God se oordeel teen “die wettelose mens”
“Elke boom wat nie goeie vrugte dra nie, word uitgekap en in die vuur gegooi.”—MATTHEÜS 7:19.
1, 2. Wat is die wettelose mens, en hoe het dit ontwikkel?
TOE die apostel Paulus deur God geïnspireer is om die koms van ’n “wettelose mens” te voorspel, het hy gesê dat dit reeds in sy dag begin verskyn het. Soos die vorige artikel verduidelik het, het Paulus gepraat van ’n klas individue wat die voortou sou neem met afvallige versaking van die ware Christelike godsdiens. Daardie versaking van die waarheid het teen die einde van die eerste eeu begin, veral na die dood van die laaste apostels. Die wettelose klas het leerstellings en gebruike ingebring wat strydig was met God se Woord.—2 Thessalonicense 2:3, 7, NAV; Handelinge 20:29, 30; 2 Timotheüs 3:16, 17; 4:3, 4.
2 Hierdie wettelose klas het mettertyd ontwikkel en die geestelikes van die Christendom geword. Die mag daarvan is in die vierde eeu deur die Romeinse keiser Konstantyn gekonsolideer toe die huwelik tussen die afvallige kerke en die heidense Staat plaasgevind het. Namate die Christendom in ’n menigte sektes versplinter het, het die geestelikes voortgegaan om hulle bo die leke en dikwels ook bo die sekulêre heersers te verhef.—2 Thessalonicense 2:4, NAV.
3. Wat sal die lot van die wettelose mens wees?
3 Wat sou die lot van die wettelose mens wees? Paulus het voorspel: “Die wettelose self [sal] op die toneel verskyn. Maar wanneer die Here Jesus kom, sal Hy hom . . . verdelg en deur die glans van sy verskyning vernietig” (2 Thessalonicense 2:8, NAV). Dit beteken dat die geestelikes vernietig sal word wanneer God Satan se hele stelsel tot ’n einde gaan bring. God gebruik sy hemelse Koning, Christus Jesus, om die engelemagte wat die doodstraf sal voltrek aan te voer (2 Thessalonicense 1:6-9; Openbaring 19:11-21). Hierdie lot wag vir die geestelikes omdat hulle God en Christus oneer aangedoen en miljoene mense van ware aanbidding weggelei het.
4. Volgens watter beginsel sal die wettelose mens geoordeel word?
4 Jesus het die beginsel gegee waarvolgens die wettelose mens geoordeel sou word toe hy gesê het: “Pas op vir die valse profete wat in skaapsklere na julle kom en van binne roofsugtige wolwe is. Aan hulle vrugte sal julle hulle ken. ’n Mens pluk tog nie druiwe van dorings of vye van distels nie! So dra elke goeie boom goeie vrugte; maar ’n slegte boom dra slegte vrugte. ’n Goeie boom kan geen slegte vrugte dra nie, en ’n slegte boom ook geen goeie vrugte nie. Elke boom wat nie goeie vrugte dra nie, word uitgekap en in die vuur gegooi. . . . Nie elkeen wat vir My sê: Here, Here! sal ingaan in die koninkryk van die hemele nie, maar hy wat die wil doen van my Vader wat in die hemele is.”—Mattheüs 7:15-21; sien ook Titus 1:16; 1 Johannes 2:17.
Goeie Christelike vrugte
5. Wat is die grondslag van goeie Christelike vrugte, en wat is ’n fundamentele gebod?
5 Die grondslag van goeie Christelike vrugte word in 1 Johannes 5:3 gemeld, wat sê: “Dit is die liefde tot God, dat ons sy gebooie bewaar.” En ’n fundamentele gebod is: “Jy moet jou naaste liefhê soos jouself” (Mattheüs 22:39). God se ware knegte moet dus liefde hê vir hulle naaste, ongeag hulle ras of nasionaliteit.—Mattheüs 5:43-48; Romeine 12:17-21.
