Koninkryksverkondigers berig
Bybelwaarheid bring gesinseenheid en geluk
’N EGPAAR in Indië, wat lidmate van ’n kerk van die Christendom was, het kort-kort rusie gemaak. Die man het dikwels sy vrou geslaan. Hulle het mekaar selfs probeer doodmaak! By een geleentheid het sy botterolie gekook en dit na hom toe gebring asof dit tee was, maar dit toe in sy gesig gegooi. Eindelik het die vrou besluit om selfmoord te pleeg.
Kon enigiets vir hierdie egpaar eenheid en geluk bring? Talle sou nee antwoord. Maar voor sy selfmoord gepleeg het, het die vrou haar dogter en skoonseun gaan besoek. Hulle het ’n Bybelstudie saam met Jehovah se Getuies gehad. Sy het besluit om te luister, en haar hart is diep geroer deur wat sy gehoor het. Na die studie het sy die Getuies van haar probleme vertel. Hulle het vir haar uit die Bybel getoon wat haar verantwoordelikhede as ’n vrou werklik is. Daar is ook met die man in aanraking gekom en ’n Bybelstudie is met hom begin. Die gevolg? Omdat die man sowel as die vrou Bybelbeginsels toegepas het, het hulle hulle gesinsprobleme te bowe gekom. Nou het die egpaar so ver gevorder dat hulle hulle lewens aan Jehovah toegewy het, en hulle is gedoop.
Tallose ander egpare het gevind dat God se geïnspireerde Woord wel die oplossing vir gesinsprobleme bevat. Deur die raad daarin, soos dié in Kolossense 3:12-14 en Efesiërs hoofstuk 5, toe te pas, kom hulle hierdie probleme te bowe en vind hulle eenheid en geluk.
□ Nog ’n voorbeeld van hoe Bybelwaarheid ’n gesin kan verenig, kom uit Libanon. In 1973 het een van Jehovah se Getuies ’n Bybelstudie met ’n gesin in ’n dorpie begin. Twee meisies, susters, in die buurt het ook die studie bygewoon. Maar toe die plaaslike priester die studie teengestaan het, het die gesin dit stopgesit. Die twee meisies het die studie per brief voortgesit deur hulle skoonsuster se adres te gebruik. Nadat hulle die briewe van die Getuie bestudeer het, het hulle dit vir hulle skoonsuster gegee om te lees, hoewel haar man teen daardie tyd daarteen gekant was. Wanneer hulle vrae gehad het, het hulle die Getuie per brief gevra.
Hulle broer was egter steeds daarteen gekant. Hy het sy susters en sy vrou se Bybelpublikasies opgeskeur en selfs hulle Bybels verbrand. Maar ondanks hewige teenstand van die familie, die priester en ander in die dorpie het die meisies aangehou om te studeer. Hulle is mettertyd gedoop. Ander familielede het ook die Bybel begin studeer en is gedoop. Die geopponeerde broer van die twee meisies het ook die waarheid geleer en is gedoop. Hy dien nou as ’n bedieningskneg in die gemeente en is ’n gereelde hulppionier. Teen die einde van 1985 het 23 lede van hierdie familie die waarheid geleer en is hulle gedoop!
Hoe bly is daardie twee susters tog dat hulle ondanks teenkanting aan die waarheid vasgekleef het! Wat ’n vreugde is dit tog vir hulle om die eenheid en geluk van hulle familie te sien omdat hulle Bybelwaarheid aanvaar het! Dit bevestig die woorde van die psalmis toe hy gesê het: “Welgeluksalig is die volk wie se God [Jehovah] is!”—Psalm 144:15.
□ Nog ’n ondervinding kom uit die stad New York, V.S.A. Hierdie man het dwelms begin gebruik toe hy 13 jaar oud was en het so verslaaf daaraan geraak dat hy nie eens kon eet totdat hy dagga gerook het nie! Sy kokaïengewoonte het R200 per dag gekos, en terwyl hy dwelms verkoop het, het hy altyd twee handgewere by hom gehad. Hy is getroud en het die vader van vier kinders geword. Toe sy vrou een van Jehovah se Getuies geword het, het hy haar teengestaan. Maar sy lewe van dwelmmisbruik en owerspel het hom naderhand begin verveel.
Danksy die voortdurende aansporing van sy vrou en die liefdevolle hulp van die ouere manne het hy ’n jaar na sy vrou se doop ingestem om die Bybel te bestudeer. Dit het hom gehelp om ernstige onttrekkingsprobleme, onder meer hallusinasies, die hoof te bied. Hy het vooruitgang gemaak en is gedoop, en smaak nou die vreugde dat sy gesin gelukkig verenig is en dat sy vier kinders in die waarheid vooruitgang maak. Met ’n vaste werk en ’n goeie inkomste sien hy en sy vrou daarna uit om aan die hulppionierdiens deel te neem.
[Lokteks op bladsy 21]
“Welgeluksalig is die volk wie se God [Jehovah] is!”—Psalm 144:15