‘Nie skaam oor die goeie nuus nie’

“Ek skaam my nie oor die evangelie [“goeie nuus”, “NW”] van Christus nie, want dit is ’n krag van God tot redding vir elkeen wat glo.”—ROMEINE 1:16.

1. Hoe word goeie nuus gewoonlik ontvang, maar hoe sou ongelowige mense van die wêreld die goeie nuus oor God se Koninkryk beskou?

WAT vir een persoon na goeie nuus lyk, word dalk nie deur ’n ander as goeie nuus beskou nie. Gewoonlik ontvang ’n draer van goeie nuus ’n hartlike verwelkoming en is mense gretig om te hoor watter nuus hy het. Maar die Bybel het voorspel dat ongelowige mense van die wêreld die goeie nuus van God se Koninkryk en die gepaardgaande boodskap van redding nie as iets aangenaams sou beskou nie.—Vergelyk 2 Korinthiërs 2:15, 16.

2. Wat het die apostel Paulus gesê oor die goeie nuus wat hy verkondig het, en waarom is die boodskap wat hy verkondig het vandag steeds goeie nuus?

² Die apostel Paulus was iemand wat gestuur is om goeie nuus aan die publiek te bring. Hoe het hy oor sy opdrag gevoel? Hy het gesê: “Vandaar die [gretigheid] van my kant om ook aan julle wat in Rome is, die evangelie te verkondig. Want ek skaam my nie oor die evangelie van Christus nie” (Romeine 1:15, 16, vgl. NW). Nuus wat vandag, byna 2 000 jaar nadat die apostel Paulus aan die Christene in Rome geskryf het, steeds goed is, moet inderdaad langdurige goeie nuus wees. Trouens, dit is “ewige goeie nuus”.—Openbaring 14:6, NW.

3, 4. Waarom het die apostel Paulus gesê dat hy hom nie oor die goeie nuus geskaam het nie?

³ Waarom het die apostel Paulus gesê dat hy hom nie oor die goeie nuus geskaam het nie? Waarom kon hy hom daaroor geskaam het? Omdat dit nie ’n gewilde boodskap was nie, want dit het gehandel oor ’n man wat soos ’n veragte misdadiger aan ’n folterpaal genael is, wat hom op die oog af in ’n baie slegte lig gestel het. Hierdie man het drie en ’n half jaar lank die lengte en breedte van Palestina deurkruis met die goeie nuus en kwaai teenstand deur die Jode, veral die godsdiensleiers, ervaar. En nou het Paulus, wat die naam van daardie bespotte man gedra het, voor soortgelyke vyandigheid te staan gekom.—Mattheüs 9:35; Johannes 11:46-48, 53; Handelinge 9:15, 20, 23.

⁴ Sulke teenstand kon dit laat lyk het asof Paulus en sy mededissipels van Jesus Christus iets gehad het om hulle oor te skaam. Paulus het dan nou aan ’n beweging behoort wat hyself vroeër as skandelik geminag het. Hy het persoonlik gehelp om Jesus Christus se volgelinge skande aan te doen (Handelinge 26:9-11). Maar hy het daardie handelwyse gestaak. Gevolglik moes hy, en ander wat Christene geword het, gewelddadige vervolging verduur.—Handelinge 11:26.

5. Hoe het Paulus sy verklaring dat hy nie skaam is oor die goeie nuus nie verduidelik?

⁵ As ’n persoon sou toelaat dat hy hom begin skaam omdat hy ’n volgeling van Jesus Christus is, sou hy ’n menslike beskouing van sake hê. Die apostel Paulus was nie so nie. Nee, toe hy verduidelik het waarom hy nie skaam was oor die goeie nuus wat hy verkondig het nie, het hy gesê: “Want dit is ’n krag van God tot redding vir elkeen wat glo” (Romeine 1:16). Die krag van God is geen rede tot skaamte as dit deur ’n dissipel van Jesus werk om die lofwaardige voorneme van die glorieryke God van wie Jesus Christus self ’n aanbidder en lower was uit te voer nie.—Vergelyk 1 Korinthiërs 1:18; 9:22, 23, NW.

