Koninkryksverkondigers berig

Jongmense in Italië skep geleenthede om te getuig

DIEGENE wat God se wonderlike voornemens waardeer, geniet dit om ander van die wonderlike Koninkrykshoop te vertel. Dit beteken dikwels dat hulle geleenthede wat hulle voordoen, aangryp, soos die volgende berig uit Sardinië toon.

◻ “’n Twaalfjarige verkondiger het met die bus van velddiens af teruggery. Daar was ook twee jong seuns en ’n meisie op die bus, almal ongeveer 18 jaar oud. Die jong verkondiger het naby die meisie gesit in die hoop dat hy haar nuuskierigheid sou prikkel, en Ontwaak! begin lees. Sy het die tydskrif opgemerk en gevra wat hy lees. Hy het verduidelik dat hy ’n artikel lees wat die oplossing bespreek vir probleme wat jongmense vandag teëkom. Hy het gesê dat hy baie by hierdie materiaal baat gevind het en dat dit haar ook kan help. Sy het die tydskrifte met graagte aanvaar.

“Die ander twee jongmense wat na die gesprek geluister het, het tydskrifte gevra. Terwyl hulle die bydrae gekry het, het die bestuurder vir hulle gesê om nie hulle geld op sulke nuttelose dinge te verkwis nie. Die jongmense het geantwoord dat hulle intelligent is, en dat die tydskrifte interessant is. Die busbestuurder het toe met die bus aan die kant van die pad gaan stilhou en wou sien wat so interessant in hierdie tydskrifte was. Hy het ook eksemplare aanvaar.

“Die jong Getuie wat hierdie ondervinding vertel het, het gesê: ‘Ek is regtig bly dat ek op die bus begin getuig het.’”

◻ ’n Ander jong Getuie het ’n situasie by die skool benut. Hierdie jeugdige vertel: “Ons onderwyser het ons ’n studiemetode geleer wat heel anders as die tradisionele een was. Nadat ons die materiaal bespreek het, moes ons ’n skets uitwerk wat hoofgedagtes en ondergeskikte gedagtes insluit en dan ’n onvoorbereide toespraak oor die onderwerp hou.

“‘Ek is baie vertroud met hierdie metode’, het die Getuie gesê. ‘Dit is die een wat deur die Teokratiese Bedieningskool-Handleiding voorgestel word.’ Die onderwyser het gou opgemerk dat ek die enigste een was wat hierdie metode met welslae toegepas het. Hy het gevra waarom daar so ’n verskil tussen my werk en dié van die ander was. Ek het verduidelik dat ek hierdie metode in die Teokratiese Bedieningskool geleer het. Hy was in sy noppies en het my genooi om dit met behulp van die Teokratiese Bedieningskool-Handleiding vir die klas te demonstreer. Ek het dit gedoen.

“Toe ek by die huis kom, het ek my gesin vertel wat gebeur het. My vader, wat nie ’n Getuie is nie, het altyd gesê dat dit ’n nadeel op skool is om een van Jehovah se Getuies te wees, maar nadat hy na my ondervinding geluister het, was hy genoodsaak om sy mening te verander.”

Wat ’n wonderlike voorreg het julle jongmense, asook julle oueres, om Jehovah se naam hoog te hou en bekend te maak!—Psalm 148:12, 13.