Ons dien saam met die wag

“Op die wagtoring, o Jehovah, staan ek onafgebroke in die dag, en op my wagpos staan ek al die nagte.”—JESAJA 21:8, NW.

1. Van watter wonderlike beloftes is Jehovah self ’n getuie?

JEHOVAH is die Groot Voornemer. Die opstandige engel wat Satan die Duiwel geword het, kan niks doen om Sy grootse voorneme te dwarsboom om Sy eie naam te heilig en ’n glorieryke Koninkryksheerskappy oor ’n paradysaarde tot stand te bring nie (Matteus 6:9, 10). Onder hierdie heerskappy sal die mensdom waarlik geseënd wees. God “sal die dood vir ewig vernietig, en die Here HERE sal die trane van alle aangesigte afvee”. Gelukkige, verenigde mense sal tot in alle ewigheid vrede en voorspoed geniet (Jesaja 25:8; 65:17-25). Jehovah is sy eie getuie van hierdie wonderlike beloftes!

2. Watter mense het Jehovah as sy getuies gebruik?

² Maar die Grootse Skepper het ook mense wat as sy getuies dien. In voor-Christelike tye het ‘’n wolk van getuies’, wat met Abel begin het, die wedloop van volharding gehardloop, dikwels ten spyte van ’n oorweldigende oormag. Hulle uitstekende voorbeelde moedig lojale Christene van vandag aan. Christus Jesus is die voortreflikste voorbeeld van ’n moedige getuie (Hebreërs 11:1–12:2). Dink byvoorbeeld aan sy laaste getuienis voor Pontius Pilatus. Jesus het gesê: “Hiervoor is ek gebore, en hiervoor het ek in die wêreld ingekom, om van die waarheid te getuig” (Johannes 18:37). Van 33 G.J. af tot hierdie jaar 2000 G.J. het ywerige Christene Jesus se voorbeeld nagevolg en aangehou om te getuig en moedig “die luisterryke dinge van God” te verkondig.—Handelinge 2:11.

Babiloniese sektegees

3. Hoe het Satan die getuienis wat oor Jehovah en sy wil gegee word, teëgestaan?

³ Deur die millenniums heen het die groot Teenstander, Satan die Duiwel, op goddelose wyse die geloofwaardigheid van die getuienis van God se getuies probeer ondermyn. As “die vader van die leuen” het hierdie “groot draak . . . , die oorspronklike slang, . . . die hele bewoonde aarde mislei”. Hy voer ’n verbete stryd teen diegene wat “die gebooie van God onderhou”, veral in hierdie laaste dae.—Johannes 8:44; Openbaring 12:9, 17.

4. Hoe het Babilon die Grote ontstaan?

⁴ Ongeveer 4 000 jaar gelede, ná die Vloed van Noag se dag, het Satan Nimrod, “’n magtige jagter in verset teen Jehovah”, verwek (Genesis 10:9, 10, NW). Nimrod se grootste stad, Babilon (Babel), het ’n sentrum van demoniese godsdiens geword. Toe Jehovah die taal van Babel se toringbouers verwar het, is die mense oor die aarde verstrooi, en hulle het hulle valse godsdiens saam met hulle geneem. So het Babilon dan die oorsprong van ’n wêreldryk van valse godsdiens geword, wat in die boek Openbaring Babilon die Grote genoem word. Daardie boek voorspel die ondergang van hierdie baie ou godsdiensstelsel.—Openbaring 17:5; 18:21.

’n Nasie van getuies

5. Watter nasie het Jehovah gevorm om sy getuie te wees, maar waarom het hy toegelaat dat hulle in ballingskap weggevoer word?

⁵ Omtrent 500 jaar ná Nimrod se tyd het Jehovah die afstammelinge van die getroue man Abraham tot die nasie Israel gevorm om as Sy getuie op aarde te dien (Jesaja 43:10, 12). Baie individue in daardie nasie het Jehovah lojaal gedien. Maar deur die eeue heen het die valse opvattings van buurnasies ’n verderflike invloed op Israel gehad, en Jehovah se verbondsvolk het hom verlaat en valse gode begin aanbid. Gevolglik het die leërs van Babilon, wat deur koning Nebukadnesar aangevoer is, Jerusalem en sy tempel in 607 v.G.J. vernietig en die meeste Jode in ballingskap na Babilon weggevoer.