Wêreldwye verkondiging van die goeie nuus

6, 7. (a) Watter verantwoordelikheid aangaande die goeie nuus probeer Jehovah se Getuies nakom, en met watter gevolg? (b) Wat sal soms nodig wees, al wil ons nooit toelaat dat vrees ons verhinder om ’n getuienis te gee nie? (Sien voetnoot.)

⁶ Soos Paulus is die Getuies van Jehovah vandag dissipels van Sy verheerlikte Seun, Jesus Christus. Jehovah het hierdie skat van “die evangelie van die heerlikheid” aan hierdie Getuies van hom toevertrou (1 Timotheüs 1:11). Jehovah se Getuies het nie gefaal om hierdie ernstige verantwoordelikheid na te kom nie, en hulle word gemaan om hulle nie daaroor te skaam nie (2 Timotheüs 1:8). Dit is lewensbelangrik om nooit toe te laat dat vrees of skugterheid ons verhinder om ’n getuienis te gee of onsself as Jehovah se Getuies te identifiseer nie.a

⁷ Sulke moedige en onverskrokke getuieniswerk het daartoe gelei dat die naam van die allerhoogste God dwarsdeur die aarde bekendgemaak en die goeie nuus van sy Koninkryk op ’n wêreldskaal verkondig is. Die Seun van God het gesê: “Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom”, en daar sal nooit toegelaat word dat sy voorspelling misluk nie (Mattheüs 24:14). Die goeie nuus word nou in meer as 210 lande verkondig, en die einde van hierdie predikingswerk het nog nie aangebreek nie. Omdat ons nie skaam is oor die goeie nuus nie en die toekoms moedig tegemoetgaan, bid ons net soos Jesus Christus se vroeë dissipels: “En nou, Here, . . . gee aan u diensknegte om met alle vrymoedigheid u woord te spreek.”—Handelinge 4:29.

8. Waarom moet teenstand in al die nasies van die aarde Jehovah se Getuies nie ontmoedig nie?

⁸ Hoewel Jehovah se Getuies in al die nasies van die aarde gehaat en teengestaan word, vervul dit ’n voorspelling oor wat ’n kenmerk van ware aanbidders van die een lewende en ware God sou wees (Johannes 15:20, 21; 2 Timotheüs 3:12). Pleks van hierdeur ontmoedig en afgeskrik te word, word verkondigers van die goeie nuus dus herverseker dat hulle goddelike goedkeuring het en aan die goedgekeurde organisasie van die Universele Soewerein, Jehovah, behoort.

9. Waarom maak dit nie saak dat die hele wêreld teen ons gekant is nie?

⁹ Moet nooit vergeet nie: Ons word deur die allerhoogste God van die ganse heelal gesteun. Wat maak dit dan saak as die wêreld met al sy godsdienssektes en politieke partye teen ons gekant is? God se eniggebore Seun is deur die hele wêreld teengestaan, en ons is nie skaam om ons in dieselfde situasie te bevind nie. Soos hy vir sy apostels gesê het: “As die wêreld julle haat, moet julle weet dat hy My voor julle gehaat het. As julle van die wêreld was, sou die wêreld sy eiendom liefhê. Maar omdat julle nie van die wêreld is nie, maar Ek julle uit die wêreld uitverkies het, daarom haat die wêreld julle.”—Johannes 15:18, 19.

10. Uit watter bron het baie van die vervolging van die Getuies gekom, en waarom is hulle nie skaam daaroor nie?

¹⁰ Jehovah se Getuies het dus wêreldwyd vervolging verduur, maar veral in dié nasies wat die sogenaamde Christendom uitmaak. Sulke vervolging deur die Christendom bewys nie dat die Getuies nie-Christene is nie. Dit staaf eerder hulle bewering dat hulle ware Christene is, Getuies van die God en Vader van Jesus Christus, naamlik Jehovah. Omdat hulle God se Getuies is, skaam hulle hul nie wanneer hulle om sulke godsdiensredes vervolg word nie. Die apostel Paulus se vermaning aan die eerste-eeuse Christene om hulle nie te skaam nie, geld dus heel gepas vir Jehovah se Getuies van vandag.—Sien Filippense 1:27-29.

