“Die stryd is nie julle saak nie, maar die saak van God”
“Glo in die Here . . . dan sal julle voorspoedig wees.—2 KRONIEKE 20:20.
1. Hoe beeld Josafat die gekroonde Jesus af?
JOSAFAT van Juda was ’n goeie koning. “Hy . . . het gedoen wat reg was in die oë van die HERE” (2 Kronieke 20:32). Sy naam beteken “Jehovah is regter”. Hy het Jehovah verheerlik deur op Hom staat te maak vir leiding op die weg van geregtigheid en vir hulp om Sy volk te oordeel. Hy het gesorg dat hulle onderrig word in die wet van Jehovah. Hy het persoonlik na die Judeërs uitgegaan om hulle aan te spoor om terug te keer na die ware aanbidding van Jehovah. Hy het die koninkryk vir teokratiese aanbidding georganiseer. In al hierdie opsigte is hy ’n gepaste afbeelding van die Koning, Jesus Christus, net nadat hy in 1914 op sy hemelse troon geplaas is en nou Jehovah se volk versamel sodat hulle bewaar kan word, terwyl demonmagte die nasies bymekaarmaak vir die finale oorlog te Armageddon.—Mattheüs 25:31-34; Openbaring 16:13, 14, 16.
2. (a) Watter groot krisis het vir Judeërs ontstaan? (b) Met watter soortgelyke situasie het Jehovah se Getuies vandag te kampe? (c) Watter elemente van Satan se wêreld kom ooreen met Ammon, Moab en die gebergte Seïr?
2 Nadat Josafat aandag geskenk het aan die herstelling van teokratiese orde in Juda het ’n groot krisis ontstaan. ’n Magtige vyand, “’n groot menigte”, het uit die streke van Ammon, Moab en die gebergte Seïr gekom en God se volk met uitwissing bedreig (2 Kronieke 20:1, 2, 22). Die situasie is vandag soortgelyk. Omdat Jehovah se Getuies “nie van die wêreld is nie”, word hulle deur Satan se wêreld gehaat en dikwels wreed deur God se vyande vervolg (Johannes 15:19; 1 Johannes 5:19). Die oorheersing van die land van Jehovah se volk—Juda (wat “Lof” beteken)—was die geskil in Josafat se dag. Volgens die patroon van eertydse Ammon en Moab ding vandag se politieke moondhede en grootondernemings (onder meer die vervaardigers van wapentuig vir massavernietiging) egter mee om wêreldoorheersing. Sodoende dring hulle ook die ryk in wat sedert 1914 tereg aan God se Messiaanse Koninkryk behoort (Openbaring 11:15, 18). Die antieke gebergte Seïr was die gebied van afvallige Edom, die afstammelinge van Jakob se tweelingbroer Esau. Die mense van die gebergte Seïr het dus gepas die trotse afvalliges van die hedendaagse valse Christendom afgebeeld.—Genesis 32:3.
3. Hoe kom die optrede van Josafat en die Judeërs ooreen met dié van lojale Getuies vandag?
3 Wat kon koning Josafat doen toe hy deur daardie invallende hordes bedreig is? Wel, wat doen Jehovah se lojale dienaars altyd wanneer hulle te kampe het met noodgevalle of vervolging of in lewensgevaar verkeer? Josafat het “sy aangesig daarop gerig om die Here te soek”. En vanuit al die stede van Juda het die volk “gekom om die Here te soek” by sy huis vir ware aanbidding.—2 Kronieke 20:3-5.
4. (a) Watter situasies kan Jehovah se volk verwag? (b) Waarheen wend ’n toenemende “groot menigte” hulle vir redding?
4 Watter goeie voorbeeld tog vir God se volk vandag! Hierdie eeu van geweld nader sy hoogtepunt te Armageddon. Toestande in Satan se wêreld gaan nie minder gewelddadig word nie (2 Timotheüs 3:1, 13). Selfs die lewens van Jehovah se volk word dikwels bedreig. Waar sal ons beskerming vind? Dit kan gevind word in ons eenheid van aanbidding. By ons Koninkryksale en ander Bybelstudiesentrums vergader ons om voedsame geestelike voedsel in te neem en om ons openbare diens tot lof van Jehovah te organiseer. Gelukkig kom “’n groot menigte” steeds uit alle nasies na vore om by God se volk in hulle “heilige diens” aan te sluit. Hierdie nuwelinge stroom na die berg van Jehovah se huis van aanbidding’. Dit beteken ook hulle redding.—Openbaring 7:9, 15, vgl. NW; Jesaja 2:3.
