Satanisme se handlangers—dwelms en heavy metal-musiek

CArl A. RASCHKE, die direkteur van die Universiteit van Denver se Instituut vir Geesteswetenskappe, het geskryf: “Dit is nie toevallig dat dwelms, heavy metal[-musiek], wreedheid en roekelose geweld die grusame vaandels geword het wat oor die verwoeste mensdom wapper namate ons die derde dekade van die Era van Satan nader nie.” Hy het ook gesê: “Jy kan maar sê dat heavy metal-rock vir Satanisme is wat gospel-musiek vir die Christelike godsdiens is. Bitter min mense word tot die Christelike godsdiens bekeer net omdat hulle oor die radio na gospel-musiek luister. Maar heavy metal is ’n baie kragtige versterking. Dit regverdig die liederlike dinge waarmee kinders reeds besig is.”

Dit is ’n kragtige veroordeling van wat soveel hedendaagse jongmense as normale afleidings vir die sorge van die lewe beskou—heavy metal-musiek en dwelms. Is hierdie beskuldigings geregverdig? Kan dit wees dat dwelms en heavy metal-musiek simptome van Satanisme is? Kyk ’n bietjie na die kommentare van diegene wat met die geweld van Satanaanbidders te doen gehad het en dit ondersoek het.

“Die opruiende boodskap van heavy metal-musiek is, en dit verbaas ons nie juis nie, ‘godsdienstig’—in die sin dat dit ’n hoër mag verkondig wat oor die heelal is. Die mag is egter nie God nie”, het Carl Raschke in sy boek Painted Black geskryf. “Dit word . . . deur die Aartsvyand self uitgeoefen.” Daarbenewens het hy gesê: “Die mag en geweld van Satanisme is iets waartoe kinders wat sonder hoop is en ’n afgestompte gewete het maklik aangetrek word. . . . Kinders met probleme en mishandelde kinders glo, as gevolg van indrukke wat deur ondervinding op hulle gemaak is, dat die Hoër Mag boos moet wees. Heavy metal bevestig hierdie ‘teologie’ en neem dit in die musiek op.”

Volgens dr. Paul King van die Universiteit van Tennessee, wat voor die Amerikaanse Senaat oor heavy metal-musiek getuig het, is die musiekvoorkeur van baie versteurde kinders die “onkonvensionele temas van geweld, haat, opstand, primitiewe seks, vrouemishandeling en die verheerliking van Satan. Wanneer ’n adolessent se lewenswyse dwelms insluit, is hierdie voorkeur selfs waarskynliker.” Heavy metal-musiek verheerlik en prys die mag van boosheid, het dr. King gesê. In heavy metal-musiek “word bose dade gedurende konserte tot nuwe hoogtes verheerlik”, het hy gesê.

Beskou in die volgende gevalle die vrugte wat heavy metal se boodskap op die onderbewussyn het.

Verlede jaar het twee 15-jarige seuns in New Jersey, VSA, ’n gesin se troeteldier, ’n Labrador met die naam Princess, wreed doodgemaak. “Dit was ’n offerande aan Satan”, het hulle gesê. Hulle het die hond aan haar ketting opgehang, haar doodgeskop, haar tong uitgeruk en dit in ’n sataniese ritueel gebruik. Hulle het die verminkte liggaam van die hond met ’n groot metaalhaak deurboor en in ’n buurman se erf opgehang. Sataniese tekens is op die hond se kop gevind, en ’n pentagram (’n vyfhoekige ster in ’n sirkel—’n Sataniese simbool) was op die grond onder die hond se liggaam uitgekrap. Die nag toe hulle die hond doodgemaak het, het hulle na Deicide (wat moord van God beteken) geluister, ’n death metal-groep wie se hoofsanger spog oor hoe hy diere martel en doodmaak.