Die beste nuus wat verkondig kan word

11. Waarom hou ons nie op om volgelinge van Jesus Christus te wees as ons die naam Jehovah se Getuies aanvaar nie?

¹¹ Jehovah se Getuies het moedig hulle naam aanvaar ter vervulling van Jehovah se belofte aan sy verbondsvolk in Jesaja 43:10 (NW). Dit beteken egter nie dat hulle nie meer volgelinge van Jesus Christus is nie. Jesus is hulle Leier, die een wie se voorbeeld hulle volg. Hy is self een van Jehovah se getuies. Trouens, hy is die vernaamste Getuie van Jehovah.—1 Timotheüs 6:13, vgl. NW; Openbaring 1:5.

12. Watter soort nuus verkondig Jehovah se Getuies wêreldwyd, en waarom?

¹² Die boodskap wat hierdie Getuies van Jehovah wêreldwyd bekendmaak, is die beste nuus wat ooit verkondig kan word. Geen regering kan beter wees vir die mensdom as die Messiaanse Koninkryk wat Jehovah opgerig het om oor die mensewêreld te regeer nie, vir wie se verlossing hy sy eniggebore Seun gestuur het (Jesaja 9:5, 6). Die bewoners van die aarde aan wie die goeie nuus van die Koninkryk verkondig word, word die geleentheid gebied om dit te aanvaar en te bewys dat hulle die gawe van die ewige lewe in mensevolmaaktheid op ’n paradysaarde waardig is.

13. Waarom kan ons seker wees dat die Messiaanse Koninkryksregering die allerbeste sal wees, en wat beveel die Getuies sonder skaamte aan?

¹³ As Jesus bereid was om ’n wrede dood te sterf sodat hy diegene kon vrykoop wat sy onderdane sou word, sal hy hulle beslis net die allerbeste regering gee. Ons raai elke mens op aarde aan: Word ’n getroue, gehoorsame onderdaan van daardie regering. Ons skaam ons nie vir die regering wat ons opreg by die hele mensdom aanbeveel nie. Ons huiwer nie om die Koninkryk te verkondig nie, selfs al kan dit vervolging teen ons ontketen. Soos die apostel Paulus sê elkeen van ons: “Ek skaam my nie oor die evangelie van Christus nie.”

14. Hoe omvattend sou die verkondiging van die Koninkryk volgens Jesus se profesie in ons dag wees?

¹⁴ Jesus het voorspel dat die verkondiging van die goeie nuus van die Koninkryk op ’n wêreldskaal gedoen sou word, en hierdie breë, omvattende profesie was gepas vir so ’n boodskap (Markus 13:10). Hy was nie huiwerig om te voorspel dat Jehovah se Koninkryk oral verkondig sou word nie—ja, tot aan die uiterstes van die aarde (Handelinge 1:8). Jesus het geweet dat sy getroue volgelinge op elke plek waar mense gevind kon word ’n opregte poging sou aanwend om hulle met die goeie nuus van die Koninkryk te bereik.

15, 16. (a) Wie verdien om met die goeie nuus bereik te word? (b) Waarom sal die predikingswerk ten spyte van vervolging deur die Duiwel se organisasie gedoen word?

¹⁵ Daar is vandag duisendmiljoene mense op aarde, en hulle is oor al die kontinente en vernaamste eilande van die oseane versprei. Maar geen deel van die bewoonde aarde was te ver vir Jehovah se Getuies om ’n poging aan te wend om dit met die goeie nuus te bereik nie. Die hele bewoonde aarde is Jehovah God se simboliese voetbank (Jesaja 66:1). Dit is net reg dat menseskepsele op alle dele van sy voetbank met hierdie boodskap van redding bereik moet word.

