Ware skoonheid—Jy kan dit verkry

WAT ’n mooi voorkoms betref, het die Bybel raad vir manne sowel as vroue. Vir manne sê dit: “Die sieraad van die jongmanne is hulle krag” (Spreuke 20:29). Ja, die energie en lewenskrag van jong manne kan baie aantreklik wees. Maar wat gebeur wanneer daardie jeugdige krag afneem? Die Bybelspreuk sê: “Grysheid is ’n sierlike kroon; dit word gevind op die weg van geregtigheid” (Spreuke 16:31). Geregtigheid is ’n faset van innerlike skoonheid. As ’n jong man dit aankweek, sal dit steeds daar wees wanneer hy daardie aantreklike jeugdige krag verloor.

Die Bybel sê aangaande vroue: “Sjarme kan bedrieglik wees en skoonheid ydel; maar die vrou wat Jehovah vrees, verwerf vir haarself lof” (Spreuke 31:30, NW). ’n Mooi, sjarmante jong vrou is ’n aangename metgesel. Maar sê nou daar skuil skynheiligheid en selfsugtige ydelheid agter die uiterlike sjarme. Dan is die skoonheid slegs oppervlakkig en verberg dit ’n innerlike lelikheid. Wat sal oorbly wanneer die skoonheid verwelk? Hoeveel beter is dit tog as die mooi voorkoms met ’n onverwelklike, innerlike skoonheid gepaard gaan wat uit ‘vrees vir Jehovah’ spruit!

’n Verandering van persoonlikheid

Kan ’n mens hierdie innerlike skoonheid verkry? Ja. Trouens, dit is ’n vereiste vir Christene. Ware skoonheid is vir God kosbaar. “Alles het Hy mooi gemaak op sy tyd” (Prediker 3:11). Hy sal nie die aanbidding aanvaar van diegene wie se gedrag lelike innerlike eienskappe verraai nie.

Die apostel Paulus se woorde aan die Kolossense toon hoe belangrik dit is om ’n innerlike skoonheid aan te kweek. Hy maan ten eerste: “Nou moet julle ook dit alles aflê, naamlik toorn, woede, boosheid, laster, skandelike taal uit julle mond. Lieg nie vir mekaar nie, omdat julle die [ou persoonlikheid] met sy werke afgelê het.” Ja, iemand wat sulke lelike dinge beoefen, is vir God—en vir reggesinde mense—afskuwelik. Paulus sê vervolgens: “[Beklee] julle jul met die nuwe [persoonlikheid] . . . wat vernuwe word tot kennis na die beeld van sy Skepper” (Kolossense 3:8-10, vgl. NW). Ons moet ons met ’n denk- en sienswyse “beklee” wat met God se wil strook. Waardeur word hierdie “nuwe persoonlikheid” gekenmerk?

Christeneienskappe

Die Bybel meld talle mooi eienskappe waaruit dit bestaan. Maar die grondslag vir hierdie innerlike skoonheid word in Jesus se woorde beskryf: “Jy moet die Here jou God liefhê met jou hele hart en met jou hele siel en met jou hele verstand. Dit is die eerste en groot gebod. En die tweede wat hiermee gelykstaan: Jy moet jou naaste liefhê soos jouself” (Mattheüs 22:37-39). Liefde vir God wek die begeerte in ons om die soort persoon te wees wat hom behaag. Sulke liefde beweeg ons om met ander oor hom te praat en hulle te help om hulle Skepper te leer ken.—Jesaja 52:7.

Sommige ander eienskappe wat deel van die nuwe persoonlikheid uitmaak, word deur die apostel Paulus beskryf: “Liefde, blydskap, vrede, lankmoedigheid, vriendelikheid, goedheid, getrouheid, sagmoedigheid, selfbeheersing. Teen sulke dinge is die wet nie.”—Galasiërs 5:22, 23.

Daarbenewens sê die Bybel uitdruklik aan mans: “Die man is die hoof van die vrou, soos Christus ook Hoof is van die gemeente . . . Manne, julle moet jul eie vroue liefhê, soos Christus ook die gemeente liefgehad en Homself daarvoor oorgegee het” (Efesiërs 5:23, 25). En aan vroue sê die Bybel: “Vroue, wees aan julle eie mans onderdanig, soos aan die Here . . . Die vrou moet die man eerbiedig” (Efesiërs 5:22, 33). Hoe mooi is die gesinslewe tog wanneer die man sy verantwoordelikhede op ’n liefdevolle, onselfsugtige en geduldige wyse nakom! En hoeveel makliker is dit tog vir die man om sy gepaste rol te vervul wanneer die vrou haar innerlike skoonheid openbaar deur hom liefdevol te ondersteun en nie mededingend of te krities te wees nie. In sulke omstandighede kan die gesinslewe waarlik aangenaam wees.

Die voorbeelde wat in die vorige artikel gemeld is, het getoon hoe sommige van hierdie eienskappe toegepas is. Die Sulammitiese meisie het standvastigheid en ’n opregte liefde vir haar skaapwagter geopenbaar toe sy geweier het om hom vir die glans van Salomo se hofhouding te verlaat. Josef het ’n innerlike goedheid getoon toe hy geweier het om teen sy heer, Potifar, te sondig. Hy het ook selfbeheersing aan die dag gelê toe hy gevlug het pleks van hom deur Potifar se vrou te laat verlei. En hy was ’n voorbeeld van sagmoedigheid, vrede en lankmoedigheid toe hy geweier het om toe te laat dat die talle ongunstige gebeure in sy lewe hom verbitterd maak.

