Jubeling onder God se volk
DIE woorde van koning Dawid in Psalm 68 verse 3-5 sluit ’n hartlike uitnodiging aan alle liefhebbers van ware vryheid in: “Sing tot eer van God, psalmsing tot eer van sy Naam, vul die pad op vir Hom wat deur die woestynvlaktes ry: [Jehovah] is sy Naam; en jubel voor sy aangesig!” Watter groter voorreg is daar tog as om voor ons God te juig? (Jesaja 12:2, 3). Jehovah het sy getuies in 1986 op wonderlike wyse onderskraag terwyl hulle voortgegaan het om vryheid aan die nasies van die aarde te verkondig.
Die volgende bladsye bevat ’n opsomming van die wêreldwye bedrywighede van Jehovah se Getuies gedurende 1986. Dit gee voorwaar rede tot jubeling! Soos die syfers toon, het die verkondigerhoogtepunt in die 208 lande waar die Getuies aktief is tot 3 229 022 gestyg. Dit is ’n vermeerdering van 6,8 persent gedurende die jaar. Daar is 225 868 gedoop.
Die herdenking van Jesus se dood
Die opkoms by die belangrikste vergadering van die jaar, die herdenking van Jesus se dood, het tot minstens 8 160 597 gestyg, hoewel party rapporte weens die verslegtende wêreldtoestand nie ontvang is nie. Die getal wat die Gedenkmaalembleme gebruik, het tot 8 927 gedaal namate die ouer gesalfdes hulle diens op aarde voltooi het.—Openbaring 2:10.
Baie wat in gehoorsaamheid aan Jesus se bevel bymekaargekom het, het voorbeeldige moed aan die dag gelê (1 Korinthiërs 11:23-26; Johannes 16:33). In ’n Afrikaland waar daar ’n verbod op Jehovah se werk is, het die gemeente in ’n suster se huis vergader om die Gedenkmaal te vier. Die toespraak was net agt minute aan die gang toe plaaslike amptenare opgedaag het om die broers in hegtenis te neem. Hulle het die broers beveel om die vergadering te staak. Die broers het vriendelik maar ferm daarop aangedring dat hulle hierdie Herdenking van Jesus se offerdood moet vier. Nadat hulle met die polisie geredeneer en by hulle gepleit het, is hulle toegelaat om ten aanhore van die offisiere voort te gaan. Die vergadering is vreedsaam afgesluit, en almal is toe in hegtenis geneem. Na ondervraging is vyf aangehou. Hulle het ’n ruk lank in die tronk gebly, maar is daarna vrygelaat, bly dat hulle die Here se Aandmaal kon vier!—1 Johannes 5:3, 4.
In Nigerië, waar die Getuies tot 128 461 vermeerder het, is die Gedenkmaal deur 394 370 bygewoon—’n rekordopkoms. Een Gedenkmaal is op die bouperseel van die nuwe Bethelkompleks in Igieduma gehou, en meer as 700—bykans die hele dorp—was daar!
Uit Mexiko kom dié berig: “Waar ons ook al in die land gaan, loop die verkondigers eenvoudig oor van geesdrif, en dit lyk of die hele land vuur en vlam vir die waarheid is. Die waarheid is die spil waarom die broers se lewens draai. Hele gesinne kom in die waarheid. ’n Groot persentasie van die mense wat studeer, begin terselfdertyd vergaderinge bywoon. Dit help hulle om vinnig vooruitgang te maak.” Mexiko het ’n Gedenkmaalopkoms van 838 467 gerapporteer. In Augustus het die 198 003 Koninkryksverkondigers in daardie land 327 664 Bybelstudies in die huise van mense gehou. Watter potensiaal vir verdere vermeerdering is daar tog!
