wanneer Jesus wakker word, sê hy vir die apostels: “Hoekom is julle so bang? Hoekom het julle so min geloof?” (Matteus 8:26). Dan beveel Jesus die wind en die see: “Bedaar! Wees stil!” (Markus 4:39). Die stormwind gaan lê, en die see bedaar. (In Markus en Lukas se verslae van hierdie indrukwekkende gebeurtenis beklemtoon hulle eers die feit dat Jesus die storm wonderdadig laat bedaar, en daarna noem hulle die dissipels se gebrek aan geloof.)

Dink net watter uitwerking dit op die dissipels het! Hulle het so pas gesien hoe ’n hewige storm op die see heeltemal kalm word. Hulle is baie bang en sê vir mekaar: “Wie is hy regtig? Selfs die wind en die see gehoorsaam hom.” Hulle bereik die oorkantste oewer veilig (Markus 4:41–5:1). Dalk het die mense in die ander bote dit reggekry om na die westelike oewer terug te keer.

Dit is baie gerusstellend om te weet dat God se Seun beheer oor die natuurkragte het. Wanneer hy gedurende sy Koninkryksheerskappy sy volle aandag op die aarde rig, sal alle mense in veiligheid woon, want daar sal geen verskriklike natuurrampe wees nie!