6. Watter goeie nuus het Jehovah se profetiese wag aangekondig, en wanneer is dit vervul?

⁶ Wat ’n oorwinning was dit tog vir valse godsdiens! Maar Babilon se oorheersing was van korte duur. Ongeveer 200 jaar voor die gebeurtenis het Jehovah beveel: “Gaan, sit ’n wag uit, sodat hy kan sê presies wat hy sien.” Watter nuus het hierdie wag gehad om aan te kondig? “Dit het geval! Babilon het geval, en al die gesnede beelde van sy gode het Hy teen die grond verbrysel!” (Jesaja 21:6, 9, NW). Ja waarlik, in 539 v.G.J. is die profetiese verklaring bewaarheid. Die magtige Babilon het geval, en God se verbondsvolk kon kort daarna na hulle vaderland terugkeer.

7. (a) Wat het die Jode uit Jehovah se dissipline geleer? (b) In watter strikke het die Jode ná hulle ballingskap getrap, en met watter gevolg?

⁷ Die Jode wat teruggekeer het, het genoeg geleer om af te sien van afgodediens en spiritistiese godsdiens. Maar met die jare het hulle in ander strikke getrap. Party is deur Griekse filosofie verstrik. Ander het meer klem op die oorleweringe van mense begin lê as op God se Woord. Ander het weer voor nasionalisme geswig (Markus 7:13; Handelinge 5:37). Teen die tyd dat Jesus gebore is, het die nasie weer eens rein aanbidding verlaat. Hoewel individuele Jode gunstig gereageer het op die goeie nuus wat Jesus verkondig het, het die nasie in sy geheel hom verwerp en is hulle dus deur God verwerp (Johannes 1:9-12; Handelinge 2:36). Israel was nie meer God se getuie nie, en in die jaar 70 G.J. is Jerusalem en sy tempel weer vernietig, dié keer deur die Romeinse leër.—Matteus 21:43.

8. Wie het Jehovah se getuie geword, en waarom was Paulus se waarskuwing aan hierdie getuie tydig?

⁸ Intussen is ’n Christelike “Israel van God” gebore, en hulle het nou as God se getuie vir die nasies gedien (Galasiërs 6:16). Satan het onmiddellik planne begin beraam om hierdie nuwe, geestelike nasie verdorwe te maak. Teen die einde van die eerste eeu is sektariese invloede in die gemeentes gevind (Openbaring 2:6, 14, 20). Paulus se waarskuwing was tydig: “Pas op: miskien is daar iemand wat julle as sy prooi sal wegvoer deur die filosofie en leë bedrog volgens die oorlewering van mense, volgens die elementêre dinge van die wêreld en nie volgens Christus nie.”—Kolossense 2:8.

9. Wat het tot die ontstaan van die Christendom gelei, net soos Paulus gewaarsku het?

⁹ Mettertyd het Griekse filosofie, Babiloniese godsdiensopvattings en later menslike “wysheid”, soos die evolusieteorie en hoër kritiek, die godsdiens besmet van baie wat beweer het dat hulle Christene is. Dit was soos Paulus voorspel het: “Ek weet dat onderdrukkende wolwe ná my vertrek onder julle sal inkom en die kudde nie met teerheid sal behandel nie, en uit julle eie midde sal manne opstaan en verdraaide dinge spreek om die dissipels agter hulle aan weg te trek” (Handelinge 20:29, 30). Hierdie afvalligheid het tot die ontstaan van die Christendom gelei.

10. Watter gebeure het duidelik getoon dat nie almal betrokke geraak het by die verdorwe aanbidding wat in die Christendom beoefen word nie?