Verdere uitbreiding wêreldwyd
Uit die hartjie van die Christendom kom soortgelyke rapporte van uitbreiding. Italië het in Augustus ’n hoogtepunt van 139 570 verkondigers bereik, en 301 009 het die Here se Aandmaal gevier. Jehovah se Getuies laat inderdaad ‘hulle lig voor die mense skyn’ (Mattheüs 5:16). Byvoorbeeld: “’n Suster was besig om geld in ’n kaartjiesmasjien op ’n bus te gooi toe ’n kennis vir haar sê dat dit nie nodig is om ’n kaartjie te koop nie aangesien die rit so kort is. Die suster het verduidelik dat dit reg is om vir die kaartjie te betaal, al is dit net tot by die volgende halte. Daarna het haar vriendin van die bus afgeklim. Toe het die busbestuurder hom tot haar gewend en gesê: ‘Is jy een van Jehovah se Getuies?’ ‘Ja’, het die suster geantwoord, ‘hoekom vra jy?’ ‘Ek het julle gesprek oor die betaal van die buskaartjie gehoor, en ek weet dat Jehovah se Getuies van die baie min mense is wat dit wel doen en in alle dinge eerlik is.’ ’n Paar maande later het ’n man die suster by ’n vergadering genader en gesê: ‘Ken jy my? Ek is die busbestuurder wat met jou oor die betaal van die kaartjie gepraat het. Weens jou gedrag het ek besluit om die Bybel saam met Jehovah se Getuies te begin studeer.’”
Brittanje het ’n hoogtepunt van 107 767 Koninkryksverkondigers gehad, en hierdie pasgedoopte broer tel onder hulle: “George is nou 84 jaar oud. Nadat hy 50 jaar lank ’n lekeprediker in die plaaslike kerk was, het hy tot ’n kennis van die waarheid gekom. Aanvanklik het hy, nadat hy met sy tuisbybelstudie klaar was, hom na ’n ander vertrek gehaas om ’n sigaret te rook. Hy het 70 jaar gerook. Maar nadat hy hoofstuk 26 van die boek Jy kan vir ewig in die Paradys op aarde lewe bestudeer het, het hy nooit weer gerook nie. George is nou al meer as ’n jaar gedoop en is baie ywerig in die velddiens, om ander te vertel van die seëninge wat Jehovah in Sy nuwe stelsel gaan bring.”
Die Bondsrepubliek van Duitsland rapporteer ’n hoogtepunt van 118 645 verkondigers. Daar is ook duisende getroue Getuies in die aangrensende Duitse Demokratiese Republiek wat hulle ‘lig laat skyn’. In Duitsland weier getroue bejaardes om “die swaard van die Gees” neer te lê (Efesiërs 6:16, 17). ’n Gemeente berig: “Ons het ’n suster wat 103 jaar oud is en nog steeds alleen woon. Die ouere manne het gereël dat ’n groep van sewe tot agt susters beurte maak om elke week vir haar te sorg. Hulle doen dit nou al die afgelope drie tot vier jaar. Maatskaplike werksters, wat deur die gemeenskap betaal word, kom om haar te bad en aan te trek. Maar wanneer hulle siek of op vakansie is, neem ons susters die werk oor. Hierdie blyk van Christelike liefde en opoffering het ’n goeie getuienis aan buitestaanders gelewer. Ons 103-jarige suster is helder van verstand en beskou die maatskaplike werksters as haar ‘gebied’. Sy preek land en sand vir hulle terwyl hulle haar bad en gee vir hulle lektuur.” Voorwaar, ‘grysheid is ’n sierlike kroon as dit gevind word op die weg van geregtigheid’.—Spreuke 16:31.
Die uitnodiging om Jehovah te loof, word egter gerig aan mense van alle ouderdomme—“jongelinge en ook jongedogters, oues saam met die jonges”. Baie jongmense ‘dink aan hulle Skepper in die dae van hulle jonkheid’ (Psalm 148:12; Prediker 12:1). In Brasilië, waar daar ’n uitstekende hoogtepunt van 196 948 verkondigers was, het die Wagtoringgenootskap ’n brief uit ’n afgeleë dorp ontvang waar twee jong broers ’n paar maande lank getuig het. Dit het onder meer gesê: “Ek wil julle graag prys vir die goeie jongmense wat julle in julle kerk het. As onderwyser het ek met jongmense te doen, en ek weet dat hulle nie meer is wat hulle was nie. Julle jongmense is werklik voorbeeldig. Hulle respekteer ouer mense, is hoflik en trek beskeie aan. En ken hulle nie hul Bybel nie! Dit is inderdaad godsdiens! Dit is jammer dat hulle moet gaan.” Getuiegesinne verhuis nou permanent na party van hierdie afgesonderde gebiede om na die belangstelling om te sien.
