Waarom hulle hulle tot geweld wend
IN Denver, Colorado, VSA, is ’n baba 27 weke te vroeg gebore. Die seuntjie het dit oorleef, en ná drie maande in die hospitaal is hy terug huis toe gestuur na sy ouers. Drie weke later was die seuntjie weer in die hospitaal. Waarom? Hy het ernstige breinskade opgedoen nadat sy pa hom gewelddadig geskud het. Die pa kon nie die gehuil van die baba verdra nie. Die seuntjie is nou blind en gestremd. Moderne geneeskunde het hom van die trauma van sy geboorte gered, maar kon hom nie teen sy vader se geweld beskerm nie.
Tallose kinders word mishandel, geslaan of doodgemaak in een van die gewelddadigste plekke op die aarde—die huis! Party skat dat tot 5000 kinders elke jaar deur hulle ouers in die Verenigde State alleen doodgemaak word! En kinders is nie die enigste slagoffers nie. Volgens die tydskrif World Health “is vrouemishandeling die hoofoorsaak van beserings onder vroue van geslagsrype leeftyd” in die Verenigde State. Wat van ander lande? “’n Derde tot meer as die helfte van die vroue [in ontwikkelende lande] onder wie ’n opname gemaak is, sê dat hulle deur hulle huweliksmaat geslaan word.” Ja, geweld eis sy tol, veral in die huis.
Baie mans en vrouens probeer hulle verskille met geweld oplos. In party lande gebruik ouers en onderwysers geweld teen kinders om aan hulle woede uiting te gee. Vir blote pret pik bullebakke op swakkeres en doen hulle hulle geweld aan. Waarom raak mense so gewelddadig?
Waarom mense gewelddadig word
Party beweer dat mense van nature gewelddadig is. Terwyl geweld oor die algemeen in die Verenigde State afgeneem het, het dit onder jongmense toegeneem. En mense stel al hoe meer in geweld belang. Die drie vernaamste televisienetwerke het die aantal misdaadverhale verdubbel en hulle verslae oor moorde verdriedubbel. Ja, misdaad verkoop goed! “Ons duld nie net geweld nie”, het die psigiater Karl Menninger gesê, “ons plaas dit op die voorblaaie van ons koerante. ’n Derde of ’n kwart van ons televisieprogramme gebruik dit om ons kinders te vermaak. Ons praat dit nie nét goed nie! My liewe vriende, ons het dit lief.”
Onlangse wetenskaplike studies toon dat die biologiese prosesse van die brein sowel as die milieu baie met menslike aggressie te doen het. Die gevolgtrekking waartoe ons almal begin kom, is dat die slegte milieu waaraan al hoe meer kinders blootgestel word in werklikheid aanleiding gee tot ’n epidemie van geweld”, sê dr. Markus J. Kruesi van die Universiteit van Illinois se Instituut vir Jeugnavorsing. “Gebeure in die milieu waarin iemand hom bevind, veroorsaak werklik molekulêre veranderinge in die brein wat mense impulsiewer maak.” Faktore soos “die ineenstorting van die gesinstruktuur, die toename in enkelouergesinne, aanhoudende armoede en chroniese dwelmmisbruik kan die chemiese werking van die brein in werklikheid verander dat dit tot aggressiewe gedrag lei—’n reaksie wat op een tydstip as onmoontlik beskou is”, sê die boek Inside the Brain.
Die veranderinge in die brein behels na bewering die verlaging van die serotonienvlak, ’n breinchemikalie wat aggressie vermoedelik in toom hou. Studies toon dat alkohol die serotonienvlak in die brein kan verlaag, en gevolglik vorm dit ’n wetenskaplike grondslag vir die skakel tussen geweld en alkoholmisbruik wat lank al bekend is.
Daar is egter nog ’n faktor betrokke by die hedendaagse toename in geweld. “Onthou”, waarsku ’n betroubare boek van profesieë, die Bybel, dat “daar in die laaste dae moeilike tye sal wees. Mense sal selfsugtig, hebsugtig, grootpraterig en eiewys wees; . . . hulle sal onvriendelik, onbarmhartig, lasteraars, gewelddadig en wreed wees; hulle sal die goeie haat; hulle sal verraderlik, roekeloos en opgeblase van trots wees . . . Bly weg van sulke mense” (2 Timoteus 3:1-5, Today’s English Version). Ja, die geweld wat ons vandag sien, is ’n vervulling van Bybelprofesieë oor “die laaste dae”.
Iets anders maak dit ’n besonder gewelddadige tyd. “Wee die aarde en die see,” sê die Bybel, “want die Duiwel het na julle toe neergedaal en het groot toorn, omdat hy weet dat hy ’n kort tydperk het” (Openbaring 12:12). Die Duiwel en sy demoonhordes is uit die hemel gewerp en spits hulle boosaardigheid nou op die mensdom toe. As “die heerser van die gesag van die lug” manipuleer die Duiwel “die gees wat nou in die seuns van die ongehoorsaamheid werk”, en sodoende dra hy daartoe by dat die aarde al hoe gewelddadiger word.—Efesiërs 2:2.
Hoe kan ons opgewasse wees teen die gewelddadige “lug” van die wêreld van vandag? En hoe kan ons verskille sonder geweld oplos?
[Lokteks op bladsy 3]
Tallose kinders word mishandel, geslaan of doodgemaak in een van die gewelddadigste plekke op die aarde—die huis!