¹⁰ Diegene wat werklik aan rein aanbidding toegewyd was, moes “hard . . . stry vir die geloof wat eens en vir altyd aan die heiliges oorgelewer is” (Judas 3). Het dit beteken dat daar geen getuienis vir rein aanbidding en vir Jehovah meer op die aarde sou wees nie? Nee. Namate die tyd vir die vernietiging van die opstandeling Satan en al sy werke al hoe nader gekom het, het dit duidelik begin word dat nie almal betrokke geraak het by die afvallige aanbidding wat in die Christendom beoefen word nie. Gedurende die laaste deel van die 19de eeu is ’n groep ernstige Bybelstudente in Pittsburgh, Pennsilvanië, VSA, gevorm, en hulle het die kern van God se hedendaagse getuieklas geword. Hierdie Christene het die aandag gevestig op die skriftuurlike bewyse dat die voleinding van die huidige wêreldstelsel op hande was. In ooreenstemming met Bybelprofesieë het hierdie wêreld se “voleinding” in 1914 begin, en dit is deur die uitbreek van die Eerste Wêreldoorlog aangedui (Matteus 24:3, 7). Daar is afdoende bewys dat Satan en sy demoonhordes ná daardie jaar uit die hemel gewerp is. Die veelbewoë 20ste eeu het duidelike bewyse voorsien van Satan se bedrywighede en van ’n merkwaardige vervulling van die teken van Jesus se koninklike teenwoordigheid in hemelse Koninkryksmag.—Matteus, hoofstukke 24 en 25; Markus, hoofstuk 13; Lukas, hoofstuk 21; Openbaring 12:10, 12.

11. Wat het Satan probeer doen, maar hoe het sy pogings misluk?

¹¹ In Junie 1918 het Satan verwoede pogings aangewend om hierdie Bybelstudente uit te wis, wat teen daardie tyd die predikingswerk in etlike lande gedoen het. Hy het ook hulle wetlike korporasie, die Wagtoring- Bybel- en Traktaatgenootskap, tot niet probeer maak. Verantwoordelike ampsdraers van die Genootskap is in die gevangenis gesit en valslik beskuldig van sedisie, soos in die eerste eeu met Jesus die geval was (Lukas 23:2). Maar in 1919 is hierdie ampsdraers vrygelaat, en hulle kon hulle bediening voortsit. Later is hulle heeltemal vrygespreek.

’n “Wag” staan op die uitkyk

12. Wie is vandag Jehovah se wagklas, en watter gesindheid het hulle nog altyd geopenbaar?

¹² Toe “die tyd van die einde” begin het, het Jehovah derhalwe weer eens ’n wag op die toneel gehad wat mense attent gemaak het op gebeure wat met die vervulling van Sy voornemens verband hou (Daniël 12:4; 2 Timoteus 3:1). Daardie wagklas—gesalfde Christene, die Israel van God—tree tot vandag toe nog in ooreenstemming met Jesaja se beskrywing van die profetiese wag op: “Hy het noulettend aandag geskenk, met groot opmerksaamheid. En hy het soos ’n leeu uitgeroep: ‘Op die wagtoring, o Jehovah, staan ek onafgebroke in die dag, en op my wagpos staan ek al die nagte’” (Jesaja 21:7, 8, NW). Dít is ’n wag wat sy werk ernstig opneem!

13. (a) Watter boodskap het Jehovah se wag bekend gemaak? (b) Hoe kan daar gesê word dat Babilon die Grote geval het?

¹³ Wat het hierdie wag gesien? Jehovah se wag, sy getuieklas, het weer eens aangekondig: “Dit het geval! Babilon het geval, en al die gesnede beelde van sy gode het Hy [Jehovah] teen die grond verbrysel!” (Jesaja 21:9, NW). Dié keer, ná die Eerste Wêreldoorlog, is dit Babilon die Grote, die wêreldryk van valse godsdiens, wat van haar hoë gesagsposisie af tot ’n val gebring word (Jeremia 50:1-3; Openbaring 14:8). Dit is geen wonder nie! Die Groot Oorlog, soos dit destyds genoem is, het in die Christelike wêreld begin, waar die geestelikes aan albei kante die oorlogsbrand aangeblaas het deur met hulle preke die room van hulle jeug na die oorlogsveld te stuur. Wat ’n skande tog! In 1919 kon Babilon die Grote nie keer dat die Bybelstudente, soos Jehovah se Getuies destyds bekend was, uit hulle onbedrywige toestand kom en ’n wêreldwye getuieniskampanje onderneem wat nog steeds aan die gang is nie (Matteus 24:14). Dit het ’n val vir Babilon die Grote aangekondig, net soos die bevryding van Israel in die sesde eeu v.G.J. ’n val vir eertydse Babilon aangekondig het.

