’n “Spesiale gebied”

TALLE jong Christene beskou die skool nou as hulle “spesiale gebied”, en daarom is hulle wakker vir geleenthede om ’n getuienis aan onderwysers sowel as klasmaats te gee. Let op die goeie resultate wat Susan, ’n dertienjarige meisie in Kanada, behaal het.

“My onderwyser het die klas in Desember gevra om ’n Kersverhaal vir ‘skryfkuns’ te skryf. Ek het die volgende onderwerp gekies: ‘’n Verslag oor die oorsprong van Kersfees’. Ek kon ’n leersame verslag skryf deur die skool se ensiklopedieë en Ontwaak!-artikels as bronmateriaal te gebruik.” Wat het die onderwyser daarvan gedink?

“Die onderwyser het onderaan my verslag geskryf: ‘Puik, Susan! Ek bewonder jou eerlikheid en respekteer jou oortuiginge. Met jou bedagsaamheid en begrip sal jy altyd gerespekteer word. Ek hoop dat jy die bewonderenswaardige eienskappe wat jy nou besit in die toekoms sal behou. Dit is ten slotte baie verkwikkend en lonend om iemand van jou ouderdom teë te kom wat die moed van haar oortuiginge ontwikkel het en handhaaf.’

“Nadat die onderwyser self die verslag gelees het, het hy dit aan al die onderwysers in die personeelkamer gegee om te lees. Hulle het dus almal ’n getuienis ontvang! Dit het my die moed en vasbeslotenheid gegee om met ander by die skool oor Bybelwaarhede te praat.

“Al my skoolmaats weet natuurlik dat ek een van Jehovah se Getuies is, en toe hulle hoor waaroor ek geskryf het, wou hulle ook my verslag lees. Hulle het soveel belangstelling getoon dat ek gesê het dat ek vir elkeen ’n nommer van Awake! met ’n artikel oor Kersfees sou bring. Dit was die nommer van 22 Desember 1979a en het ook ’n artikel oor ‘disko’ bevat.

“Toe ek die eksemplare van daardie Awake! skool toe bring, het ’n paar ander in die klas dit gesien en wou hulle ook eksemplare hê. Hulle het soveel belangstelling in die artikel oor ‘disko’ getoon dat ek besluit het om vir elkeen ’n eksemplaar van Awake! van 22 Maart 1979b, wat ’n reeks artikels oor daardie onderwerp bevat het, te bring. Ek het gevolglik 26 tydskrifte onder medeskoliere versprei.

“Toe ons skoolverpleegster by ’n latere geleentheid ’n rolprent oor persoonlike ontwikkeling aan ons vertoon het, het ek vir ’n paar skoolmaats eksemplare van die boek Jou jeug —Hoe om dit ten beste te benut gebring. Ek het hulle vertel dat hierdie boek my werklik gehelp het om die veranderinge en probleme wat met grootword gepaard gaan te verstaan.

“Toe my ander klasmaats sien dat hierdie meisies die boek lees en bespreek, het hulle my weer eens gevra of ek vir hulle ook boeke kon bring—selfs ’n paar van die seuns wou boeke hê. Ek het altesaam 17 Jeug-boeke by daardie geleentheid geplaas. . . .

“By ’n ander geleentheid het ’n meisie by die skool my vertel dat sy Sondagskool toe gaan en die Bybel lees, maar dit nie verstaan nie. Ek het haar gesê dat ek ’n Bybel het wat maklik is om te lees en dat ek graag vir haar een wou bring. Ek het nie net vir haar ’n New World Translation gebring nie, maar ook ’n eksemplaar van My boek met Bybelverhale en vir haar gewys hoe hierdie boek haar werklik sal help om die Bybel te verstaan. Sy was baie opgewonde daaroor.”

Hoe voel Susan oor getuieniswerk by die skool? “Ek geniet dit werklik om vir my skoolmaats te getuig en beskou dit as ’n voorreg om hierdie spesiale gebied te hê.”

Is jy op skool? Benut gerus jou “spesiale gebied”.

[Voetnote]