Sal jy die lewe in ’n paradys aanvaar?
PARADYS! Waaraan dink jy as jy die woord hoor? ’n Werklikheid of ’n droom? ’n Aardse moontlikheid of, soos talle voorgewende Christene, Jode en Moslems glo, bloot ’n simbool van ’n geseënde toestand na die dood?
Die feit is dat Jesus Christus van die Paradys gepraat het. Aan die kwaaddoener wat langs hom tereggestel is, het hy gesê: “Voorwaar ek sê vir jou vandag: Jy sal saam met my in die Paradys wees” (Lukas 23:43, NW). Dit is dus noodsaaklik dat ons ons vergewis van die feite omtrent die Paradys.
Die Paradys, wat dikwels met die Bybel se tuin van Eden geassosieer word, word deur baie mense as iets mitologies beskou en nie as iets wat met ’n bepaalde geografiese ligging verband hou nie. Wat glo jy? Was daar ooit ’n deel van die aarde in Klein-Asië wat spesiaal voorberei is as die mens se eerste woonplek, soos die Bybelboek Genesis aandui?
Dit is interessant dat die Bybelverhaal oor die paradystuin van Eden nie begin met iets vaags soos “Eendag, lank, lank gelede, in ’n ver land . . .” nie. Nee, die Bybelboek waarin ons van Eden lees, praat van duidelik omlynde tydperke en lê die grondslag vir ‘n chronologie en geslagslyn wat deur die hele Bybel heen nagespoor kan word. (Lukas 3:23-38; kyk ook die Bybelensiklopedie Aid to Bible Understanding, bladsye 333-348.) Die Bybel maak ook melding van ’n bepaalde streek “in Eden, in die Ooste”, en ’n rivier wat “uit Eden uitgegaan” het en later vier riviere geword het. Twee van hulle word vandag uitgeken as die Eufraat en die Tigris. Dit sou Eden moontlik plaas in wat nou die bergagtige streek noord van die Mesopotamiese vlaktes is, suid van die meer Van in oostelike Turkye.—Genesis 2:7-17.
Die Bybelverhaal toon dat die eerste man. Adam, in ’n tuin of park geplaas is, omring van alles wat hy nodig gehad het om sy lewe te onderhou. Daar was volop plantegroei en “allerhande bome . . . , begeerlik om te sien en goed om van te eet”. Die feit dat daar so ’n verskeidenheid bome was, toon dat die tuin of park ’n aansienlike gebied moes beslaan het.
Die mens hunker na ’n paradys
In hedendaagse tye het die mens tuine en parke in of naby talle groot stede aangelê. Waarom? Omdat die stadsbewoner dikwels daarna hunker om sy gees te verkwik deur nader aan die natuur te kom. En wat is soms ons reaksie wanneer ons ’n pragtige park of tuin betree, veral as die blomme en bome bloei? Ons roep uit: “Wat ’n paradys!” Hoe graag sou ons tog nie in so ’n paradys wou woon nie! Ja, dit is ’n natuurlike hunkering wat in werklikheid teruggespoor kan word na die mens se oorsprong in die paradyspark van Eden.
En dit is ook die hoop wat Jesus aan die sterwende kwaaddoener aan sy sy voorgehou het toe hy vir hom gesê het: “Voorwaar ek sê vir jou vandag: Jy sal saam met my in die Paradys wees” (Lukas 23:43, NW). Jesus het nie hier aan die kwaaddoener of aan sy sogenaamde onsterflike siel ’n hemelse bestemming beloof nie. Hy het vir hom ewige, aardse lewe aangebied op ’n paradysaarde onder sy Koninkryksheerskappy. Hoe reageer jy op daardie belofte?—Mattheüs 6:9, 10; Johannes 5:28, 29; Handelinge 24:15.
Sal jy ’n bonus van 500 jaar aanvaar?
Interessant genoeg, die tydskrif Psychology Today het onlangs ‘n min of meer verwante vraag aan sy lesers gestel: “As iemand jou ’n pil aanbied wat dit vir jou moontlik sou maak om 500 jaar te lewe, sal jy dit neem?” Daar is natuurlik niks gesê oor volmaakte gesondheid of ’n paradysomgewing nie. Maar wat was die reaksies? Meer as 50 persent het gesê dat hulle die pil sou neem. Baie het gesê dat hulle “meer wou bereik, meer wou doen, of die lewe meer wou geniet”. Een man het met groot eenvoud gesê: “Ek het die lewe lief.” Sommige van die vroue het gesê: “Die lewe is verkwikkend; daar is te veel om te doen en nie genoeg tyd om dit te doen nie.” Hoe voel jy omtrent die lewe? Het jy die lewe lief? Maar sê nou jy kon, nie net ’n bonus van 500 jaar nie, maar ewige lewe onder paradystoestande en in volmaakte gesondheid geniet. Dit is presies wat die Bybel jou bied.—Johannes 17:3; Psalm 37:11, 29; Jesaja 33:24.
In dieselfde opname was daar egter ander wat baie uitdruklik gesê het dat hulle die bonus van die hand sou wys. Waarom? “Party glo dat die lewe eenvoudig te vervelig sal wees.” Jehovah se Getuies kom soms ’n soortgelyke beswaar teë wanneer hulle vertel van God se voorneme om aan die gehoorsame mensdom ewige lewe onder paradystoestande op aarde te gee. Party opper die beswaar: “Wat sal ons doen as ons vir ewig in ’n paradys moet lewe? Daar sal geen kontraste, geen uitdagings wees nie. Dit sal vervelig wees!”
Is dit werklik so? Sal ewige lewe op ’n paradysaarde vervelig wees? Die volgende artikel beantwoord hierdie vrae.