Lê jou daarop toe om die goeie nuus te verkondig
“Lê jou daarop toe om jou beproef voor God te stel as ’n werker wat hom nie hoef te skaam nie.”—2 TIMOTHEÜS 2:15.
1, 2. Watter toename in die geledere van voltydse bedienaars het jy opgemerk? Wat het daartoe bygedra?
“’N PAAR jaar gelede het baie van ons gedink dat net dié met spesiale omstandighede pioniers kan wees”, het ’n pionier, of voltydse bedienaar, in Japan geskryf. “Ons het dit skynbaar mis gehad. Ons vind nou uit dat net dié met spesiale omstandighede nie pioniers kan wees nie.”
2 Daardie positiewe beskouing het gelei tot een van die mees fenomenale toenames in die geledere van voltydse bedienaars onder Jehovah se Getuies in onlangse jare. Vandag neem twee uit elke vyf Koninkryksverkondigers in Japan aan die een of ander vorm van die voltydse diens deel. Maar hierdie gees van ywer is nie tot Japan beperk nie. Gedurende die laaste diensjaar het die getal verkondigers rondom die wêreld met 5 persent toegeneem, terwyl die getal voltydse bedienaars met 22 persent gestyg het. Jehovah se volk het beslis die apostel Paulus se woorde ter harte geneem: “Lê jou daarop toe om jou beproef voor God te stel as ’n werker wat hom nie hoef te skaam nie” (2 Timotheüs 2:15). Is dit met jou die geval?
“Dit is die liefde tot God”
3. Wat is die dryfkrag agter hierdie toename?
3 Wanneer pioniers gevra word waarom hulle tot die voltydse bediening toegetree het, antwoord hulle gewoonlik dat dit weens hulle liefde vir Jehovah God is (Mattheüs 22:37, 38). Dit is natuurlik soos dit hoort, want sonder liefde as die regte beweegrede sal enige inspanning tevergeefs wees (1 Korinthiërs 13:1-3). Dit is voorwaar prysenswaardig dat so baie van ons mede-Christene—trouens, ’n gemiddelde van meer as sewe verkondigers in elke gemeente rondom die wêreld—plek in hulle lewens ingeruim het om hulle liefde vir God op hierdie manier te toon.
4. Hoe het dit gekom dat ons Jehovah liefhet? (Romeine 5:8).
4 Elkeen van ons wat ons lewe aan Jehovah toegewy het, het dit natuurlik gedoen omdat ons hom liefhet. Toe ons gehoor het van die liefde van Jehovah en sy Seun, Jesus Christus, vir ons, en van die wonderlike seëninge wat sy Koninkryk gaan bring, is ons harte geroer en het ons hom liefgekry. Die apostel Johannes het dit so gestel: “Ons het Hom lief, omdat Hy ons eerste liefgehad het” (1 Johannes 4:19). Dit is ’n natuurlike reaksie omdat ons so gemaak is. Maar is daardie warm gevoel in ons hart al wat liefde vir God behels?
5. Wat behels liefde vir God? (1 Johannes 2:5).
5 Nee, liefde vir God beteken meer. Die apostel Johannes sê vir ons: “Dit is die liefde tot God, dat ons sy gebooie bewaar; en sy gebooie is nie swaar nie” (1 Johannes 5:3). Ja, ware liefde, net soos ware geloof, kom deur dade tot uiting. (Vergelyk 2 Korinthiërs 8:24.) Dit wil die geliefde behaag en sy goedkeuring win. Wat ’n uitstekende manier het diegene in die voltydse bediening gekies om hulle liefde vir Jehovah en Jesus Christus te toon!
6. (a) Watter soort persone het al pioniers geword? Wat het dit vir hulle moontlik gemaak? (b) Weet jy van enige sodanige voorbeelde?
