Getuieniswerk bring Koninkryksvermeerdering
„Mag die HERE . . . by julle byvoeg duisend maal soveel as wat julle is, en julle seën soos Hy julle beloof het!”—DEUTERONOMIUM 1:11.
1, 2. (a) Wat het Jehovah vir Israel beloof? (b) Hoe het hy sy beloftes vervul, maar waarvan het dit afgehang?
DUISENDVOUDIGE VERMEERDERING! Dit is wat Moses gebid het met Jehovah se „heilige nasie”, Israel, moes gebeur. Jehovah het groot dinge vir daardie nasie beloof. (Exodus 19:5, 6; kyk ook Genesis 12:2, 3.) Het hy daardie beloftes vervul?
2 Wel, om en by 500 jaar nadat Moses die bogemelde woorde geuiter het, is daar berig: „Juda en Israel was talryk soos die sand wat aan die seestrand is in menigte; hulle het geëet en gedrink en was bly.” Die koningin van Skeba, wat van ver gekom het om die luister van daardie koninkryk te aanskou, het teenoor Salomo uitgeroep: „Kyk, die helfte is my nie meegedeel nie. U oortref in wysheid en in welvaart die gerug wat ek gehoor het. . . . Geloofd sy die HERE u God . . . Omdat die HERE Israel vir ewig liefhet” (1 Konings 4:20; 10:7-9). Solank daardie volk getrou as Jehovah se getuies gedien het, het hy hulle inderdaad voorspoedig gemaak en hulle vermeerder.
3. (a) Wat het Petrus gesê oor God se „volk . . . vir sy Naam”? (b) Waarom is die naam Jehovah se Getuies vir daardie volk gepas?
3 Meer as duisend jaar na Salomo se dag het die apostel Petrus, terwyl hy voor die Christelike bestuursliggaam in Jerusalem getuig het, „vertel hoe God in die begin uitgesien het om ’n volk uit die heidene . . . vir sy Naam aan te neem” (Handelinge 15: 14). Die Israeliete was ’n volk vir God se naam. Maar nou het God weer „’n volk . . . vir sy Naam”—die Christengemeente, geestelike Israel—versamel wat ook vir Jehovah sou getuig en sy Koninkryksvoornemens sou bekendmaak (Galasiërs 6:16). Hierdie volk word vandag gepas wêreldwyd herken aan die naam wat Jehovah self in Jesaja 43:10-12 laat uitstaan—‘Jehovah se Getuies’. Wat behels dit om ’n volk vir Jehovah se naam te wees?
„Witnesses of Me”
4. (a) Waarom moet Jehovah se Getuies ook ,Jesus se getuies’ wees? (b) Watter voorbeeld oor hoe om vir Jehovah te getuig het Jesus vir ons in die Skrif nagelaat?
4 Jesus self het hierdie volk gemagtig en gesê: „Julle sal my getuies wees . . . tot aan die uiterste van die aarde” (Handelinge 1: 8). „My getuies”—beteken hierdie woorde van Jesus dat daar slegs vir Jesus getuig moet word en nie vir Jehovah nie? Glad nie! Op daardie kritieke tyd, toe Jehovah se guns van vleeslike na geestelike Israel verplaas is, was dit nodig om ’n deeglike getuienis te gee aangaande die Christus op wie hierdie nuwe reëling gebou is. Maar Jesus bly altyd ondergeskik aan sy Vader. Hy het vir ons die voorbeeld gestel deur vir Jehovah se naam en Koninkryk te getuig.—Johannes 5:30; 6:38; 17:6, 26; 18:37.
5. (a) Omtrent watter aspekte wat met Jesus verband hou, moet ons getuig? (b) Hoe volg ons sodoende in Jesus se voetstappe?
5 Jesus Christus is die Middelaar van die nuwe verbond, en gesalfde Christene in hierdie verbond word geroep om die Koninkryk te beërf. Hy is „die Leidsman tot die lewe” wat Jehovah gebruik om die mensdom uit die dood vry te koop. Jesus „moet as koning heers” totdat al God en die mens se vyande onderwerp is en ’n glorieryke paradys op hierdie aarde herstel is. Hy is „die Seun van God” wat die dode by die opstanding uit hulle grafte roep (Hebreërs 9:15; Handelinge 3:15; Psalm 110:1, 2, 5; 1 Korinthiërs 15:25-28; Lukas 23:42, 43; Johannes 5:25-29). As Jehovah se Getuies getuig ons gevolglik ook oor die Seun se besondere rol in die regverdiging van Jehovah se naam. Deur dit te doen, volg ons in die voetstappe van ons Heer, wat self die voortreflikste getuie vir Jehovah—„die getroue getuie”—was.—Openbaring 1:5; 3:14; Johannes 18:37; 1 Petrus 2:21.