Hoe vaar die waarheid in nie-Christelike gebiede? The Wall Street Journal van 9 Julie 1986 het ’n lang artikel gepubliseer onder die opskrif “Onvrugbare grond—Christensendelinge saai die saad in Japan maar vind min groei”. ’n Sendeling van die Verenigde Kerk van Christus het volgens berig gesê: “Daar is geen manier waarop die Christelike godsdiens ooit regtig in Japan sal posvat nie.” En ’n Franciskaanse priester het gesê: “Die dag van die buitelandse sendeling in Japan behoort tot die verlede.” Albei het meer as 30 jaar lank tevergeefs gearbei. Die artikel het gesê: “Minder as 1% van die bevolking is Christene, en ondanks al die sendingwerk daal die persentasie.” Dit is wat die Christendom se godsdienste betref! Maar wat van Jehovah se Getuies, wat die ware Christelike leer in daardie land verkondig? Die getal bedrywige verkondigers het die afgelope 92 maande ná mekaar vermeerder, tot ’n hoogtepunt van 113 062 (asook’n gemiddelde van 46 390 voltydse “pioniers” elke maand). In Japan word daar 146 316 tuisbybelstudies met belangstellendes gehou. Dit is inderdaad ’n voorloper van verdere vermeerdering. Hier sien ons ’n lewende vervulling van Jesaja 65:13, 14.
Die pionierveld
Wat van die middelpunt van al hierdie dinamiese aktiwiteit—die Verenigde State van Amerika? Daar het 744 919 Koninkryksverkondigers in die veld vir ’n hoogtepunt gesorg. Maar is sulke ‘sendelinge tuis’ werklik nodig? Hulle is beslis, aangesien misdaad, dwelmmisbruik, onsedelikheid, siekte en vedorwenheid in ’n baie erger graad toeneem as in die meeste sogenaamd heidense lande. Mense wat na beter dinge verlang, het vertroosting en hoop nodig, en Jehovah se Getuies verkondig so ’n boodskap (Jesaja 61:1, 2; Mattheüs 24:14). In 1986 het hierdie bedienaars in die Verenigde State 146 673 490 uur aan die verkondiging van die goeie nuus van die Koninkryk gewy. Dit kom neer op ’n vermeerdering van 12,6 persent, of 16 449 229 uur meer as verlede jaar. Daardie tyd is met vrug benut, want 6 138 938 boeke is versprei, en dit is 23,2 persent meer as die vorige jaar. In April alleen is meer as 1 000 000 boeke versprei wat die ware hoop vir vrede en veiligheid verduidelik.
Een van die opwindendste kenmerke van die Verenigde State se rapport is die vermeerdering in pioniers. In April was daar ’n hoogtepunt van 45 786 gewone pioniers, ’n vermeerdering van 23 persent vergeleke met verlede jaar. Wanneer daardie syfer by die gemiddelde van 43 369 hulppioniers en die gemiddelde van 279 spesiale pioniers getel word, beteken dit dat meer as 90 000 pioniers elke maand die Koninkryk van God verkondig het. Hulle is jongmense, en ouer persone ook, wat hulle tyd wyslik gebruik om Jehovah te loof.