6 Mense se omstandighede verskil, en dit moet in aanmerking geneem word. Maar wanneer ons na diegene kyk wat wel in die voltydse bediening staan, vind ons dat hulle mense in elke denkbare situasie insluit—jonk en oud, enkellopend en getroud, gesondes en sieklikes, mense met en sonder gesinsverantwoordelikhede, en so meer. Die verskil is dat hulle nie toegelaat het dat hierdie dinge padversperrings word nie, maar eerder, soos die apostel Paulus, geleer het om daaromheen te werk of daarmee saam te lewe (2 Korinthiërs 11:29, 30; 12:7). Beskou byvoorbeeld ’n tipiese gesin.
Eiji is ’n ouere man in sy gemeente. Hy en sy vrou dien al 12 jaar saam as pioniers terwyl hulle drie kinders grootgemaak het. Hoe het hulle dit reggekry? “Ons moes eenvoudiger lewe”, sê Eiji. Selfs die kinders moes leer om nee te aanvaar vir baie van die dinge wat hulle wou hê. “Hoewel ons by tye gesukkel het, het Jehovah ons altyd van die nodige voorsien.”
Was die opofferings die moeite werd? “Elke aand voor ons die ligte afsit, kyk ek na my vrou waar sy haar predikingsrapport vir die dag uitskryf”, sê Eiji. “Wanneer ek sien dat my gesin geestelike dinge op hierdie manier eerste stel, voel ek dat alles is soos dit hoort, en ek voel dat ek iets bereik het. Ek kan my nie indink dat ons nie saam pionierdiens doen nie,” Hoe voel sy vrou daaroor? “Eiji sorg baie goed vir ons”, sê sy. “Wanneer ek sien dat hy met geestelike sake besig is, voel ek ’n diep innerlike bevrediging. Ek hoop ons kan daarmee volhou.”
Watter uitwerking het die feit dat hul vader en moeder elke dag soveel tyd aan die predikingswerk wy op die kinders gehad? Die oudste seun werk tans aan ’n bouprojek van vier jaar by die Wagtoringgenootskap se tak. Die dogter is ’n gewone pionier, en die jongste seun, wat nog op skool is, wil graag ’n spesiale pionier word. Hulle is almal bly dat hulle ouers pioniers is.
7. (a) Meld voorbeelde van persone wat jy ken wat struikelblokke te bowe gekom het om tot die voltydse diens toe te tree. (b) Watter Bybelse raad het hulle ter harte geneem?
7 Gesinne soos hierdie word onder Jehovah se Getuies in baie lande rondom die wêreld aangetref. Hulle wend ’n doelgerigte poging aan om hulle só na hulle omstandighede te skik dat hulle die voltydse diens kan betree en daarin kan volhard. Deur hulle dade toon hulle wat die liefde van God werklik vir hulle beteken. Hulle slaan ernstig ag op Paulus se vermaning: “Lê jou daarop toe om jou beproef voor God te stel as ’n werker wat hom nie hoef te skaam nie.”—2 Timotheüs 2:15.
“’n Werker wat hom nie hoef te skaam nie”
8. Waarom het Paulus Timotheüs aangespoor om ‘hom daarop toe te lê’ om God te behaag, en wat beteken dit?
8 Toe Paulus daardie woorde omstreeks 65 G.J. aan Timotheüs geskryf het, het Timotheüs reeds ’n baie verantwoordelike posisie in die Christengemeente beklee. Paulus het hom “’n goeie krygsman van Jesus Christus” genoem en hom herhaaldelik herinner aan sy verantwoordelikheid om ander te leer en te onderrig (2 Timotheüs 2:3, 14, 25; 4:2). Nogtans het hy Timotheüs aangespoor: “Lê jou daarop toe om jou beproef voor God te stel.” Die uitdrukking “lê jou daarop toe” is vertaal uit ’n Griekse woord wat beteken “verhaas jou”. (Kyk Kingdom Interlinear Translation.) Met ander woorde, Paulus het vir Timotheüs gesê dat hy met versnelde tempo moet werk as hy God se goedkeuring wil verkry, en dit ondanks die feit dat hy reeds ’n swaar verantwoordelikheidslas gedra het. Waarom? Sodat hy ‘’n werker kon wees wat hom nie hoef te skaam nie’.