6. Teenoor wie in die besonder moet Christelike liefde getoon word?
6 God se knegte moet veral liefde hê vir diegene wat hulle geestelike broers is. “As iemand sê: Ek het God lief—en sy broeder haat, is hy ’n leuenaar; want wie sy broeder wat hy gesien het, nie liefhet nie, hoe kan hy God liefhê wat hy nie gesien het nie? En hierdie gebod het ons van Hom dat hy wat God liefhet, ook sy broeder moet liefhê” (1 Johannes 4:20, 21). Jesus het gesê dat daardie liefde ’n kenmerk van ware Christene sou wees: “Hieraan sal almal weet dat julle my dissipels is, as julle liefde onder mekaar het.”—Johannes 13:35; sien ook Romeine 14:19; Galasiërs 6:10; 1 Johannes 3:10-12.
7. Hoe word ware Christene wêreldwyd verenig?
7 Broederliefde is die “gom” wat God se knegte in eenheid saambind: “Beklee julle . . . met liefde, want dit is ’n volmaakte band van eenheid” (Kolossense 3:14, NW). En ware Christene moet in eenheid verkeer met hulle broers in alle wêrelddele, want God se Woord beveel: “[Wees] eensgesind . . . Daar moet geen verdeeldheid onder julle wees nie. Julle moet een wees in dieselfde gesindheid en met dieselfde oortuiging” (1 Korinthiërs 1:10, NAV). God se knegte moet neutraal staan ten opsigte van hierdie wêreld se politieke aangeleenthede om hierdie liefde en eenheid op wêreldskaal te kan handhaaf. Jesus het gesê: “Hulle is nie van die wêreld nie, net soos Ek nie van die wêreld is nie.”—Johannes 17:16.
8. Hoe het Jesus toegelig wat Christene moet doen?
8 Jesus het die omvang van wat hy in gedagte gehad het, toegelig toe Petrus die oor van een van die manne wat Jesus kom arresteer het met ’n swaard afgekap het. Was Jesus ten gunste van sulke geweld, selfs al was dit om die Seun van God teen teenstanders te beskerm? Nee, hy het eerder vir Petrus gesê: “Sit jou swaard in sy plek terug” (Mattheüs 26:52). Daarom neem ware Christene nie deel aan die oorloë van die nasies of aan enige ander vergieting van mensebloed nie, selfs al beteken hulle weiering dat hulle weens hul neutraliteit gemartel word, soos deur die eeue heen en selfs in ons tyd met baie gebeur het. Hulle weet dat net God se Koninkryk onder Christus oorlog en bloedvergieting vir ewig sal beëindig.—Psalm 46:10; Mattheüs 6:9, 10; 2 Petrus 3:11-13.
9. (a) Wat toon die geskiedenis ons aangaande die eerste Christene? (b) Watter kontras vorm dit met die Christendom se godsdienste?
9 Die geskiedenis bevestig dat eerste-eeuse Christene geweier het om mensebloed te vergiet. Peter De Rosa, ’n voormalige Britse professor in die teologie, skryf: “Bloedvergieting was ’n ernstige sonde. Dit was waarom Christene teen gladiatorgevegte gekant was. . . . Hoewel oorlog en geweld nodig was vir die behoud van Rome was Christene van mening dat hulle nie daarby betrokke kon raak nie. . . . Christene het hulleself, soos Jesus, as boodskappers van vrede beskou; hulle kon onder geen omstandighede bewerkers van die dood wees nie.” Aan die ander kant het die verdeelde godsdienste van die Christendom die liefdegebod geskend en ’n enorme hoeveelheid bloed vergiet. Hulle was nie boodskappers van vrede nie maar was herhaaldelik bewerkers van die dood.