5. Waarop dui Josafat se “nuwe voorhof” ten opsigte van Jehovah se organisasie vandag?
5 Josafat het “in die huis van die HERE, voor die nuwe voorhof gaan staan. Die koning se bouprogram in Juda het klaarblyklik die vergroting van die fasiliteite vir aanbidding by Jerusalem se tempel ingesluit. Onder die leiding van die tans heersende Koning, Jesus Christus, vind daar eweneens vandag ’n groot geestelike bouprogram plaas sodat daar oorgenoeg plek vir miljoene lede van die nie-priesterlike “groot menigte” in die aardse voorhof van Jehovah se tempel is. Hoe aangenaam tog om daar te wees!—Psalm 27:1-5.
Jehovah word genader
6. (a) Watter sake het Josafat in sy gebed gemeld? (b) Hoe kan ons krag tydens beproewing kry?
6 By Jehovah se huis het Josafat die hele saak in gebed aan sy God gestel. Hy het Jehovah se koningskap, mag en krag erken en Jehovah se werke ten behoewe van sy volk hersien. Hy het verwys na Salomo se vurige gebed ten tye van die tempel se inwyding en nederig afgesluit deur te sê: “Ons weet nie wat ons moet doen nie, maar ons oë is op U” (2 Kronieke 20:5-12; 6:12-14, 34, 35). Was jy al ooit in so ’n situasie—waar dit gelyk het of daar geen uitweg is nie? In apostoliese tye was Paulus dikwels in sulke moeilikheid. Hy moes swaar op Jehovah steun. Maar hy kon altyd sê: “As ek swak is, dan is ek sterk.” Want wanneer hy heeltemal onbevoeg gevoel het, het sy volkome vertroue op Jehovah ’n bron van onoorwinlike krag geword. Jy kan ook sterk wees!—2 Korinthiërs 12:10; Spreuke 18:10.
7. Watter opdrag van Moses het daardie Judeërs gehoorsaam?
7 Stel jou die toneel daar in Jerusalem se uitgestrekte tempelgebied voor as jy kan: “En die hele Juda het voor die HERE gestaan, ook hulle kinders, hulle vroue en hulle seuns” (2 Kronieke 20:13). Hulle het ongetwyfeld Moses se raak opdrag oor die doel van sulke samekomste, wat in Deuteronomium 31:12 opgeteken is, herroep. Daar was slegs staanplek in daardie groot byeenkoms terwyl daardie gesinne eerbiedig op Jehovah gewag het, wakker en gereed om te doen wat hy sê.
Jehovah se kanaal
8. Identifiseer Jehovah se kommunikasiekanaal (a) in Josafat se dag (b) in ons dag.
8 Hoe sou die Soewereine Heer Jehovah Josafat se gebed verhoor? Jehovah het ’n kommunikasiekanaal voorsien. Dit was in die persoon van Jahasiël, van die stam van Levi. Hoewel Jahasiël nie ’n priester was nie, het Jehovah hom gekies om een van die roerendste boodskappe van bemoediging in die hele Skrif aan te kondig. Die belangrike saak was dat “die Gees van die HERE in die midde van die vergadering” op hom gekom het (2 Kronieke 20:14). Het Jehovah vandag ’n soortgelyke kanaal te midde van sy volk voorsien? Hy het beslis! Jesus het hiervan melding gemaak in sy profesie oor “die voleinding van die wêreld” toe hy verwys het na die gesalfde “getroue en verstandige dienskneg”-klas aan wie die Heer al sy “besittings” hier op aarde toevertrou.—Mattheüs 24:3, 45-47.
9. (a) Hoe was Jahasiël se naam gepas? (b) Wat was Jehovah se boodskap, en hoe bemoedig dit ons nou?
