Die genesing van alle siektes—net ’n droom?
JOHANNES was ’n baie ou man. Hy was reeds ’n tyd lank op ’n klein eiland in ballingskap. Dit het gelyk of hy die res van sy lewe in afsondering sou slyt. Maar in daardie situasie het hy ’n boodskap vol bemoediging vir hom—en vir ons—ontvang.
In ’n buitengewone gesig het Johannes ’n groot stem uit die hemel hoor sê: „Kyk, die tabernakel van God is by die mense . . . God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan.”
Toe het hy ’n rivier met sprankelende, kristalhelder water gesien. Op die oewers het hy welige vrugtebome gesien. Die blare van die bome was vir die genesing van die nasies. Voorwaar ’n verfrissende ondervinding!
Gestel jy het gehoor en gesien wat Johannes gehoor en gesien het. Sou jy nie opgewonde gewees het om te hoor dat alle pyn en lyding eendag gaan ophou en dat alle siektes genees gaan word nie? Dit klink waarlik te goed om te glo!
Waarom dit so ongelooflik klink
Wat daar gebeur het, was ’n historiese gebeurtenis wat in die jaar 96 G.J. op die eiland Patmos naby die kus van hedendaagse Turkye plaasgevind het. Die bejaarde Johannes was die geliefde apostel van Jesus Christus, en hy het in die Heilige Bybel opgeteken wat hy gesien het.—Openbaring 1:9; 21:3, 4; 22: 1, 2.
Die meeste mense vind dit nietemin vandag moeilik om te glo dat daar ’n tyd gaan aanbreek wanneer daar nie meer siektes sal wees nie. Waarom? Weens die menslike natuur is ons geneig om enigiets wat van ons gewone ervaring verskil te verwerp.
Richard Fiennes, ’n patoloog van die Dierkundige Vereniging van Londen, het in sy boek Man, Nature and Disease die volgende oor die mens se lang stryd teen siekte geskryf:
„Is die einde van die stryd dan in sig? Die mens veg teen ’n hidra. Wanneer een kop afgekap word, verskyn ’n ander in sy plek. Ontydige siekte, onbekwaamheid en die dood is steeds die mens se dringendste probleme; terwyl tuberkulose, longontsteking en kraamdood in die verlede die probleme was, het koronêre hartkwaal, beroerte, kanker en ander siektes vandag hulle plek ingeneem.”
Die doders van „die verlede” is ook nie heeltemal uitgeroei nie. The Economist van Londen berig dat „een uit elke 10 mense in Asië, Afrika en Suid-Amerika in die een of ander opsig gebreklik is. Die meeste armes sal in hulle leeftyd aan siektes soos akute diarree en longontsteking ly. . . . Miljoene ander sal parasitiese siektes opdoen, soos malaria of schistosomiase (d.w.s. bilharzia [wat deur ’n bloedparasiet veroorsaak word]); ander sal deur melaatsheid aangetas word”.
Selfs in die ontwikkelde lande het ander koppe van die „hidra” deskundiges dronkgeslaan. „Dokters kom vandag te staan voor vreemde siektes wat selfs dodeliker kan wees as die klassieke doders soos pokke en witseerkeel”, skryf Edward Edelson in New York se Daily News.
’n Paar jaar gelede sou die letterwoord VIGS vir die meeste mense niks beteken het nie. Vandag weet feitlik almal van hierdie dodelike siekte, asook van Legioensiekte en toksieseskoksindroom. Ander moontlike doders wag agter die skerms: Ebolakoors, Lassakoors, Koreaanse hemoragiese koors, Reye-sindroom, Kawasaki-siekte, ensovoorts. „Iets wat herhaaldelik in die verhaal van hierdie vreemde siektes na vore kom, is die feit dat hulle vir die geneeskunde onopgeloste raaisels is”, sê Edelson.
Ondanks mediese vooruitgang berus die meeste mense in die opvatting dat siekte en die dood eintlik onvermydelik is. Dit is vir hulle moeilik om te dink dat daar ooit ’n tyd kan wees wanneer daar geen dood, pyn en siekte sal wees nie.
Wat dan van die aangrypende gesig wat Johannes gehad het? Sal dit op die ou end bloot ’n onvervulde droom wees? Ons het goeie rede om te glo dat dit nie die geval sal wees nie. Onmiddellik nadat Johannes die wonderlike beloftes gehoor het, het hy hierdie versekering ontvang: „Skryf, want hierdie woorde is waaragtig en betroubaar” (Openbaring 21:5; 22:6). Hoe sal hierdie woorde bewaarheid word? En sal ons die vervulling daarvan in ons leeftyd sien?
[Diagram/Kaart op bladsy 3]
(Sien publikasie vir oorspronklike teksuitleg)
Doders van die verlede besmet steeds groot gebiede
Melaatsheid
Melaatsheid en malaria