Wie getuig?
6. (a) Wie alleen lewer vandag die Koninkryksgetuienis? (b) Hoe kan daar gesê word dat hulle „groter werke” doen?
6 ’n Verenigde volk getuig vandag „tot aan die uiterste van die aarde”. Dit is die volk waarvan die apostel Petrus gepraat het—die ,volk vir God se naam’—wat getuig vir Jehovah en sy Koninkryk in die hande van Christus Jesus. Hieromtrent het Jesus self vir sy dissipels gesê: „Wie in My glo—die werke wat ek doen, sal hy ook doen; en hy sal groter werke doen as dit, omdat Ek na My Vader gaan” (Johannes 14:12). Van sy Vader se regterhand in die hemele af rig die Koning Jesus Christus nou die omvattendste getuienis wat ooit hier op aarde gelewer is. Net soos Jesus voorspel het, word „hierdie evangelie van die koninkryk . . . in die hele wêreld tot ’n getuienis vir al die nasies [verkondig]; en dan sal die einde kom”.—Mattheüs 24:14.
7. (a) Waarom getuig die Christendom se sektes nie? (b) Waarom is Jehovah se Getuies, in teenstelling daarmee, so ywerig in hulle diens?
7 „Hierdie evangelie van die koninkryk” is die aangrypendste nuus wat nog ooit aan mense verkondig is. Dit is die heerlike goeie nuus waaroor die godsdienssektes van die Christendom nie ’n woord rep nie. Hulle het geen Koninkrykshoop vir die toekoms nie. Geen wonder dat hulle versuim om te getuig nie! Hulle het nie ag geslaan op die opwindendste gebeurtenis in die hele geskiedenis nie—die koms van die Seun van die mens in Koninkryksheerlikheid om op sy heerlike troon te gaan sit en die nasies en volke van die aarde te oordeel. Dit is iets om oor te getuig! Onder die leiding van die engele verkondig getuies vir Jehovah en sy Christus nou „’n ewige evangelie . . . aan die bewoners van die aarde en aan alle nasies en stamme en tale en volke”. Neem jy ywerig aan hierdie getuieniswerk deel?—Openbaring 14:6, 7; Mattheüs 25: 31-33.
’n Wonderlike getuienis in 1984
8. (a) Waarom moet ons bly wees oor die Rapport vir die 1984-diensjaar? (b) Wat trek nuwe dissipels?
8 Die Wêreldrapport van Jehovah se Getuies vir die 1984-diensjaar, wat op bladsye 20-23 van hierdie tydskrif verskyn, toon hoe oorvloedig ons God, Jehovah, die pogings van sy nederige getuies seën. Altesaam 203 lande word verteenwoordig. En 172 van hierdie lande berig ’n vermeerdering in verkondigers. Hierdie Koninkryksverkondigers spreek ook blymoedig van hoe ,die Here hulle ryk en oorvloedig gemaak het in liefde vir mekaar en vir almal’ (1 Thessalonicense 3:12). Die liefdevolle eenheid onder Jehovah se volk, asook die Koninkryksgetuienis, trek ’n mag der menigte nuwe dissipels. Vir hulle sê Jesus: „Julle sal die waarheid ken, en die waarheid sal julle vrymaak.”—Johannes 8:31, 32.
9. (a) Hoe was jy bevoorreg om ’n aandeel in hierdie rapport te hê? (b) Wat toon die syfers oor Jehovah en sy volk?
9 Hoe is hierdie wonderlike diensrapport saamgestel? Dit is saamgestel uit die velddiensrapporte wat jy—die individuele Koninkryksverkondiger—getrouelke maand ingegee het. Is jy nie bly dat jy ’n klein aandeel aan hierdie wonderlike rapport gehad het nie? Hierdie syfers toon op watter wonderlike wyse Jehovah ,’n oorvloed seëninge uitgestort het’ op sy Getuies—hierdie „volk . . . vir sy Naam”— wat hy verenig het in ’n wêreldwye band van liefdevolle diens.—Maleagi 3:10; Psalm 56:11, 12; Kolossense 3:14.