9 Jahasiël se naam beteken “God sien”. God kon inderdaad alles sien wat by daardie krisis betrokke was. Hy kon voorsien watter weg Sy volk moes inslaan. Hy kon die uitslag sien. Watter boodskap het Jehovah Jahasiël gevolglik laat oordra? Luister! Dit was: “Luister, almal wat uit Juda is en inwoners van Jerusalem en u, koning Josafat! So sê die HERE aan julle: Wees nie bevrees of verskrik vanweë hierdie groot menigte nie, want die stryd is nie julle saak nie, maar die saak van God” (2 Kronieke 20:15). Hoe moes daardie verenigde skare hulle tog nie verheug het nie! En hoe verheug is ons tog vandag om te weet dat al val Satan en sy bendes ons aan—al word ons geloof en onkreukbaarheid ook hoe op die proef gestel—ons, as ’n verenigde volk, ons volle vertroue in Jehovah kan stel, seker dat hy die stryd vir ons sal stry!—Exodus 15:2, 3; Psalm 24:8; 37:3-7; Sagaria 14:3.
Verenigde optrede is nodig!
10. (a) Voor watter toets van onkreukbaarheid het daardie Judeërs te staan gekom? (b) Deur watter werk word Jehovah se ‘vreemde werk’ voorafgegaan?
10 Maar daardie Judeërs moes nie net ledig toekyk en wag op die verlossing wat Jehovah sou bewerkstellig nie. Hulle moes optree! Hulle moes gehoorsaamheid aan Jehovah toon en dinge op sy manier doen as hulle behoue wou bly. Baie van hulle het ongetwyfeld gedink dat Jehovah se instruksies taamlik buitengewoon was. Dit het hulle onkreukbaarheid op die proef gestel. Net so vereis Jehovah dat sy getuies eendragtig ’n werk doen wat vir baie buitengewoon lyk voordat hy sy ‘vreemde werk, sy ongehoorde daad’ verrig deur die valse Christendom aan die begin van die “groot verdrukking” te vernietig. Dit is naamlik hulle heilige diens om herhaaldelik na die huise van die mense te gaan en hulle te waarsku teen die naderende vernietiging.—Jesaja 28:21; Mattheüs 24:14, 21.
11, 12. (a) Watter buitengewone bevel het Jahasiël gegee, maar hoe het die Judeërs gereageer? (b) Hoe kan ons ook ons vertroue op Jehovah toon?
11 Dit is afgeskadu deur die bevele wat Jahasiël aan die volk van Juda gegee het. Hy het na die vyandelike hordes verwys en gesê: “Trek môre af teen hulle . . . Julle hoef daarby nie te veg nie; staan gereed, bly staan en aanskou die redding van die HERE by julle, Juda en Jerusalem! Vrees nie en wees nie verskrik nie; trek môre teen hulle uit, en die HERE sal met julle wees” (2 Kronieke 20:16, 17). Daardie ongewapende menigte manne, vroue en kinders is beveel om uit te trek teen die gesamentlike leërs van die vyand!—Vergelyk Psalm 148:12, 13.
12 Josafat en die Judeërs het die leiding wat Jehovah deur Jahasiël voorsien het diep waardeer. “Toe buig Josafat hom met die aangesig na die aarde toe, en die hele Juda en die inwoners van Jerusalem het voor die aangesig van die HERE neergeval om die HERE te aanbid” (2 Kronieke 20:18). Die Grotere Josafat, Jesus Christus, het sulke onderdanige vertroue op Jehovah geopenbaar toe hy op aarde was, en ons kan daarvan seker wees dat hy hom tot Jehovah sal wend vir gevegsbevele wanneer ‘Jehovah aan sy regterhand konings verbrysel op die dag van sy toorn’ (Psalm 110:5, 6). Jehovah se Getuies is vandag eweneens bly om die God op wie hulle vertrou te “aanbid” terwyl hulle in sy voorhowe dien.—Psalm 84:11-13; 122:1-4.
