Christene moet getuig
Die laaste jare het kerkleiers baie te sê gehad oor die nodigheid vir ’n Christen om te getuig. En tereg ook, want die woord „getuie”, en sy afleidinge, wat gebaseer is op die Griekse woord martýs, kom 47 keer in die Christelike Griekse Skrifte („Nuwe Testament”) voor. Kom ons beskou enkele van die verklarings wat uit die valse Christendom kom.
POUS JOHANNES PAULUS II word soos volg aangehaal in L’Osservatore Romano (weeklikse uitgawe in Engels) van 30 April 1984: „Getuienis, soos my voorganger Paulus VI beklemtoon het, ,is ’n onontbeerlike element van evangelisasie, en gewoonlik die eerste’ (Evangelii Nuntiandi, nr. 21). Dit is veral dringend in ons tydvak weens die desoriëntasie van verstande en die verdwyning van waardes wat ’n krisis skep wat al hoe duideliker ’n algehele beskawingskrisis is.” ’n Jaar tevore het nog ’n nommer van dieselfde koerant verslag gelewer oor ’n pouslike oudiënsie onder die opskrif: „Wêreldwerk het Christengetuies nodig.”
Die nodigheid vir getuieniswerk word dus deur die Rooms-Katolieke Kerk beklemtoon. Maar wat sê Protestantse woordvoerders oor die belangrikheid van getuieniswerk?
Die sesde Algemene Vergadering van die Wêreldraad van Kerke, wat nou 301 lede het, het van 24 Julie tot 10 Augustus 1983 in Vancouver vergader en later sy International Review of Mission (Oktober 1983) gepubliseer. Dit het ’n artikel van 36 bladsye met die titel „Getuieniswerk in ’n verdeelde wêreld” ingesluit. Onder ’n tussenhofie, „Alle Christene moet getuig”, het hierdie artikel onomwonde gesê: „Vir ’n Christen is die taak en daad om te getuig ’n reaksie op en ’n blyk van lojaliteit aan God. . . . Getuieniswerk is ’n goddelike opdrag. Ons getuig oor die oppermag en liefde van God die skepper en lewegewer.”
Die Baptiste- teologiese tydskrif Review and Expositor beklemtoon dit eweneens deur te sê: „’n Studie van die boek Handelinge toon dat nuwe gelowiges by die kerk gevoeg is omdat Christene getuig het. As daar nie nuwe bekeerlinge is nie, is dit heel waarskynlik omdat Christene nie getuig nie.”
Hoewel die sektes van die Christendom hopeloos verdeeld is waar dit kom by ideologie en leer, stem hulle skynbaar saam oor die nodigheid vir getuieniswerk. Maar kom hulle lidmate die verpligting om te getuig na?
In die verband skryf Michael Green, leraar van St. Aldgate-Kerk, Oxford, Engeland: „Ons voorvaders in die geloof is daarvan beskuldig dat hulle ,die hele wêreld omgekeer het’ met die goeie nuus wat hulle aan mense verkondig het oor Jesus (Handelinge 17:6). . . . Dit is in hierdie opsig dat ons so oneindig van die vroeë kerk verskil, waar elke man en vrou dit as sy of haar plig geag het om vir Jesus Christus te getuig deur elke middel tot sy of haar beskikking.”
’n Baptiste-boekie, Witnessing in Today’s World, sê: „’n Toegewyde Christen sal dalk sê: ,Maar ek sal nie weet waar om te begin om vir iemand anders te getuig nie.’” Dit voeg by: „Die onmiddellike reaksie van baie lidmate van die Baptiste-Kerk wanneer getuieniswerk ter sprake kom, is: ,Ons betaal die pastoor om dit te doen.’”
’n Westminster-publikasie, The Christian as Communicator, erken daarbenewens: „Die verantwoordelikheid om die evangelie aan ander oor te dra, word heel moontlik omseil bloot omdat Christene nie veel te sê het nie.”
Die lidmate van die Christendom se sektes het weliswaar ,nie veel te sê nie’. En dit is die kern van hulle probleem. Hulle het nie die hedendaagse vervulling herken van „die teken” wat Jesus gegee het aangaande sy „teenwoordigheid” in Koninkryksheerlikheid en „die voleinding van die wêreld” nie. Diegene wat daardie „teken” sien, word gedring om daaroor te getuig. Hoe bly kan ons tog wees dat ware Christene vandag baie te sê het en ywerig oor Jehovah se inkomende Koninkryk in die hande van Christus Jesus getuig.—Mattheüs 24:3-14, vgl. NW; Jesaja 43:12.