¹⁶ Die goeie nuus is vandag verblydende nuus van ’n reeds opgerigte koninklike regering in die hande van die Messias. Jesus het geweet dat God se gees die Messias se ware volgelinge sou beweeg om hulle, ondanks die allerwreedste vervolging deur die Duiwel se organisasie, tot die uiterste toe in te span sodat “hierdie evangelie van die koninkryk” as ’n voldonge feit “in die hele wêreld” verkondig kon word.—Mattheüs 24:14.

Nie skaam oor Jesus Christus en Jehovah nie

17. (a) Waarvoor skaam ware aanbidders hulle nie? (b) Watter reël het Jesus in Markus 8:38 neergelê, en van watter belang is dit?

¹⁷ Die allerhoogste God het nie gehuiwer om homself ’n naam te gee nie, Jehovah; en sy getroue aanbidders moet hulle ook nie vir daardie naam skaam nie. Dit verskaf ware aanbidders genoeë om bekend te staan en erken te word as diegene wat hom onverdeeld aanbid en gehoorsaam. In Markus 8:38 het Jesus die volgende reël, of beginsel, aangaande homself neergelê: “Elkeen wat hom vir My en my woorde skaam in hierdie owerspelige en sondige geslag, vir hom sal die Seun van die mens Hom ook skaam wanneer Hy kom in die heerlikheid van sy Vader met die heilige engele.” Net so sal Jehovah hom met reg skaam vir enigiemand wat hom vir die God en Vader van die Heer Jesus Christus begin skaam. En enige skepsel vir wie Jehovah hom begin skaam weens sy ontroue handelwyse sal nie die lewe in enige deel van God se ryk in die hemel of op aarde waardig wees nie.—Lukas 9:26.

18. (a) Waarom moet Jesus se woorde in Mattheüs 10:32, 33 diep in ons hart en verstand ingeprent wees? (b) Wat gebeur met diegene wat Jesus en Jehovah weens mensevrees verloën? (Gee voorbeelde wat op die voetnoot gebaseer is.)

¹⁸ Kom ons prent die volgende woorde van Jesus Christus diep in ons hart en verstand in: “Elkeen dan wat My sal bely voor die mense, hom sal Ek ook bely voor my Vader wat in die hemele is. Maar elkeen wat My verloën voor die mense, hom sal Ek ook verloën voor my Vader wat in die hemele is” (Mattheüs 10:32, 33; Lukas 12:8, 9). Enigiemand wat die God en Vader van die Heer Jesus Christus verloën, sal insgelyks deur Hom verloën word. So ’n persoon sal nie waardig geag word om ’n lid van die huisgesin te wees waarvan Jesus Christus die vernaamste Seun is nie. Gevolglik sal hy op God se vasgestelde tyd vernietig word.b

19, 20. (a) Waarom sal diegene wat gebid het dat Jehovah se naam geheilig word niks hê om hulle oor te skaam nie? (b) Wat het die onverskrokke Koninkryksverkondigers gedoen, en met watter steun?

¹⁹ Die modelgebed wat Jesus sy dissipels geleer het, sal verhoor word: “Onse Vader wat in die hemele is, laat u Naam geheilig word; laat u koninkryk kom; laat u wil geskied, soos in die hemel net so ook op die aarde” (Mattheüs 6:9, 10). Wanneer dit gebeur, sal Jesus se liefdevolle dissipels niks hê om hulle oor te skaam nie. Jehovah se naam sal vereer en geheilig word, nie net deur miljoene wat nou lewe en nooit hoef te sterwe nie, maar ook deur duisendmiljoene van die mensdom wat hy gedurende sy duisendjarige Koninkryksheerskappy uit hul grafte sal opwek. Hulle sal die geleentheid hê om vir ewig op ’n paradysaarde te lewe.