13. Wie loof Jehovah vandag “met ’n baie groot stem”, en wat het dit tot gevolg?
13 Volgens 2 Kronieke 20:19 het tempelsangers “opgestaan om die HERE, die God van Israel, met ’n baie groot stem te prys”. En wie prys Jehovah vandag onder leiding van die gesalfde oorblyfsel met “’n baie groot stem” voor sy vyande? Aan die voorpunt van Jehovah se volk is daar die immer groeiende groep pionierbedienaars. Hulp- en gewone pioniers, spesiale pioniers en sendelinge—diegene wat aan die voorpunt is van die lowers van Jehovah in die veld—het in 1983 ’n vermeerdering van 19 persent geniet. Hulle ‘sang’ het ’n buitengewoon groot bydrae gelewer tot die verbasende totaal van 436 720 991 uur—’n vermeerdering van 13,5 persent—wat verlede jaar aan die Christelike bediening gewy is.
14. Hoe toon baie nou, in navolging van die Judeërs, hulle geloof deur werke?
14 In Jerusalem was dit destyds nie die tyd om ’n jandooi te wees nie. Die volk het gehoorsaam ‘die more vroeg klaargemaak en na die woestyn van Tekoa uitgetrek’ (2 Kronieke 20:20). Hulle wou graag hulle geloof deur werke toon. (Vergelyk Jakobus 2:14.) God se bedienaars moet vandag eweneens dikwels vroeg in die tuig wees. Huisvrou-pioniers en ander moet vroeg opstaan om huiswerk te doen sodat hulle ’n volle oggend in Jehovah se diens kan deurbring. Daar is mense in Satan se wêreld wat ‘sug en steun’, en wat geteken moet word vir oorlewing deur die “groot verdrukking”. Jehovah se Getuies is vasbeslote om hulle te vind.—Vergelyk Esegiel 9:4.
Voorwaarts na die stryd!
15. (a) In wie moes die Judeërs glo? (b) Hoe kan ons vandag “voorspoedig wees”?
15 Die verslag in 2 Kronieke 20:20 sê voorts: “Terwyl hulle uittrek, het Josafat gaan staan en gesê: Luister na my, Juda en inwoners van Jerusalem! Glo in die HERE julle God, dan sal julle bevestig word; glo aan sy profete, dan sal julle voorspoedig wees.” Die hoof van die Christengemeente, ons tans heersende Koning, het sy volk eweneens baie bemoedig om getrou te wees. Ons vind daardie bemoediging in gedeeltes soos die volgende: Mattheüs 10:27, 28; 24:9-13; Johannes 16:33. Glo in Jehovah, glo in diegene wat hy as woordvoerder gebruik, ja, glo in sy organisasie! Hoe belangrik is dit tog dat ons sulke geloof beoefen wanneer ons vandag ‘uittrek’ na Jehovah se diens! Dit is die weg na gewisse sukses—wat behaal moet word deur alle toegewyde, gedoopte Getuies wat geloof in Jehovah en sy reëlings toon. Dit sluit sy wonderlike voorsiening van die ewige lewe in wat moontlik gemaak is deur die offer van sy Seun.—Johannes 3:16; 17:3.
16. (a) Watter “sangers” neem dikwels die voortou in die diens? (b) Hoe loof almal Jehovah “in heilige sieraad”?
16 En Josafat “het met die volk beraadslaag en tot eer van die HERE sangers opgestel wat, in heilige sieraad, moes lofsing en by die uittrek op die voorpunt van die gewapendes moes sê: Loof die HERE, want sy goedertierenheid is tot in ewigheid!” (2 Kronieke 20:21). Hier het die tempelsangers aan die voorpunt na die stryd uitgetrek. Onder die leiding van die gesalfde oorblyfsel is daar eweneens die pioniers en sendelinge, reisende opsieners en hulle vrouens, ook die wat in Bethelhuise dien, sowel as gemeentelike ouere manne en bedieningsknegte, wat dikwels aan die voorpunt is van diegene wat heilige diens verrig en almal wat aan die gemeente verbonde is tot bedrywigheid aanspoor. Hulle bring almal lof aan Jehovah “in heilige sieraad” terwyl hulle in teokratiese orde optrek. Hulle geestelike klere sluit ‘die nuwe Christelike persoonlikheid in wat ware geregtigheid en lojaliteit uitstraal’ (Efesiërs 4:24, NW; Galasiërs 5:22). Watter voorreg is dit tog vandag om deel te wees van hierdie wêreldwye beweging wat Jehovah se naam en goedertierenheid verheerlik!—Psalm 144:1, 2; 136:1-26.
