Koninkryksverkondigers berig

Jehovah ‘laat dit groei’ in Fidji

JEHOVAH se seëninge op die getroue Koninkryksverkondigers op die pragtige Fidji-eilande is duidelik. Daar is nou 1 049 getuies van Jehovah op die eilande, ’n vermeerdering van 10 persent vergeleke met die vorige jaar. Hulle het geplant en natgemaak, en God het laat groei.a​—1 Korinthiërs 3:6, 7.

Die Wagtoringgenootskap se takkantoor berig dat “mense skielik in Bybelstudie belangstel”. Lede van een gemeente het in ’n afgesonderde dorpie gewerk waar hulle voorheen sleg ontvang is. Maar by hierdie geleentheid het die dorpshoof aangekondig dat alle dorpenaars tuis moet bly om na Jehovah se Getuies te luister en dat die vroue agterna vir die broers verversings by die gemeenskapsaal moes bedien. Toe ’n gewone pionier twee weke later terugkeer, het hy 28 mense gevind wat die Bybel wou bestudeer. Hierdie dorpie is sedertdien elke twee weke met die goeie nuus besoek om die belangstellendes te help. By elke besoek “is daar meer persone by die studies”.

Een van die 68 nuwelinge wat by ’n onlangse streekbyeenkoms gedoop is, was nege jaar lank ’n Sondagskoolonderwyser. Hy kom uit ’n baie godsdienstige gesin. Twee Getuies het hom in hulle bediening van huis tot huis ontmoet, en “na lang besprekings en talle herbesoeke is ’n studie uiteindelik begin”. Na twee maande se Bybelstudie het hy uit sy posisie as Sondagskoolonderwyser bedank, en hy het sy standpunt vir die waarheid ingeneem. Hy is ’n jaar later gedoop. Hy het die apostel Paulus se woorde geparafraseer en gesê: “Julle het moontlik gehoor van my ywer in valse godsdiens toe ek baie ywerig was vir die oorleweringe van my vaders. Maar nou het ek die waarheid gevind en is ek verheug om Jehovah saam met julle te dien.”​—Vergelyk Galasiërs 1:13, 14.

In 1984 het Fidji vir die eerste keer twee streekbyeenkomste gehad. Twee-en-twintig ouere manne van die hoofeiland het aangebied om op hulle eie onkoste met die program van die tweede, kleiner byeenkoms op ’n ander eiland te help. Die takkantoor het vervoer gereël en verwag dat 90 broers van die hoofeiland dit sou bywoon. Maar 115 het met ’n spesiale vliegtuig en 320 het per huurskip gereis. Een vlieënier het van die Getuies se goeie gedrag gesê: “Ek het verstom gestaan oor hulle gedrag, hulle bereidwilligheid om instruksies te gehoorsaam. Toe ek aangekondig het dat hulle die vliegtuig weens ’n meganiese fout moes verlaat, het hulle kalm en sonder om te brom of te kla van die vliegtuig afgestap. Toe hulle weer moes opklim, het hulle dit gelate en stil, sonder om te twis, gedoen. Ek wens alle lugpassasiers was soos julle mense.”

Die eerste masjinis van die huurskip het gesê: “Dit is aangenaam om julle mense as passasiers te hê, want julle is heeltemal anders as die Christenjeuggroep wat ons pas na ’n ander eiland vervoer het. . . . Julle is rein en inskiklike mense.” ’n Medepassasier het gesê: “Ek het iets gesien wat ek nog nooit ervaar het nie . . . Ek het op ’n koue dek geslaap toe een van julle susters vir my en my vrou haar matras gegee het om op te slaap. Ek het na so ’n godsdiens gesoek.” Hierdie persoon het die byeenkoms bygewoon om meer te sien en te leer.

Die goeie gedrag van al hierdie broers is in der waarheid wat ’n mens van ware Christene sou verwag. Jesus het gesê: “So dra elke goeie boom goeie vrugte” (Mattheüs 7:17). Dit is verblydend om die vermeerdering te sien wat Jehovah sy getroue aanbidders in Fidji gee. En nog baie sal ongetwyfeld gehoor gee aan die goeie nuus namate hulle verder luister en steeds die goeie gedrag van Jehovah se volk waarneem.

[Voetnote]