14. Watter tydskrif is op groot skaal deur Jehovah se wagklas gebruik, en hoe het Jehovah die gebruik daarvan geseën?

¹⁴ Die wagklas het nog altyd hulle werk verrig met ywer en met ’n opregte begeerte om te doen wat reg is. In Julie 1879 het die Bybelstudente hierdie tydskrif begin uitgee, wat toe bekend was as Zion’s Watch Tower and Herald of Christ’s Presence. Elke nommer van 1879 af tot 15 Desember 1938 het op die voorblad hierdie woorde gehad: “‘Wagter, wat van die nag?’—Jesaja 21:11.”a Die Wagtoring lewer al 120 jaar lank getrou verslag oor wêreldgebeure en hulle profetiese betekenis (2 Timoteus 3:1-5, 13). God se wagklas en hulle metgeselle, die “ander skape”, gebruik hierdie tydskrif om ywerig aan die mensdom te verkondig dat die regverdiging van Jehovah se soewereiniteit deur Christus se Koninkryk op hande is (Johannes 10:16). Is hierdie getuie deur Jehovah geseën? Wel, vandat 6 000 eksemplare van die eerste nommer van Die Wagtoring in 1879 verskyn het, het die verspreiding daarvan regoor die wêreld toegeneem tot meer as 22 000 000 eksemplare in 132 tale—waarvan 121 gelyktydig uitgegee word. Hoe gepas is dit tog dat die godsdienstydskrif wat die grootste verspreiding op aarde geniet die een is wat die naam van die ware God, Jehovah, verheerlik!

’n Progressiewe reiniging

15. Watter progressiewe reiniging het selfs voor 1914 begin?

¹⁵ Gedurende die bykans 40 jaar tot 1914 toe Christus se hemelse heerskappy begin het, is die Bybelstudente bevry van talle onskriftuurlike leerstellings van die Christendom, soos kinderdoop, onsterflikheid van die mensesiel, vaevuur, foltering in ’n helse vuur en ’n Drie-enige God. Maar dit het nog langer geneem om van alle verkeerde opvattings ontslae te raak. In die 1920’s het baie Bybelstudente byvoorbeeld ’n “kruis-en-kroon”-kenteken gedra, en hulle het Kersfees en ander heidense vakansiedae gevier. Maar aanbidding kan slegs rein wees as alle spore van afgodediens verwyder is. God se Woord, die Heilige Bybel, moet die enigste grondslag van die Christen se geloof en lewenswyse wees (Jesaja 8:19, 20; Romeine 15:4). Dit is verkeerd om enigiets by God se Woord te voeg of daarvan weg te neem.—Deuteronomium 4:2; Openbaring 22:18, 19.

16, 17. (a) Watter verkeerde opvatting het die wagklas dekades lank gehuldig? (b) Wat is die regte verduideliking van die “altaar” en die “pilaar” in “Egipte”?

¹⁶ Een voorbeeld sal toelig hoe belangrik hierdie beginsel is. In 1886, toe C. T. Russell ’n boek uitgegee het wat The Divine Plan of the Ages genoem is, het hierdie boek ’n kaart bevat wat die eeue van die mensdom met die Groot Piramide van Egipte verbind het. Die mening was dat hierdie grafmonument van farao Koefoe die pilaar was waarna Jesaja 19:19, 20 (NW) verwys: “In dié dag sal daar ’n altaar vir Jehovah in Egipteland wees, en ’n pilaar vir Jehovah by sy grens. En dit moet ’n teken en ’n getuie vir Jehovah van die leërs wees in Egipteland.” Watter verband kon daar wees tussen die piramide en die Bybel? Wel, daar is byvoorbeeld gesê dat die lengte van sekere gange in die Groot Piramide die tyd vir die begin van die “groot verdrukking” van Matteus 24:21 aangedui het, soos dit op daardie stadium verstaan is. Party Bybelstudente het heeltemal verdiep daarin geraak om verskillende dele van die piramide te meet sodat hulle sekere dinge kon bepaal, soos die dag waarop hulle hemel toe sou gaan!