²⁰ Hierdie onverskrokke verkondigers van die goeie nuus van die Koninkryk kon ondanks wêreldwye teenstand en sonder om hulle te skaam ’n aardwye getuienis gee omdat hulle deur bomenslike krag onderskraag word—die steun van die hemelse engele. Daarom “vrees” Jehovah se Getuies God en ‘gee hulle Hom heerlikheid’.—Openbaring 14:6, 7.

Nie skaam om God te vrees en Hom heerlikheid te gee nie

21. Wat was Jehovah se Getuies nie skaam om te doen nie, en met watter gevolg?

²¹ Jehovah se Getuies het bewys dat hulle nie skaam is om God te vrees en hom heerlikheid te gee nie en gebruik selfs sy eie, persoonlike naam, Jehovah. Dit het onbeskryflike seëninge vir hulle meegebring. Hierdie seëninge was ’n getroue vervulling van die allerhoogste God se beloftes. Hoe het dit hom tog as die een lewende en ware God, die Soewerein van die heelal, geregverdig!

22. Waarom sal Jehovah se Getuies wrede vervolging verduur, maar watter vreugde sal hulle smaak?

²² Die sekulêre regerings sal eersdaags teen godsdiensheerskappye draai en hulle almal—met inbegrip van die Christendom—uitwis (Openbaring 17:16, 17). Gevolglik sal Jehovah se Getuies ’n tydperk van wrede vervolging deur die wêreldse elemente moet verduur. Tensy die ewige God met hulle is, sal hulle nie kan volhard en dit nie kan oorleef nie. Maar hy ís met hulle, en daarom sal hulle die vreugde smaak om te sien hoe al sulke vyande wat anti-Christelik en anti-Jehovah is, uitgewis word deur die God wat die Getuies onwrikbaar aanbid. Hulle sal nie die skande ervaar om as vyande van ware teokrasie aan die kaak gestel en vernietig te word nie, maar sal onbeskryflike vreugde smaak wanneer hulle tot Jehovah sing: “Van ewigheid tot ewigheid is U God.”—Psalm 90:2.

23. Waarom het Jehovah se Getuies niks om hulle oor te skaam nie, en wat sal die gevolg wees?

²³ Hulle sal hulle verheug in God, die Vader van Jesus Christus, deur wie die mensdom vrygekoop word om ewige lewe in mensevolmaaktheid en geluk op ’n paradysaarde te geniet. Wat ’n kragtige God is Jehovah tog nie, soos hy deur Christus Jesus bewys het! Hoe pragtig het Jehovah tog getoon dat hy sy almag op ’n wyse en liefdevolle manier gebruik, nie misbruik nie! Gevolglik is daar niks in verband met hom of sy eniggebore Seun, Jesus Christus, waaroor ons ons hoef te skaam nie. Ons is nie skaam om verkondigers te wees van die glorieryke goeie nuus oor Jehovah God se allesverowerende krag wat hy uitoefen deur Christus Jesus nie, wat tydens die laaste ure van sy aardse lewe gesê het: “Hou goeie moed, Ek het die wêreld oorwin” (Johannes 16:33). Terwyl ons hierdie weg bewandel, moet ons altyd die voorbeeld volg van die apostel Paulus, wat nooit skaam was oor die goeie nuus nie. As ons dit doen, sal die almagtige God hom nie vir ons begin skaam nie.

[Voetnote]

Vrae ter opsomming

◻ Watter gesindheid moet ons, soos die apostel Paulus, ten opsigte van die verkondiging van die goeie nuus hê, en waarom?

◻ Waarom is die boodskap wat Jehovah se Getuies verkondig die beste nuus wat daar nog ooit was?

◻ Watter waarskuwing het Jesus gegee oor enigiemand wat hom sou begin skaam vir Hom wanneer Hy in sy Koninkryksheerlikheid kom?

◻ Wat gebeur met diegene wat Jesus en Jehovah verloën?

◻ Wat kon die verkondigers van die goeie nuus sonder skaamte doen, en waarom?