In Kalifornië het twee tienderjarige minnaars, wat volgens vriende behep was met Satanaanbidding, die meisie se ma wreedaardig doodgemaak deur haar te steek en met ’n skroefsleutel te slaan. In dieselfde omgewing het ’n ander jeugdige tot Satan gebid en toe sy pa doodgeskiet. Polisiebeamptes wat die misdaad ondersoek het, was daarvan oortuig dat heavy metal-musiek daarvoor verantwoordelik was. “Die musiek leer basies dat jy nie na jou ouers hoef te luister nie en dat jy jou lewe moet lei soos jy wil”, het ’n polisiedeskundige gesê.

In Engeland het slagoffers van ’n reeks bendeverkragtings vir die polisie gesê dat een van die verkragters tatoeëermerke gehad het van die kentekens van ’n heavy metal-groep wie se lirieke boodskappe van verkragting en geweld bevat.

In Arkansas, VSA, het ’n tiener op die platteland sy ouers probeer doodmaak deur hulle met ’n knuppel te slaan en hulle toe met ’n slagtersmes te kap. Die polisie het ’n kasset in sy kassetspeler gekry wat gestel was op ’n heavy metal-liedjie “Altar of Sacrifice” waarin die lirieke uitskreeu: “Hoëpriester staan gereed, dolk in die hand, om die rein maagdebloed te stort. Satan se slagting, seremoniële dood, gehoorsaam elke opdrag van hom. Betree die ryk van Satan . . . Leer die heilige woorde van lof: ‘Loof Satan.’”

Wat van die lirieke van ander liedjies wat deur skreeuende lede van heavy metal-groepe gesing word en wat hulle bewonderaars dikwels by konserte in wilde waansin saamsing, of waarna daar ure lank op kassette geluister word? Watter invloed het sulke boodskappe op ontvanklike jongmense? Kyk byvoorbeeld na hierdie lirieke: “Satan ons meester in bose verminking lei ons in elke eerste stap”, en “Stort jou bloed, laat dit oor my loop. Neem my hand en gee jou lewe oor . . . Jy het die bloed gestort. Ek het jou siel.”

“As ons reeds aanvaar dat pornografie ’n kindermolesteerder kan motiveer”, het Carl Raschke geskryf, “waarom oorweeg ons dan nie die moontlikheid dat lirieke wat maak dood, vermink, skend, martel en vernietig uitskreeu in werklikheid iemand met ’n versteurde verstand sal beweeg om juis hierdie dade uit te voer nie?”

Navorsers is oral van mening dat dwelmmisbruik met Satanisme gepaardgaan. ’n Voormalige polisie-speurder van die sede-afdeling, David Toma, sê dat hy “nog nooit ’n Satanaanbidder teëgekom het wat nie dwelms gebruik nie”. Dwelmgebruik, het die tydskrif ’Teen berig, kompliseer sake vir tieners “wat hulle tot duiwelaanbidding wend en maak dit vir hulle al hoe moeiliker om te onderskei tussen wat die werklikheid is en wat net na die werklikheid lyk wanneer dit deur die newels van dwelms en alkohol gesien word”.

“Heavy metal is vir strawwe dwelmgebruikers wat loterye vir gewoontedobbelaars is”, het Carl Raschke gesê. “Die dwelmafhanklike adolessent neem ’n lewenswyse aan van verwaandheid, wreedheid, diefstal en seksuele losbandigheid—en al hierdie dinge word versterk deur die gekerm en geskreeu van die heavy metal-groepe.”

’n Kind word ongetwyfeld maklik ’n slagoffer van Satan se invloed wanneer geestesgesondheid uit sy brein gespoel word en perverse en wrede gedagtes die plek daarvan inneem.

[Lokteks op bladsy 8]

Jy word maklik ’n slagoffer van Satan se invloed wanneer geestesgesondheid uit jou brein gespoel word en perverse en wrede gedagtes instroom

[Prent op bladsy 7]

Waarmee vul jy jou verstand?