Hulle loof Jehovah by die skool

JONG Getuies van Jehovah in alle wêrelddele vind maniere om God by die skool te loof—deur hulle spraak sowel as hulle gedrag. Let op ’n paar ondervindinge wat hulle jeugdige ywer toelig.

’n Jong Getuie in Griekeland moes ’n verslag oor die besoedeling van die aarde se atmosfeer skryf. Nadat sy in die Watch Tower Publications Index gekyk het, het sy nuttige inligting in die Ontwaak! gevind, en sy het dit aan die einde van haar opstel as haar bron genoem. Haar onderwyseres het vir haar gesê dat dit een van die beste opstelle is wat sy nog gelees het. Die onderwyseres het die inligting later met goeie resultate by ’n seminaar gebruik. Die jong suster het dus besluit om nog nommers van die Ontwaak! vir die onderwyseres aan te bied, onder andere die een met die reeks “Onderwysers—Wat sou ons sonder hulle gedoen het?” Die onderwyseres het later die Ontwaak! in die klas geprys, en party leerlinge het eksemplare begin vra. Die suster moes eksemplare van die tydskrif skool toe bring sodat hulle ander nommers kon lees.

In Benin, Afrika, het ’n tienderjarige Christen voor ’n ongewone soort druk te staan gekom. Die ouers van ’n aantal leerlinge in haar skool het oudergewoonte saamgespan om privaat onderwysers vir moeilike vakke te huur om die kinders vir die eksamen voor te berei. Maar die privaat onderwysers het Saterdagoggende vir die lesse gekies. Die jong Getuie het beswaar gemaak: “Saterdagoggend is die tyd wanneer die hele gemeente saam aan die predikingswerk deelneem. Dit is vir my die lekkerste tyd van die week, en ek sal dit vir niks verruil nie!” Haar pa, ’n enkelouer en ook ’n Getuie, het saamgestem en het een groep ouers en privaat onderwysers sover probeer kry om die rooster te verander. Maar hulle almal het geweier. Die jong meisie het besluit om sonder die privaat lesse klaar te kom. Sy het eerder saam met haar gemeente aan die predikingswerk deelgeneem. Haar klasmaats het haar gespot en haar aangespoor om haar getuieniswerk sowel as haar God prys te gee. Hulle was baie seker dat sy die eksamen sou druip. Maar die uiteinde was dat daardie groep leerlinge wat die privaat lesse ontvang het, gedruip het terwyl ons jong suster geslaag het. Die gespot het natuurlik opgehou. Nou sê die leerlinge vir haar: “Jy moet aanhou om jou God te dien.”

In die Tsjeggiese Republiek moes ’n 12-jarige meisie ’n verslag oor ’n boek voorberei. Haar ma het haar aangespoor om die boek Die grootste mens wat nog geleef het te gebruik. Sy het haar verslag begin met die vrae: “Wat dink julle? Wie is die grootste mens wat nog geleef het?” Sy het ’n beskrywing gegee van Jesus, sy lewe op aarde en sy leringe. Toe het sy die hoofstuk met die titel “’n Les in vergewensgesindheid” bespreek. Haar onderwyseres het uitgeroep: “Dit is die beste verslag wat ek nog van jou gehoor het!” en het met graagte ’n eksemplaar van die boek geneem. Party leerlinge wou ook ’n eksemplaar hê. Die volgende dag was die meisie verheug om 18 eksemplare te versprei.

Hierdie jongmense put groot vreugde daaruit om Jehovah by die skool te loof. Ons almal kan gerus hulle jeugdige ywer navolg.