Die Bybel—prakties vir ons dag?
DIE wêreld het in die afgelope eeu dramaties verander. Die oorgang van die perdekardae na die moderne ruimte-eeu was so vinnig dat tegniese boeke dikwels verouderd is kort nadat hulle gedruk is. Aan die voorpunt is vooruitgang op die gebied van die wetenskap en die tegnologie. Hoewel digitale ontwerpe sowat 150 jaar gelede die eerste keer gebruik is, is dit slegs in onlangse jare dat rekenaars algemeen in gebruik geneem is en alles beheer, van die lansering van satelliete en ruimtetuie tot die balansering van huishoudelike begrotings. Dit is inderdaad verbasend! ’n Mens kan skaars tred hou met alles!
Baie van die veranderinge was voordelig. Hieronder is vooruitgang op die gebied van kommunikasie, vervoer, arbeidsbesparende toestelle en die geneeskunde. ’n Afgesnyde of afgekapte hand of vinger wat voorheen as heeltemal verlore beskou is, kan byvoorbeeld dikwels deur mikrochirurgie herstel word. Ons kan in net ’n gedeelte van ’n dag na die anderkant van ons aardbol vlieg en maande se reistyd spaar. Ons lewe waarlik in ’n nuwe tydperk in vergelyking met honderd jaar gelede—toe daar geen motors, radio’s, televisiestelle, rolprente, yskaste, wasmasjiene, vitamiene, antibiotika, entstowwe en honderde ander dinge was wat vandag algemeen aanvaar word nie.
Maar nie alles het tot ons voordeel gestrek nie. Die benutting van kernkrag hou byvoorbeeld ’n ernstige bedreiging deur middel van oorlog of deur bestraling vir die mensdom in. Wydverspreide chemiese besoedeling, ’n neweproduk van ons industriële tegnologie, vergroot daardie bedreiging. Onwettige dwelms en die hedendaagse dwelmkultuur saai verwoesting in talle lewens.
Die verandering in mense se lewens was die opmerklikste. Industrialisasie en die oorskakeling van die plattelandse na die stedelike lewe het die gesin laat verbrokkel. Mense—veral vroue en kinders—voel nou meer as ooit vry en onafhanklik. Vryheid van die beperkinge van voormalige sedes het tot nuwe lewenstyle en veranderde maatskaplike waardes gelei sodat dit nou baie anders is as die wat die wêreld duisende jare lank geken het.
Die Bybel is onveranderd
Waartoe kan ’n mens jou dan vir leiding wend? Watter raad is vandag toepaslik? Hedendaagse opvoedkundiges hersien gedurig hulle metodes en leerboeke om tred te hou met ons veranderende wêreld. Geestelikes en ander beroepsmense wysig hulle raad na gelang van wat gewild is en algemeen aanvaar word.
Die Bybel het andersyds duisende jare lank onveranderd gebly. Trouens, dit bevat streng waarskuwings om niks by te voeg by of weg te neem van die woorde wat daarin geskrywe is nie (Spreuke 30:5, 6; Openbaring 22:18, 19). Kan die Bybel as ’n praktiese gids vir ons moderne tyd aanvaar word?
Party sê nee. “Niemand sou die gebruik van ’n 1924-uitgawe van ’n skeikundeleerboek in ’n hedendaagse skeikundeklas voorstaan nie—te veel is sedertdien oor die skeikunde geleer”, skryf dr. Eli S. Chesen in sy boek Religion May Be Hazardous to Your Health. Hy sê voorts: “Baie is eweneens die afgelope paar duisend jaar oor sosiologie, filosofie en sielkunde geleer; die Bybel (wat baie oor hierdie onderwerpe te sê het) word nietemin as ’n gesaghebbende bron gebruik en selde hersien.”
Hy voeg by: “Ek is altyd verbaas wanneer ek iemand hoor praat oor die ‘wonder’ van hoe tydloos die Bybel is en hoe dit vandag nog net so betekenisvol is soos toe dit geskrywe is. Dit is ietwat soos ’n mens se verbasing oor die ‘akkuraatheid’ van astrologie. Die Bybel het so ’n sterk invloed uitgeoefen dat min mense dit ooit oorweeg om dit by te werk of weg te doen.”
Maar is die Bybel werklik verouderd in ons moderne wêreld? Of is die raad wat dit gee steeds prakties en sinvol vir ons tyd?