Koninkryksverkondigers berig

◻ AS GEVOLG van die “groot vervolging” teen die vroeë Christengemeente is baie dissipels van Christus verstrooi (Handelinge 8:1). Maar hierdie vervolging het geboemerang omdat diegene wat verstrooi is “die land deurgegaan en die woord van die evangelie verkondig” het (Handelinge 8:4). Filippus het aangehou preek en “die skare het eendragtig ag gegee” (Handelinge 8:6). Net soos vervolging in die eerste eeu geboemerang het, het dit ook in ’n dorpie in Noord-Thailand geboemerang.

’n Spesiale pionier van Jehovah se Getuies het in hierdie dorpie begin preek, maar die dorpenaars wou eers nie luister nie. Toe hy egter met die plaaslike predikant gepraat het, het die mense saamgedrom om te luister. Sommige het tot die besef gekom dat die Getuie die Bybel beter as hulle predikant ken en daarom het hulle die Bybel saam met die pionier begin studeer, selfs al het ander hulle vervolg. Van hulle eende is doodgemaak, die pionier is met die dood gedreig en die huis van een belangstellende is afgebrand. Die man het gesê: “Hulle kan my huis brand, maar hulle kan nie my hart brand nie.” Diegene met wie die Getuie gestudeer het, het lang afstande per fiets afgelê om vergaderinge by die Koninkryksaal by te woon. Vier van hulle is gedoop, en ses ander woon steeds saam met hulle vergaderinge by.

Beloning vir eerlikheid

◻ Die broers in Zambië staan bekend as eerlike mense, en dit het vir hulle seëninge meegebring en ander gehelp om die waarheid te identifiseer. ’n Ouere man, wat ’n gewone pionier is, het op ’n bus gery en gehoor hoe ’n Getuie op die bus met ander oor die opstanding praat. ’n Passasier het haar gevra: “Waarom beweer julle Getuies dat julle godsdiens die enigste ware godsdiens is?” Die broer het begin saampraat en vir die passasier gesê dat Jehovah sy Getuies sal beloon omdat hulle die waarheid uit die Bybel verkondig.

Na middernag tydens hierdie lang reis het die bus by ’n padversperring gekom. Dit het hard gereën. ’n Soldaat het op die bus geklim en gevra of daar enige van Jehovah se Getuies in die bus is. Daar was drie. Toe het hy gesê: “Goed, die Getuies kan bly sit, die res moet met julle tasse uitklim.” Al die ander het in die reën uitgeklim en na die inspeksie het hulle teruggekom met hulle bagasie en klere papnat.

In die bus het die soldaat gesê: “Die rede waarom ek die Getuies laat bly sit het, is omdat hulle eerlike mense is. Ons het baie ondervinding gehad en het gevind dat hulle die enigste mense is wat eerlik is; wanneer ons vra wat in hulle tasse is, praat hulle die waarheid.” Toe die bus aanry, het die broer gevra: “Watter godsdiens is die ware?” Iemand het geantwoord: “Die een wat nie papnat is van die reën nie.”

Ja, eerlikheid help om die ware godsdiens te identifiseer en dit hou beslis beloninge in!