17. (a) Waarom was dit nie vir God se volk nodig ‘om te veg nie’? (b) Watter “bedoeling” van Jehovah beteken ondergang vir valse godsdiens?
17 Jehovah het vir sy volk gesê: “Julle hoef daarby nie te veg nie.” En so was dit ook. “Op die oomblik toe hulle die gejubel en die lofsang aanhef, het Jehovah ’n hinderlaag opgestel teen die invallende hordes sodat “die kinders van Ammon en Moab . . . opgetree [het] teen die inwoners van die gebergte Seïr om uit te roei en te verdelg” (2 Kronieke 20:17, 22, 23). Hoe duidelik lig dit tog toe wat binnekort in Satan se wêreld gaan gebeur! Soos Openbaring 17:16, 17 toon, het Jehovah ’n “bedoeling” met Babilon die Grote, waarvan die valse Christendom die laakbaarste deel is. Hy sal toesien dat gemilitariseerde ledenasies van die V.V.O. hierdie selfde “bedoeling” het deur valse godsdiens aan te val om dit te verwoes en te vernietig. Die groot afvallige stelsel van die valse Christendom sal net soos daardie Edomiete van die gebergte Seïr verpletter word!
18. Hoe sal daar by Armageddon van die hedendaagse Ammon en Moab ontslae geraak word?
18 Maar dit is nie al nie! Die hedendaagse Ammon en Moab bly nog oor! (Vergelyk Openbaring 18:9, 10, 15-17.) Hulle is nog steeds daarop uit om die lowers van Jehovah, die Judeërs van vandag, te vernietig. Maar dit is Jehovah se tyd vir die voltrekking van oordeel. Volgens Openbaring 19:11-16 sal die Koning, Jesus Christus, uittrek om ‘die parskuip van die grimmigheid van die toorn van God, die Almagtige, te trap’ en sodoende die oorblywende dele van Satan se wêreldstelsel te vernietig. Wanneer daardie groot stryd sy hoogtepunt bereik, sal die waansinnige oorblyfsels van die politieke nasies en hulle gemilitariseerde krygsbendes mekaar ongetwyfeld met hulle vernietigingswapens aanval. Dit was die geval met Ammon en Moab, toe “hulle mekaar in die verderf gehelp” het. Maar Jehovah sal hulle nooit toelaat om hulle kerntoestelle in so ’n mate te gebruik dat hulle God se volk of sy handewerk, die aarde, verderf nie.—Openbaring 11:18; Jesaja 45:12, 18; Psalm 115:16.
19. (a) Hoe sal hedendaagse Judeërs dan reageer wanneer hulle die slagveld gadeslaan? (b) Wat word afgebeeld deur ‘die byeenkoms in die dal Beraka’?
19 “En toe Juda op die wagkop by die woestyn kom en hulle na die menigte kyk, lê hulle daar dood op die grond; en niemand het vry geraak nie.” Wanneer die hedendaagse “Judeërs” en hulle medeaanbidders die gevolge van Armageddon se oorlog gadeslaan, sal hulle Jehovah vir daardie wonderlike oorwinning loof. Hulle sal nie letterlik buit hoef in te samel nie, maar hulle sal bly wees om te vergader in die simboliese “dal Beraka”—waar Beraka “Seën” beteken. Die nie-priesterlike “groot menigte” sal vreugdevol ingaan in ’n gereinigde aarde onder Koninkryksheerskappy met groot afwagting van hulle komende voorreg—om die aarde in ’n paradystuin te omskep. ’n Duisend jaar lank sal die koninklike ryk van die Grotere Josafat, Jesus Christus, rus, en sal sy God, Jehovah God, voortdurend rondom hulle rus verskaf.—2 Kronieke 20:24-30, vgl. NW.
Ter hersiening van 2 Kronieke 20
◻ Wie kom vandag met die hordes van Ammon, Moab en die gebergte Seïr ooreen?
◻ Wie word afgebeeld deur Josafat, Jahasiël en die Judeërs?
◻ Watter goeie reaksie was daar van hedendaagse Judeërs?
◻ Wat gee vir ons vertroue in die uitslag van die “groot verdrukking”?
[Prent op bladsy 16]
Net soos Josafat help die gekroonde Jesus God se volk nou om ‘voorspoedig te wees’ in hulle strewe om Jehovah te loof