Insig in die nuus

Satanisme wen veld

“’n Toename in Sataniese ritusse en bekoring deur ‘heavy metal’-musiekgroepe . . . dui daarop dat duiwelaanbidding onder adolessente veld wen.” So sê The Press Democrat van Santa Rosa, Kalifornië. Onder die dinge wat amptenare met Satanaanbidding verbind, is grafrowery, diereverminking en selfs ’n aantal moorde. Sataniese boodskappe en simbole, waaronder die getal 666, het prominent geword op plateomslae en in graffiti. Wat is die vernaamste lokmiddel wat jongmense by Satanisme betrokke laat raak? “Die kinders kry allerhande boodskappe in die [‘heavy metal’-]musiek”, sê speurder Dave Gaerin van die jeugafdeling van San Diego se polisiemag. “Ons het ’n konsert hier gehad waar die orkes 15 000 kinders opgesweep het om oor en oor ‘Natas’ te sê”—dit is die omgekeerde spelling van Satan.

Baie word ook gelok deur die skyn van onafhanklikheid. “Ek dink dikwels met groot bewondering aan Satan”, het een hoërskoolleerling oor sy ingenomenheid met die Duiwel gesê. “Aangesien hy een deel van die bonatuurlike beheer, is hy geneig om jou jou gang te laat gaan, jou te laat doen wat jy wil, terwyl God sy eie reëls het oor hoe jy veronderstel is om te lewe.”

Dit was hierdie taktiek—die verlokking van onafhanklike optrede sonder inperking deur die heilsame wet van God—wat ons eerste ouers tot ongehoorsaamheid gelei en die mensdom in 6 000 jaar van matelose leiding gedompel het (Genesis 3:4, 5, 13). Satan gebruik vandag dieselfde misleiding, veral omdat hy weet dat hy min tyd het (Openbaring 12:12; 2 Korinthiërs 2:11). Diegene wat sy verlokkinge weerstaan, kan uitsien na “die heerlike vryheid van die kinders van God”.—Romeine 8:21, NW.

Hulle vermy die waarheid

Toe Jesus onder verhoor gestaan het, het hy vir die Romeinse goewerneur Pilatus gesê: “Hiervoor het Ek in die wêreld gekom, om vir die waarheid te getuig. Elkeen wat uit die waarheid is, luister na my stem.” Die waarheid was vir Jesus kosbaar en dit moet nie vervals word nie.—Johannes 18:37.

Hoe reageer mense vandag op die idee van godsdienswaarheid? Rooms-Katolieke skrywer Christopher Derrick het in The Times van Londen gesê: “Enige melding van godsdienstige ‘waarheid’ impliseer die een of ander aanspraak dat jy weet; en hoe verskuil, taktvol ook al, dit sinspeel op die moontlikheid dat ander mense dit mis het.” Hy het bygevoeg: “Die nare feit is dat, indien jy ’n godsdiensstelling maak wat waarlik iets beteken, jy insinueer dat iemand anders dalk verkeerd kan wees; en dit is totaal onaanneemlik.”

Waarom? Omdat daar vandag ’n oorverdowende oproep na ekumenisme opgaan, iets wat deur Derrick as “’n absolute waarde” beskryf word, en godsdiensleiers dit wenslik vind om alle verdeeldheid te vermy. Elke persoon het dus die vryheid om self te besluit wat “reg” is vir hom. Wat dan van die waarheid? Jesus het gesê: “Julle sal die waarheid ken, en die waarheid sal julle vrymaak.” Diegene wat na hom geluister het, was dankbaar dat hy nie die waarheid—die vereiste om hulle los te maak van die oorleweringe en valse leringe van die godsdiensleiers wat verhinder het dat hulle die lewe verkry—verwater het nie.—Johannes 8:32; Mattheüs 23:13, 15.

Soektog duur voort

Is daar intelligente lewe in die ruimte? Die soektog wat 25 jaar gelede begin het, word nou verskerp. “Die enorme taak, wat die waarneming van honderdmiljarde sterre behels”, berig The New York Times, “het tot dusver geen duidelike bewys opgelewer dat daar lewe buite die Aarde bestaan nie.” Twee sterrewagte wy hulle egter voltyds aan die soektog, terwyl nuwe en oneindig sensitiewer verklikkers in gebruik geneem word. ’n Stelselmatige soektog word onderneem op grond van die teorieë dat “die lewe in ander wêrelde ontstaan het” en dat “ander beskawings moontlik kommunikasie met mekaar probeer bewerkstellig”—al is daar geen afdoende bewys van bewoonde planete wat enige ster buiten ons son omwentel nie.

So ’n kolossale projek in die lig van sulke karige getuienis dui op die opsetlike neiging om die feit te negeer dat buite-aardse lewe van die hoogste orde wel bestaan. God en sy engele bestaan in die geesteryk. Dit is nie alleen die sigbare hemele wat van sy bestaan en godheid getuig nie, maar ook die geskrewe rigsnoer wat hy aan die mensdom gegee het om hulle in te lig en te lei. Die mens hoef nie verder as die Bybel te soek as hy wil weet waar die mens vandaan kom, wat die doel van die lewe is en wat die toekoms inhou nie.—Psalm 14:1; 19:2; 2 Timotheüs 3:16, 17.