10. (a) Wat beklemtoon dat getuies selfopofferend moet wees? (b) Wat sê die Skrif oor handhawers van onkreukbaarheid en hulle beloning?
10 Baie van hierdie getuieniswerk word ondanks vervolging of ontbering en met groot selfopoffering gedoen. Dit is wat ons kan verwag, want die woord „getuie” is hier ’n vertaling van die Griekse martýs of martyr. Vandaar ook die Engelse woord „martyr”, wat sien op iemand wat deur sy dood getuig. Dit beklemtoon dat ons, as Jehovah se Getuies, selfopofferend en vasbeslote moet wees om onsself in te span en onder alle omstandighede onkreukbaarheid te bewaar, selfs tot die dood toe, indien nodig.—Lukas 9:23; vergelyk Job 2:3; 27:5; 31:6; Handelinge 22:20; Openbaring 2:10.
Handhawers van onkreukbaarheid word geseën
11, 12. (a) Watter onderskragende versekering bied Jehovah ons? (b) Hoe het sy volk oor totalitêre verdrukking geseëvier?
11 Ten tye van vervolging het Jehovah se ,naamvolk’ „krag bo die normale” nodig gehad om die heftige aanvalle van Satan en sy demonhordes af te slaan. Jehovah voorsien daardie krag en verlos sy getroue getuies en maak hulle voorspoedig (2 Korinthiërs 4:7-9, NW; Jesaja 54:17; Jeremia 1:19). Beskou byvoorbeeld die situasie in die Spilmoondhede van die Tweede Wêreldoorlog, met Duitsland, Italië en Japan aan die hoof. Deur van wrede diktatorskappe gebruik te maak, het die Duiwel ’n „rivier” van vervolging ,uit sy bek uitgegooi’ om die getuieniswerk onder leiding van God se hemelse vrouagtige organisasie te verswelg. Maar het Satan daarin geslaag om dit te doen? Glad nie! Jehovah het sake so bestier dat die demokratiese nasies van die aarde daardie vloed opgesluk het. ,Die goddelose is uitgeroei’ en Jehovah se lojale getuies is nou wonderlik voorspoedig in daardie lande.—Openbaring 12:15, 16; Psalm 37:28, 29.
12 In daardie drie lande was dit onlangs vir die Wagtoringgenootskap nodig om groot fabrieke te bou en toe te rus om ’n ander soort vloed uit te stuur—miljoene der miljoene Bybels en verwante Koninkrykspublikasies tot stigting van Jehovah se Getuies en ander mense wat na die waarheid honger. In Duitsland, Italië en Japan dra meer as 300 000 verkondigers van die Koninkryk vandag die getuienis na mense uit. En deur die hele wêreld heen seën Jehovah sy onkreukbaarheidhandhawende volk met vermeerdering!—Vergelyk Psalm 115:12-15.
13. (a) Wat in die Jaarrapport toon dat getroue getuies die jaarteks van 1984 nageleef het? (b) Hoe behoort dit ons aan te spoor?
13 Maar omdat die Duiwel weet dat hy min tyd het, gaan hy voort om oorlog te voer teen diegene „wat die gebooie van God bewaar en die getuienis van Jesus Christus hou” (Openbaring 12:12, 17). Satan se teenstand is veral venynig in die lande wat in die bygaande verslag as „28 ander lande” aangegee word. Getuies in hierdie gebiede het ons jaarteks van 1984 getrou nageleef deur ,dit des te meer te waag om die woord van God onbevrees te spreek’ (Filippense 1: 14). Hulle verkondigervermeerdering van 3,1 persent is baie prysenswaardig. Mag ons almal deur hulle voorbeeld aangespoor word om ywerig voort te gaan om „aan God ’n lofoffer [te] bring, dit is die vrug van die lippe wat sy Naam bely”.—Hebreërs 13:15.
14. (a) Wat sal vir ons „op ’n getuienis” uitloop? (b) Ondanks watter situasies moet ons voortgaan om moedig te getuig, en waarom?