9. Watter gelykenis van Jesus kan ons help om Paulus se woorde oor “’n werker wat hom nie hoef te skaam nie” te verstaan?
9 Laasgenoemde sinsnede herinner ons aan die drie diensknegte in Jesus se gelykenis van die talente, soos opgeteken in Mattheüs 25:14-30. By die heer se terugkeer het die tyd aangebreek dat hulle hul werk aan die heer voorlê vir sy goedkeuring. Die diensknegte wat onderskeidelik vyf en twee talente ontvang het, is deur die heer geprys vir wat hulle gedoen het met die goed wat aan hulle toevertrou is. Hulle is genooi om ‘in te gaan in die vreugde van hul heer’. Maar die dienskneg aan wie een talent toevertrou is, het te kort geskiet. Wat hy gehad het, is van hom weggeneem, en tot sy skande is hy “in die buitenste duisternis” uitgewerp.
10. Waarom is die dienskneg aan wie een talent gegee is, beskaamd gemaak en gestraf?
10 Die eerste twee diensknegte het hard gewerk en hulle heer se belange vermenigvuldig. Hulle was waarlik werkers ‘wat hulle nie hoef te geskaam het nie’. Maar waarom is die derde dienskneg beskaamd gemaak en gestraf al het hy nie verloor wat aan hom gegee is nie? Dit was omdat hy niks konstruktiefs daarmee gedoen het nie. Soos die heer gesê het, hy kon dit ten minste in die bank gesit het. Maar wat basies geskort het, was dat hy nie werklik sy heer liefgehad het nie. “Omdat ek bang was, het ek gegaan en u talent in die grond weggesteek”, het hy voor sy heer gebieg. (Mattheüs 25:25; vergelyk 1 Johannes 4:18.) Hy het sy heer beskou as ’n onverbiddelike, “harde man”, en sy taak as ’n las. Hy het so min moontlik gedoen pleks van hom ‘daarop toe te lê’ om die heer se goedkeuring te verkry.
11. Hoe raak daardie gelykenis ons vandag?
11 Daardie gelykenis word vandag vervul. Die Heer, Jesus Christus, het teruggekeer en ondersoek tans die werk van sy “dienskneg”-klas sowel as die werk van hulle metgeselle, die “groot menigte” skape (Mattheüs 24:45-47; Openbaring 7:9, 15). Wat vind die Heer? As ons tevrede is om vormdiens te lewer net om die gewete te sus, kan ons dalk onder diegene wees wat beskaamd gemaak en “in die buitenste duisternis” uitgewerp sal word. Indien ons ons andersyds “toelê” op ons taak, dit wil sê, ons werk ‘verhaas’ omdat ons besef hoe dringend die tyd is, sal ons goedgekeur word as ‘werkers wat hulle nie hoef te skaam nie’ en sal ons deel hê aan ‘die vreugde van ons heer’.
Dissipline en selfopoffering nodig
12. Watter faktore het ’n hoë persentasie van die verkondigers in Japan in staat gestel om die voltydse bediening te betree?
12 Die volgehoue toename in die pioniergeledere in land na land rondom die wêreld is ’n duidelike bewys dat Jehovah se volk in die geheel ‘hulle daarop toelê’ om hulle beproef te stel as ‘werkers wat hulle nie hoef te skaam nie’. Maar het jy al ooit gewonder waarom die persentasie broers wat tot die voltydse diens toetree in sommige lande soveel hoër is as in ander? Hierdie interessante vraag is aan sommige van die pioniers in Japan gestel. Kyk na hierdie antwoorde:
“Ek dink nie dit beteken dat die geloof, of die liefde, van die Japannese Getuies groter is as dié van hulle broers in ander lande nie”, het ’n Bethelwerker wat al sowat 30 jaar in die voltydse diens staan, gesê. “Maar ek meen dat die Japannese persoonlikheid waarskynlik iets daarmee te doen het. Japannese is in die reël gehoorsaam; hulle reageer geredelik op aansporing.”
