’n Gebalanseerde beskouing van modes
DIE Bybel sê dat God ‘alles mooi gemaak het op die tyd daarvoor’ (Prediker 3:11). Ons sien skoonheid oral om ons in die wêreld. Ons sien dit ook in mense.
Die modeontwerper se doel is om ons mooier te laat lyk deur die klere wat ons dra. Maar soos ons in die vorige artikel gesien het, het die modebedryf skoonheid ook geherdefinieer. Die sielkundeprofessor Ruth Striegel-Moore sê: “Ons het so gewoond daaraan geraak om brandmaer vroue te sien, dat dit ons standaard geword het van wat mooi is.”
Dit is duidelik dat dit onverstandig sal wees om toe te laat dat die wêreld se huidige konsep van skoonheid ons beskouings vorm. In haar boek Always in Style sê Doris Pooser dat “vandag se vrou glad nie nodig het om haar liggaam te verander of te kamoefleer elke keer wanneer daar ’n nuwe ‘ideaal’ is nie”. Ja, waarom moet ons toelaat dat die media, deur die stereotipes wat daarin uitgebeeld word, ons standaarde vorm? “Hoeveel makliker is dit tog om onsself te wees eerder as om desperaat te probeer verander wat ons het”, sê Pooser.
Tydlose skoonheid
Selfvertroue en tevredenheid in die lewe hang van baie meer af as om net goed te lyk. “Ware geluk kom van binne”, skryf Judy Sargent, ’n voormalige anoreksielyer. “Dit kan nie gevind word deur die syfers op ’n badkamerskaal te lees nie.” Die Bybel neem die saak ’n stap verder. “Julle skoonheid”, het die apostel Petrus geskryf, “moet dié van die innerlike mens wees, die tydlose skoonheid van ’n sagte en stille gees, wat die grootste waarde in die oë van God het.”—1 Petrus 3:4, Today’s English Version.
Die tydlose skoonheid waarna Petrus verwys, oortref fisiese skoonheid omdat dit blywend en waardevol in God se oë is. Baie eeue gelede het ’n wyse koning gesê: “Bekoorlikheid kan vals wees, en skoonheid kan nietig wees; maar die vrou wat Jehovah vrees, sy verwerf lof vir haarself.”—Spreuke 31:30.
Hoewel fisiese skoonheid dalk vandag meer aandag trek, respekteer baie mense nog die persoon wat Christelike eienskappe openbaar. Die apostel Paulus het Christene aangespoor: “Beklee julle met die nuwe persoonlikheid, . . . met die tere geneenthede van medelye, goedhartigheid, ootmoed, sagmoedigheid en lankmoedigheid.”—Kolossense 3:10, 12.
Modes is van verbygaande aard. Die jongste styl kan ons hoogstens ’n rukkie mooi laat lyk. Maar as ons persoonlikheid nie ons voorkoms aanvul nie, sal dit gou afbreuk doen aan enige goeie indruk wat ons maak. Onthou, “die vrugte van die gees”—waaronder die eienskappe liefde, vreugde, vrede, lankmoedigheid, goedheid en selfbeheersing—gaan nooit uit die mode nie.—Galasiërs 5:22, 23; 1 Timoteus 2:9, 10.
Maar dit is natuurlik gepas om die nodige aandag aan ons kleredrag te skenk. Aline, van Frankryk, erken dat dit ’n uitdaging was om ’n balans te behou. “As ’n tiener”, sê sy, “was ek dol oor klere. Ek wou die jongste modes volg omdat dit my selfvertroue gegee het. En as ek klere met ’n ontwerpershandelsmerk kon koop, was dit soveel beter.
“Maar toe ek grootword”, sê Aline verder, “moes ek leer om finansieel na myself om te sien, en ek het ook baie van my tyd in die Christelike bediening begin deurbring. Ek het besef dat ek nie langer ’n modeslaaf kon wees as ek binne my inkomste wou lewe nie. Ek het my klere tydens uitverkopings of by afslagwinkels begin koop. Ek het gevind dat ek nog steeds goed kon aantrek—maar teen ’n kwart van die prys. Die geheim is om te leer om klere te koop wat by jou pas, wat prakties is, wat goed pas by wat jy reeds het en wat nie gou uit die mode sal raak nie. Pleks van toe te laat dat die mode voorskryf wat ek koop, probeer ek nou besluit watter styl by my pas. Ek sal nie sê dat klere nie meer vir my belangrik is nie. Maar my waarde hang van baie meer af as net my voorkoms.”
In ’n samelewing waarin jou uiterlike dikwels meer tel as jou innerlike eienskappe, is dit verstandig van Christene om die Bybel se nugtere herinnering in gedagte te hou: “Alles wat die wêreld bied, alles wat die begeertes behaag of die oë verlok, al die glans van sy lewe, het nie sy oorsprong by die Vader nie maar by die goddelose wêreld. En daardie wêreld gaan verby met al sy aanloklikhede, maar hy wat God se wil doen, bly vir ewig.”—1 Johannes 2:16, 17, The New English Bible.
[Prent op bladsy 9]
Ware skoonheid kom van binne, nie van wat jy aantrek nie
[Prent op bladsy 10]
Kies klere wat prakties is en goed pas by wat jy reeds het