¹⁷ Hierdie sogenaamde Bybel van Klip is dekades lank hooggeag, totdat die Watchtower van 15 November en 1 Desember 1928 verduidelik het dat Jehovah nie ’n klipmonument hoef te gebruik wat deur heidense farao’s gebou is en demoniese tekens van sterrewiggelary bevat om die getuienis wat in die Bybel gegee word te staaf nie. Dit het duidelik geword dat Jesaja se profesie eerder ’n geestelike toepassing het. Soos in Openbaring 11:8 beeld “Egipte” Satan se wêreld af. Die “altaar vir Jehovah” herinner ons aan die aanneemlike offerandes wat die gesalfde Christene bring terwyl hulle tydelike inwoners in hierdie wêreld is (Romeine 12:1; Hebreërs 13:15, 16). Die pilaar “by [Egipte se] grens” verwys na die gemeente van gesalfde Christene, wat “’n pilaar en stut van die waarheid” is en wat as ’n getuie dien in “Egipte”, die wêreld wat hulle binnekort gaan verlaat.—1 Timoteus 3:15.

18. (a) Hoe het Jehovah voortgegaan om sake duideliker te maak vir opregte Bybelstudente? (b) Wat is ’n wyse houding om te openbaar as ’n Christen dit moeilik vind om ’n nuwe skriftuurlike verduideliking te verstaan?

¹⁸ Met verloop van jare gaan Jehovah voort om die waarheid nog duideliker te maak, en dit sluit ’n duideliker begrip van sy profetiese woord in (Spreuke 4:18). In onlangse jare is ons aangespoor om weer eens met dieper insig te kyk na—onder meer—die geslag wat nie sal verbygaan voordat die einde kom nie, die gelykenis van die skape en die bokke, die walglike ding en wanneer dit in ’n heilige plek sal staan, die nuwe verbond, die gedaanteverandering en die tempelvisioen in die boek Esegiël. Dit is soms dalk moeilik om sulke nuwe verduidelikings te verstaan, maar die redes daarvoor word mettertyd duidelik. As ’n Christen ’n nuwe verduideliking van ’n teks nie heeltemal verstaan nie, sal dit goed wees as hy nederig soos die profeet Miga sê: “Ek sal ’n wagtende houding openbaar teenoor die God van my redding.”—Miga 7:7, NW.

19. Hoe het die gesalfde oorblyfsel en hulle metgeselle van die ander skape in hierdie laaste dae leeuemoed geopenbaar?

¹⁹ Onthou dat die wag “soos ’n leeu uitgeroep [het]: ‘Op die wagtoring, o Jehovah, staan ek onafgebroke in die dag, en op my wagpos staan ek al die nagte’” (Jesaja 21:8, NW). Die gesalfde oorblyfsel het leeuemoed geopenbaar deur valse godsdiens aan die kaak te stel en mense die weg na vryheid te wys (Openbaring 18:2-5). As “die getroue en verstandige slaaf” voorsien hulle Bybels, tydskrifte en ander publikasies in ’n menigte tale—“voedsel op die regte tyd” (Matteus 24:45). Hulle het die leiding geneem in die insameling van die “groot skare . . . uit alle nasies en stamme en volke en tale”. Ook hulle word gereinig deur die losprysbloed van Jesus, en hulle toon dat hulle leeuemoed het wanneer hulle “dag en nag heilige diens” aan God verrig (Openbaring 7:9, 14, 15). Watter vrugte het die groepie oorblywende gesalfde Getuies van Jehovah en hulle metgeselle, die groot skare, verlede jaar voortgebring? Ons volgende artikel sal dit bespreek.

[Voetnoot]

Onthou jy?

• Watter getuies het Jehovah deur die jare heen gebruik?

• Wat is die oorsprong van Babilon die Grote?

• Waarom het Jehovah toegelaat dat Jerusalem, die hoofstad van sy nasie getuies, vernietig word in 607 v.G.J? in 70 G.J.?

• Watter gees het Jehovah se wagklas en hulle metgeselle geopenbaar?

[Prent op bladsy 7]

“Op die wagtoring, o Jehovah, staan ek onafgebroke”

[Prente op bladsy 10]

Jehovah se wagklas neem hulle werk ernstig op