Gebruike of Bybelbeginsels—Waardeur word jou lewe beheers?
DIE Japannese man wat ’n ander Asiatiese land besoek het, het met geskokte ongeloof toegekyk. Sy gasheer het met sy eie eetstokkies tussen die vleis op die opdienskottel gekrap, ’n keurige stukkie uitgesoek en dit op die gas se bakkie rys gesit! In Japan, waar hy vandaan kom, sou dit as slegte maniere beskou word. Niemand sal sy eie eetstokkies gebruik om kos uit die opdienskottel te haal tensy die eetstokkies eers omgedraai is sodat die punt wat in die mond gesteek word nie met die kos in aanraking kom nie. Maar sy gasheer het in werklikheid net probeer om hom te eer, nie aanstoot te gee nie. Iets wat in Japan ondenkbaar is, is ’n gebaar van eerbied in hierdie land!
Hoe verskil gebruike tog! Hoe onbenullig is baie gebruike tog nie! En wie kan sê watter die beste is? Sommige gebruike is egter op bygelowe of valse leerstellings gebaseer. Vir diegene met gewetens wat deur die Bybel opgelei is, is sulke gebruike beslis iets wat vermy moet word. Wat kan iemand wat God graag wil behaag, help om te besluit watter gebruike nagevolg moet word en in watter mate? Die toepassing van Bybel beginsels kan, want ’n Christen aanvaar die Bybel as sy standaard ongeag waar hy woon.
Pas Bybelbeginsels toe
Daar is al herhaaldelik getoon dat God se Woord groot krag het om op ’n nederige persoon se hart in te werk sodat hy sy lewe al hoe meer na God se weg skik. Die apostel Paulus het gesê dat die Christene in Thessalonika God se Woord aangeneem het “soos dit waarlik is, as die woord van God wat ook werk in julle wat glo” (1 Thessalonicense 2:13). Daardie Woord is so kragtig dat dit, soos 1 Korinthiërs 6:9-11 toon, baie in eertydse Korinthe, wat berug was vir sy bandeloosheid, beweeg het om hulle voormalige weg van diefstal, hoerery, dronkenskap en homoseksualiteit die rug toe te keer. Werk God se Woord ook in jou? Beheers die beginsels daarvan jou lewe in die volste mate, sodat dit jou in staat stel om te onderskei wat jy moet doen wanneer jy voor plaaslike gebruike te staan kom?
Soms is dit duidelik dat ’n gebruik regstreeks met Bybelbeginsels bots. In sulke gevalle sal iemand wat Jehovah se standaarde ken en hom wil behaag sulke gebruike vermy. Die gebruik is dalk dié om wierook by ’n begrafnis te brand om die afgestorwene of sy “siel” te paai of om hom ’n goeie afskeid te gee en sy “siel” bly te maak. Of modelle van huise, TV-stelle, motors, ensovoorts word moontlik verbrand om hom van genot in die geesteryk te voorsien. Maar ’n Christen wat die Bybel se verklaring glo dat die dooies ‘glad niks weet nie’, weet dat sulke gebruike op valse opvattings berus en vermy hulle gevolglik.—Prediker 9:5, 10; Psalm 146:4.
Wanneer ’n gebruik Bybelbeginsels egter nie regstreeks skend nie, maar dit bloot moeiliker maak om Jehovah God ten volle te dien, is dit moeiliker om ’n grens te stel en te toon dat Bybelbeginsels jou lewe beheers. Hoë agting vir geleerdheid en materiële sukses, lewenslange onderdanigheid aan ouers en die gebruik dat ouers huweliksmaats kies, is onder sommige algemene gebruike wat ’n mens se verhouding met Jehovah kan raak. Hoe kan Bybelbeginsels in sulke situasies toegepas word?
[Prent op bladsy 3]
Modelle word by ’n begrafnis verbrand