14 Namate wêreldtoestande versleg, sal ander van ons ongetwyfeld vervolg, voor die hof gedaag en in die tronk opgesluit word. Jesus het gesê dat onder meer sulke dinge „gaan gebeur” voordat die einde kom, en het bygevoeg: „Dit sal vir julle uitloop op ’n getuienis.” Jehovah se Getuies moet dus voortgaan om in alle situasies vir God en Christus te getuig. Baie hou aan om dit te doen ondanks bittere gesinsteenstand, bespotting deur medewerknemers of medeskoliere, en smaad wat hulle in hulle predikingsgebied aangedoen word. Getuig jy moedig ondanks moeilike omstandighede? Dan is jy een van die vir wie Jesus sê: „Deur julle volharding moet julle jul lewe in besit kry.”—Lukas 21:7, 9-19.
Koninkryksvermeerdering!
15. Wat is van die uitsonderlike aspekte in die tabel op hierdie bladsy?
15 „Koninkryksvermeerdering”—watter gepaste tema tog vir ons streekbyeenkomste van 1984! Dit was inderdaad ons beste jaar van vermeerdering. Kyk net na die tabel op hierdie bladsy! Dit is saamgestel uit die rapporte van die 95 takke van die Wagtoringgenootskap wat toesig hou oor die getuieniswerk in 203 lande.
16. Meld van die tipiese vreugdevolle betuigings van rondom die aardbol.
16 Ruimte laat ons nie toe om al die skriftelike betuigings van vreugde te publiseer wat ons saam met hulle jaarrapporte van daardie takkantore ontvang het nie, maar hier is ’n paar van dwarsoor die aardbol:
Alaska: Die hele dorp Metlakatla het kom kyk hoe 230 van Jehovah se Getuies ’n pragtige Koninkryksaal in 32 uur bou; dit is op die Sondag van daardie selfde naweek toegewy.
Honduras: 3 663 verkondigers was die grootste hoogtepunt in ons geskiedenis; met ’n Gedenkmaalopkoms van 17 005 is daar nog baie werk.
Brasilië: Nuwe hoogtepunte het uitgeloop op 160 927 verkondigers, en 474 450 persone het die Gedenkmaal bygewoon.
Thailand: Die pioniergees is lewend. In April was 22 persent van al die verkondigers in hierdie diens.
Papoea Nieu-Guinee: Die hoogtepunt in hulppioniers het met 91 persent toegeneem; die Gedenkmaalopkoms het met meer as 1 000 toegeneem—tot 7 704.
Oostenryk: Die pioniergees wen veld, en ons het vyf opeenvolgende hoogtepunte op daardie terrein gehad; sewe verkondigerhoogtepunte gehad, en die laaste was 15 618.
Zambië: Ons het ’n nuwe hoogtepunt van 58 925 verkondigers bereik; die Gedenkmaalopkoms was 393 431—110 447 meer as verlede jaar.
17. (a) Hoe brei die pioniergeledere uit? (b) Watter praktiese doelwitte word aanbeveel, en vir wie? (c) Wat is die nuwe verkondigerhoogtepunt, en wat kon daartoe bygedra het?
17 Verslae toon dat getroue sendelinge en pioniers steeds die leiding gee deur die getuienis na nuwe en ou gebiede te neem. Dit is inderdaad bemoedigend om die vermeerdering in pioniers te sien. Die getal hulppioniers wat in April gerapporteer het, het opgeskiet tot ’n nuwe hoogtepunt van 323 644—’n vermeerdering van 49 persent. Heelparty van hulle het hulle voorreg om gewone pioniers te word, benut. Daarbenewens maak baie van ons jong Koninkryksverkondigers die pionierdiens hulle doelwit en tref hulle praktiese voorbereidsels daarvoor gedurende hulle laaste jare op hoërskool. Die gesamentlike resultaat word getoon in die pragtige vermeerdering in pioniers. Dit het ook gehelp om ’n gees van ywer in ons gemeentes op te bou en het ongetwyfeld bygedra tot die nuwe wêreldhoogtepunt van 2 842 531 verkondigers, ’n vermeerdering van 7,2 persent vergeleke met die hoogtepunt van 1983. Is jy nie bly dat jy ’n deel gehad het aan hierdie vooruitgang nie?
