Kan die Bybel by veelwywery aangepas word?

IN Bijeen (Byeen), ’n Rooms-Katolieke tydskrif van Nederland, het rubriekskrywer Sjef Donders die konflik bespreek wat in sommige Afrikalande tussen die Bybel se gebod oor monogamie en die aanvaarde gebruik van veelwywery bestaan. Daardie konflik is opgelos, het hy gesê, deur “eenvoudig die kerkleerstelling [oor monogamie] ongeldig te verklaar”.

Ter toeligting van die kerk se dubbelsinnige beskouings het Donders die Amerikaanse priester, Eugene Hillman, ’n lid van die Holy Ghost Fathers, ’n Rooms-Katolieke orde wat aan die spits staan van Katolieke sendingwerk in Afrika, aangehaal. Hillman het in ’n boek oor veelwywery geskryf: “Indien daar ooit, weens die een of ander natuur- of mensgemaakte ramp, skielik feitlik geen mans meer is nie, maar feitlik net vroue is, sal daar beslis redes in die Bybel gevind word om hierdie mans toe te laat om omgang met verskeie vroue te hê.”

Sou daar? Ongeag die priester se vrysinnige beskouings moet veelwywery deur geen Christen goedgekeur word nie, ongeag nasionaliteit of omstandigheid. Monogamie was God se reëling vir die mens in Eden, en Jesus Christus het getoon dat dit weer vir die Christengemeente moet geld (Mattheüs 19:4-6). Die apostel Paulus het onder inspirasie geskryf: “’n Opsiener . . . moet onberispelik wees, die man van een vrou” (1 Timotheüs 3:2). En hy het alle Christene vermaan: “Vanweë die hoererye moet elke man sy eie vrou hê, en elke vrou moet haar eie man hê” (1 Korinthiërs 7:2). Dit laat geen grond vir veelwywery onder ware Christene nie.