“Omdat daar so baie pioniers in feitlik elke gemeente is”, het ’n ouere man opgemerk, “is die algemene gedagte dat enigiemand dit kan doen.” Die Japannese hou daarvan om dinge in groepe te doen. Hulle het ’n uitstekende spangees.
Dit is beslis gedagteprikkelende opmerkings, en as ons werklik graag ons diens aan Jehovah wil verbeter, is daar ’n aantal opvallende gedagtes wat ons met vrug kan ondersoek.
13. Hoe kan gehoorsaamheid en gewilligheid om op aansporing te reageer ons help?
13 Ten eerste is daar die kwessie van gehoorsaamheid en gewilligheid om op aansporing te reageer. Wanneer leiding en aansporing uit die regte oord kom, is dit niks minder as reg dat ons geredelik daarop reageer nie. Pleks van hierdie eienskappe as blote volkskaraktertrekke te beskou, moet ons Jesus se woorde in gedagte hou: “My skape luister na my stem, en Ek ken hulle, en hulle volg My” (Johannes 10:27). Ons onthou ook dat “die wysheid van bo” onder meer “bereid tot gehoorsaamheid” is (Jakobus 3:17, NW). Alle Christene word aangespoor om hulle met hierdie eienskappe te beklee. Sommige is miskien, weens hulle agtergrond en opvoeding, meer geneig tot onafhanklike denke en eiesinnigheid as ander. Miskien is dit ’n saak waarin ons ons moet dissiplineer en ‘ons gemoedere moet vernuwe’ sodat ons die “wil van God” duideliker kan onderskei.—Romeine 12:2.
14. Watter uitnodiging het alle toegewyde Christene aanvaar, en wat is daarby betrokke?
14 As toegewyde Christene het ons Jesus se uitnodiging aanvaar: “As iemand agter My aan wil kom, moet hy homself verloën en sy kruis opneem en My volg” (Mattheüs 16:24). Om jouself te “verloën”, beteken letterlik om jou ‘alles te ontsê’ en jou daarna gewilliglik aan die besit van Jehovah God en Jesus Christus oor te gee. Dit beteken dat ons hulle toelaat om ons lewens te beheer en vir ons te sê wat ons moet doen en nie moet doen nie. Op watter beter manier kan ons toon dat ons ons verloën het as om Jesus se voetstappe in die voltydse bediening na te volg?
15. (a) Hoekom moet iemand wat Jesus wil volg met minder materiële dinge tevrede wees? (b) Hoe het die vroeë dissipels gereageer op Jesus se uitnodiging om hom te volg?
15 Dan is daar die kwessie van vergenoegdheid met minder materiële dinge. Dit is ongetwyfeld strydig met die algemene gees van die wêreld, wat klem lê op “die begeerlikheid van die vlees en die begeerlikheid van die oë en die grootsheid van die lewe” (1 Johannes 2:16). Maar Jesus het uitdruklik gesê: “Niemand van julle wat nie afsien van al sy besittings, [kan] my dissipel wees nie” (Lukas 14:33). Waarom is dit so? Omdat ’n dissipel van Jesus meer is as bloot ’n gelowige. Toe Jesus in die tweede jaar van sy bediening vir Andreas, Petrus, Jakobus, Johannes en die ander geroep het om sy dissipels te wees, het hy nie volstaan met die versoek dat hulle in hom as die Messias glo nie. Hy het hulle later genooi om hom te volg en die werk te doen wat hy gedoen het, dit wil sê, die voltydse predikingswerk. Wat was hulle reaksie? “Dadelik het hulle hul nette laat staan en Hom gevolg.” Jakobus en Johannes het selfs “hul vader Sebedeüs met die gehuurde mense in die skuit laat staan en Hom gevolg” (Markus 1:16-20). Hulle het hulle onderneming en voormalige metgeselle verlaat en voltydse predikers geword.