18. (a) Watter ander wonderlike vermeerderinge was daar in 1984? (b) Op watter potensiaal vir uitbreiding dui die Gedenkmaalverslag, en hoe kan ons lesers reageer?
18 Die vreugdevolle getuienis wat gedurende 1984 gelewer is, word ook weerspieël in die groter verspreiding van tydskrifte en ander lektuur, die rekordgetal velddiensure wat gerapporteer is, die voortreflike vermeerdering in herbesoeke by belangstellendes en in tuisbybelstudies wat met hierdie persone gehou word. Hoe sien ons tog uit na die verdere vrugte van hierdie ywerige diens! En daar is groot potensiaal vir ’n steeds groter insameling! Dit word getoon deur die merkwaardige opkoms by die HERE se Aandmaal op 15 April verlede jaar. In die gemeentes van Jehovah se Getuies rondom die aarde het altesaam 7 416 974 dit bygewoon, waarvan 9 081 aangedui het dat hulle lede van die Here se „klein kuddetjie” is deur die brood en die wyn te gebruik. Mag al ons lesers voortgaan om geestelik te groei sodat hulle plek kan maak vir deelname aan die wonderlike getuienis en insameling wat nog voorlê.—Vergelyk Efesiërs 4:15; Filippense 1:9-11.
19. Waarvoor kan ons Jehovah dank, en wat is ons gebed ten opsigte van die toekoms?
19 Ons kan inderdaad Moses se woorde herhaal deur van Jehovah se Getuies, die hedendaagse „volk . . . vir sy Naam”, te sê: „Die HERE julle God het julle vermenigvuldig; en kyk, julle is vandag soos die sterre van die hemel in menigte” (Deuteronomium 1:10). Dit is ons bede dat ons soewereine Heer, Jehovah, sal voortgaan om die Koninkryksgetuienis voorspoedig te maak en ons nog meer sal laat toeneem!
Wat sou jy sê?
◻ Waarom moet Jehovah se Getuies ook ,Jesus se getuies’ wees?
◻ Watter wonderlike getuienis is gedurende 1984 gelewer?
◻ Wat toon dat Jehovah getroue getuies seën?
◻ Op watter maniere moet die rapport van 1984 ons aanspoor?
[Venster op bladsy 26]
‘Vreugdevol, gelukkig, dankbaar’
Die volgende verslag kom uit ’n land waar die werk van Jehovah se Getuies al meer as 40 jaar aan bande gelê word: „Ons grootste vreugde is die groter predikings- en onderrigtingsbedrywigheid in die veld. Baie het as hulppioniers gedien. Een van hulle het sy gevoelens soos volg uitgedruk: ,My hart loop oor van vreugde, blydskap en geluk, en diepe genoegdoening.’ ’n Ander hulppionier het gesê: ,Ek is so gelukkig omdat ek iets doen wat Jehovah behaag. Ek het vyf nuwe tuisbybelstudies begin.’ ’n Ander een het bygevoeg: ,Ek is Jehovah dankbaar omdat hy my gehelp het om die liefde aan te kweek wat nodig is om ander mense te help.’ In een gemeente met 61 verkondigers het 38 een maand hulppionierdiens gedoen. Die gevolg was dat 66 nuwe Bybelstudies begin is.”
[Tabel op bladsy 20-23]
1984 SERVICE YEAR REPORT OF JEHOVAH’S WITNESSES WORLDWIDE
(See bound volume)
[Tabel op bladsy 25]
Die Wêreldrapport: ’n vergelyking
1984 1983 Increase
Wagtoringtakke 95 94
Lande wat rapporteer 203 205
Verkondigerhoogtepunt 2 842 531 2 652 323 7,2%
Gemiddelde verkondigers 2 680 274 2 501 722 7,1%
Gemiddelde pioniers 258 936 206 098 25,6%
Hulppioniers (April) 323 644 217 860 8,6%
Velddiensure 505 588,037 436 720 991 15,8%
Lektuur versprei 36 639 925 36 039 400 1,7%
Intekeninge verkry 1 812 221 1 756 153 3,2%
Tydskrifte versprei 287 358 064 258 698 636 11,1%
Herbesoeke 195 819 093 174 687 309 12,1%
Gem. Bybelstudies 2 047 113 1 797 112 13,9%
Gedenkmaalopkoms 7 416 974 6 767 707 9,6%
Gedenkmaalgebruikers 9 081 9 292