Skoonheid in ’n lelike wêreld

Is sulke mooi eienskappe vandag prakties? Talle dink dit is nie. Hulle reageer eerder op die selfsugtige, hebsugtige wêreld waarin hulle lewe deur hardvogtig te word. Hulle meen dat hulle meedoënloos en ambisieus moet wees, hulself eerste moet stel en alles wat hulle kan kry, moet inpalm ten einde ’n bestaan te kan voer.

Die Bybel spoor ons daarenteen aan: “Moenie iets doen uit selfsug of uit ydele eer nie, maar in nederigheid moet die een die ander hoër ag as homself. Julle moet nie elkeen na sy eie belange omsien nie, maar elkeen ook na die ander s’n” (Filippense 2:3, 4). Dit is omdat die mensdom oor die algemeen nie hierdie goeie raad volg nie dat die mensegemeenskap so versleg.

Daarbenewens word ’n persoon se sukses in die teenswoordige wêreld volgens sy geld of posisie geoordeel. ’n Ryk man word as ’n suksesvolle man beskou. Maar wat werklike waardes betref, is dit heeltemal onbelangrik of ’n persoon ryk of arm is. Trouens, rykdom het sy gevare. Die Bybel waarsku: “Die wat ryk wil word, val in versoeking en strikke en baie dwase en skadelike begeerlikhede.” Dit voeg by: “Die geldgierigheid is ’n wortel van alle euwels.”—1 Timotheüs 6:9, 10.

Daar kan nie ontken word dat mense wat selfsugtig, hebsugtig, materialisties en meedoënloos is vandag dikwels tydelike “sukses” geniet nie. Maar dit is nie ware sukses nie, aangesien die prys van so ’n lelike leefwyse—persoonlike ongewildheid, mislukte huwelike, slegte gesondheid en algemene frustrasie—baie hoog is. Die mens is na die beeld van God geskep, maar hy kan nooit persoonlike geluk verkry wanneer hy so gewelddadig in opstand kom teen die eienskappe wat God oorspronklik in hom ingeplant het nie.—Genesis 1:27.

Hoe om die innerlike skoonheid te ontwikkel

Hoe kan ons dus die slegte invloed van hierdie wêreld weerstaan en edele, godvrugtige eienskappe aankweek? Toe Paulus die eienskappe ‘liefde, blydskap, vrede, lankmoedigheid, vriendelikheid, goedheid, getrouheid, sagmoedigheid en selfbeheersing’ gemeld het, het hy hulle “die vrug van die Gees” genoem (Galasiërs 5:22). God se gees is dus nodig as ons hierdie mooi innerlike eienskappe wil ontwikkel.

Hoe? Wel, ’n studie van die Bybel wat deur God se gees geïnspireer is, sal ons help om hierdie eienskappe uit te ken en ons begeerte versterk om hulle aan te kweek (2 Timotheüs 3:16). Jehovah se Getuies sal jou enige tyd graag in so ’n onderneming help, aangesien hulle dit as deel van hulle bediening beskou om mense te help om die Bybel te bestudeer. Eerlike selfondersoek sal ons in staat stel om te besef waar ons te kort skiet, en ons kan bid dat God se gees ons op hierdie gebiede help. Omgang met ander wat God saam met ons aanbid, sal ons die nodige ondersteuning van ons portuurs gee, en hier help God se gees ook, want Jesus het gesê: “Waar twee of drie in my Naam vergader, daar is Ek in hulle midde.”—Mattheüs 18:20.

’n Mooi wêreld lê voor

Natuurlik sal nie een van ons ons onvolmaakthede heeltemal te bowe kom nie, maar as ons daarna streef om hierdie innerlike skoonheid te verkry, sal God ons pogings seën. En hy sal ons op ’n wonderlike wyse beloon. Die Bybel meld God se voorneme om binnekort ’n nuwe stelsel van dinge in te bring wat heeltemal anders as die huidige een sal wees. In hierdie nuwe stelsel sal “die regverdiges . . . die aarde besit en vir ewig daarop woon” (Psalm 37:29). Jesus self het gesê: “Salig is die sagmoediges, want hulle sal die aarde beërwe.”—Mattheüs 5:5.

In daardie tyd sal die onaangename mededinging en selfsug van hierdie stelsel van dinge deur ’n mooi kalmte en onverstoordheid vervang word. “Hulle sal geen kwaad doen of verderf aanrig op my hele heilige berg nie; want die aarde sal vol wees van die kennis van die HERE soos die waters die seebodem oordek” (Jesaja 11:9). God sal inderdaad “al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan”.—Openbaring 21:4.

Klink sulke toestande aanloklik? Dit is moontlik net omdat die aarde se bewoners dan ’n innerlike skoonheid sal besit wat op liefde vir God en ons naaste gebaseer is. En God het belowe dat diegene wat hom nou dien, “die nuwe persoonlikheid” aankweek en hard daarna strewe om sy standaarde te volg die verwesenliking van daardie belofte sal sien. ’n Mooi voorkoms, uiterlike skoonheid, kan nooit sulke seëninge meebring nie. Watter goeie rede is dit dus om daardie ryker, langduriger innerlike skoonheid te verkry wat so aanneemlik is vir reggesinde mense en vir God self!

[Prent op bladsy 6]

Uiterlik aantreklike mense moet dit vermy om selfsugtig en manipulerend te wees. Hulle moet eerder die innerlike skoonheid aankweek wat God behaag