16. Waaraan moet ons, as toegewyde Christene, ons tyd en energie bestee? (Spreuke 3:9).
16 Dit is dus maklik om te sien waarom dit so noodsaaklik is om met minder tevrede te wees indien ons ons werklik op Jehovah se diens wil toelê. As ons met baie materiële dinge of verpligtinge belas is, kan ons soos die ryk jong owerste word wat Jesus se uitnodiging om hom te volg van die hand gewys het, nie omdat hy dit nie kon doen nie, maar omdat hy nie bereid was om sy “baie besittings” agter te laat nie (Mattheüs 19:16-22; Lukas 18:18-23). Pleks van ons tyd en energie te mors deur dinge na te jaag wat binnekort sal ‘verbygaan’, wil ons hierdie kosbare bates tot ons ewige welsyn aanwend.—1 Johannes 2:16, 17.
17. In watter mate kan ’n spangees ons positief beïnvloed?
17 Ten slotte is daar die kwessie van spangees. Andreas, Petrus, Jakobus en Johannes het mekaar ongetwyfeld beïnvloed in hulle besluit om gehoor te gee aan Jesus se uitnodiging om hom te volg (Johannes 1:40, 41). Die feit dat so baie van ons broers plek in hulle besige lewens kon inruim om die voltydse diens te betree, behoort ons eweneens te beweeg om ernstig oor ons eie geval na te dink. Aan die ander kant kan diegene wat reeds hierdie voorreg geniet hulle blye ondervindinge met ander deel en hulle sodoende aanmoedig om ook die voltydse diens te betree. En voltydse bedienaars kan mekaar natuurlik help, tot die wedersydse voordeel van almal.—Romeine 1:12.
18. Hoe kan elkeen van ons die pioniergees bevorder?
18 Selfs diegene wie se huidige omstandighede hulle nie toelaat om tot die voltydse bediening toe te tree nie, kan baie doen om die pioniergees te bevorder. Hoe? Deur die pioniers te ondersteun en te bemoedig, deur daadwerklike belangstelling te toon in potensiële pioniers, deur te reël dat minstens een lid van hulle gesin ’n pionier word, deur aan die hulppionierdiens deel te neem wanneer hulle kan en deur hulle dit ten doel te stel om so gou moontlik tot die voltydse diens toe te tree. So kan elkeen van ons toon dat ons ‘ons daarop toelê’ om Jehovah te dien, hetsy ons in die voltydse bediening staan of nie.
Toon volharding
19. Wat moet ons, met die oog op die tyd, vasbeslote wees om te doen?
19 Dit is inderdaad nou, terwyl Jehovah die werk bespoedig, die tyd om ‘ons daarop toe te lê om werkers te wees wat hulle nie hoef te skaam nie’. As goeie krygsmanne van Jesus Christus moet ons ook alle onnodige laste aflê sodat ons hom behoorlik kan dien en sy goedkeuring kan verkry (2 Timotheüs 2:3-5). Solank ons hard werk om ons deelname aan die Koninkryksdiens uit te brei, kan ons daarvan seker wees dat ons pogings ryklik beloon sal word (Hebreërs 6:10; 2 Korinthiërs 9:6). Laat ons dus nie bloot toeskouers wees nie, maar laat ons volhard terwyl ons ons toelê op die verkondiging van die goeie nuus, in antwoord op die psalmis se uitnodiging: “Dien die HERE met blydskap; kom voor sy aangesig met gejubel.”—Psalm 100:2.
Hersieningsvrae
◻ Wat behels liefde vir God?
◻ Wat was die eintlike probleem met die derde dienskneg in Jesus se gelykenis van die talente?
◻ Wat beteken dit om onsself te verloën?
◻ Waarom moet volgelinge van Jesus ‘afsien van hulle besittings’?
◻ Hoe kan elkeen van ons die pioniergees bevorder?
[Prent op bladsy 18]
“Werp die nuttelose dienskneg uit”