Lewer ’n deeglike getuienis
Terwyl die apostel Paulus in die openbaar en van huis tot huis onderrig het, het hy “deeglik getuienis afgelê” oor die goeie nuus (Handelinge 20:20, 21, NW). Dieselfde getuienis word vandag in baie gebiede gegee. Hierdie berig kom byvoorbeeld van Guadeloupe: “Teen die einde van die diensjaar het ons een verkondiger vir 72 mense gehad. Onnodig om te sê, ons is dwarsdeur die land meer as welbekend! Trouens, op baie plekke werk ons meer as een keer per week in dieselfde gebied. Party meen dalk dat mense seker moeg word om ons te sien of dat dit ons ontmoedig om week na week in dieselfde gebied te wees. Maar inteendeel, hoe meer ons in die gebied werk, des te meer belangstelling word gewek. En die bewys? Wel, dit is verlede April se hoogtepunt van 7 136 tuis bybelstudies wat deur ons 4 558 verkondigers gehou is! Onlangs het hierdie opskrif in ’n tydskrif verskyn: ‘Jehovah se Getuies—Konings van deur tot deur!’ Ons beskou dit as ’n eer. Gedurende die diensjaar is 458 nuwe broers en susters gedoop.” As ons ons gebied getrou en blymoedig oor en oor dek, die mense leer ken en vriende met hulle maak en hulle vooroordeel liefdevol afbreek, sal ons talle regskape persone vind.
Jehovah seën sy knegte ryklik in ’n Afrikaland waar daar ’n verbod op die werk is en ’n burgeroorlog woed. In daardie land ly baie van ons broers in tronke, en party jong Getuies is al tereggestel. April het nogtans ’n uitsonderlike rapport opgelewer, met tien hoogtepunte. Die nuwe verkondigertal is ’n vermeerdering van 29 persent in vergelyking met verlede jaar. Watter ywer toon hierdie dierbare broers tog! Die verkondigers het in April gemiddeld 18 uur gewerk en gemiddeld 2,6 tuisbybelstudies gehou.
Die takkantoor wat oor hierdie gebied toesig hou, het ’n kriptiese boodskap ontvang wat ons ’n goeie idee gee van die heersende toestand. Dit lui: “Die hitte is nog skroeiend. Die inspanning wat dit verg om uit te gaan en iemand te sien, bewys dat ons ’n hittegolf ondervind. Maar ons weet dat ons so gemaak is dat ons ons by enige temperatuur en enige omgewing kan aanpas. Ondanks alles volhard ons en vertrou ons dat ons dit sal oorleef.” Watter onkreukbaarheid tog!
Individuele handhawers van onkreukbaarheid sorg vir ’n onkreukbare organisasie. Dit is presies wat die wêreldwye organisasie van 3 229 022 getuies van Jehovah is! Hulle sien uit daarna om die naderende “groot verdrukking” te oorleef en onder Christus se Koninkryk ’n deel te hê in die groot werk om hierdie aarde in ’n paradys om te skep (Openbaring 7:14; 21:3, 4; Jesaja 65:17, 21-23, 25). Hulle jubel oor die manier waarop Jehovah nou reeds hulle ywerige bedrywigheid seën, hetsy hulle die woord “in gunstige tyd” of “in moeilike tyd” verkondig (2 Timotheüs 4:2, NW). Die bladsye hierna toon hoe hulle ag gegee het op die tema van hulle jaarteks vir 1986: “Gaan . . . verkondig die koninkryk van God.”—Lukas 9:60.
[Venster/Prent op bladsy 7]
’n Paar glanspunte van die wêreldrapport van Jehovah se Getuies
Vermeerdering:
Verkondigerhoogtepunt: 3 229 022 6,8%
Gemiddelde aantal pioniers elke maand: 391 294 21,2%
Aantal ure in predikingswerk: 680 837 042 15,3%
Gemiddelde tuisbybelstudies elke maand: 2 726 252 14,6%
Aantal gedoop in 1986: 225 868 19%
[Tabel op bladsy 10-13]
WÊRELDRAPPORT VAN JEHOVAH SE GETUIES VIR DIE 1986-DIENSJAAR
(See bound volume)
[Prente op bladsy 8, 9]
GETUIENISWERK “IN DIE OPENBAAR EN VAN HUIS TOT HUIS” “TOT AAN DIE UITERSTE VAN DIE AARDE”
Davao Filippyne
Venesië Italië
Castle Combe Engeland
Kowloon Hongkong
Gålå Noorweë
Taipei Taiwan
Queenstown Nieu-Seeland
Bolgatanga Ghana
Parys Frankryk
Quetzaltenango Guatemala
Kerala Indië
Banff Kanada