Bloedskuldige Babilon die Grote
10. Wat is Babilon die Grote, en waarom het dit daardie naam?
10 Satan is “die owerste van hierdie wêreld”, “die god van hierdie wêreld” (Johannes 12:31; 2 Korinthiërs 4:4). Die wêreldwye stelsel van valse godsdiens wat Satan al eeue lank opbou, met inbegrip van die Christendom en haar geestelikes, maak deel van sy wêreld uit. Die Bybel noem hierdie wêreldwye stelsel van valse godsdiens “Babilon die Grote, die moeder van die [geestelike] hoere en van die walglikhede van die aarde” (Openbaring 17:5, NW). Die valse godsdienste van vandag het hulle oorsprong by die eertydse stad Babilon, wat deurdrenk was van valse godsdiens en godonterende leerstellings en gebruike. Dit is waarom eertydse Babilon se teenbeeld Babilon die Grote genoem word, die wêreldryk van valse godsdiens.
11. Wat sê die Bybel oor Babilon die Grote, en waarom?
11 God se Woord sê aangaande die godsdiensryk Babilon: “Die bloed van profete en heiliges is in haar gevind, en van almal wat op die aarde gedood is” (Openbaring 18:24). In watter sin is hierdie wêreld se godsdienste verantwoordelik vir die bloed van almal wat gedood is? In die sin dat al hierdie godsdienste—die Christendom se kerke sowel as nie-Christelike godsdienste—die oorloë van die nasies gesteun en goedgepraat het en selfs die voortou daarin geneem het; hulle het ook godvresende mense wat met hulle verskil het, vervolg en doodgemaak.
’n Godonterende geskiedenis
12. Waarom is die geestelikes van die Christendom laakbaarder as ander godsdiensleiers?
12 Wat bloedvergieting betref, is die Christendom se geestelikes laakbaarder as ander godsdiensleiers. Waarom? Omdat hulle nie net God se naam op hulle geneem het nie, maar ook dié van Christus. Daardeur het hulle hulself onder verpligting geplaas om Jesus se leringe te volg (Johannes 15:10-14). Maar hulle het nie daardie leringe gevolg nie en het sodoende beide God en Christus groot oneer aangedoen. Die geestelikes was direk vir bloedvergieting verantwoordelik—soos in die Kruistogte, ander godsdiensoorloë, inkwisisies en vervolgings—sowel as indirek, deurdat hulle oorloë goedgepraat het waarin lede van die kerke hul naaste in ander lande doodgemaak het.
13. Waarvoor was die geestelikes van die 11de tot die 13de eeu verantwoordelik?
13 Byvoorbeeld: van die 11de tot die 13de eeu het die geestelikes van die Christendom die Kruistogte ingestel. Hierdie Kruistogte het verskriklike bloedvergieting en plundering in die naam van God en Christus tot gevolg gehad. Honderdduisende is gedood. Die Kruistogte het die sinlose slagting onder duisende kinders ingesluit wat oorgehaal is om aan die Kinderkruistog in die jaar 1212 deel te neem.
14, 15. Watter kommentaar lewer ’n Katolieke skrywer oor wat die Katolieke Kerk in die 13de eeu ingestel het?
14 In die 13de eeu het die Rooms-Katolieke Kerk ’n ander godonterende gruwel amptelik goedgekeur—die Inkwisisie. Dit het in Europa begin en na die Amerikas uitgebrei en langer as ses eeue geduur. Dit was ’n moorddadige poging om almal wat met die kerk verskil het te martel en uit te wis en is deur die pousdom ingestel en gesteun. Hoewel die kerk voorheen nie-Katolieke vervolg het, was die omvang van die Inkwisisie baie groter.
15 Peter De Rosa, wat homself as ’n “patriotiese Katoliek” beskryf, sê in sy onlangs gepubliseerde boek Vicars of Christ—The Dark Side of the Papacy: “Die kerk was verantwoordelik vir die vervolging van Jode, vir die Inkwisisie, vir die vermoording van derduisende ketters, vir die herinstelling van marteling in Europa as deel van die geregtelike proses. . . . Pouse het selfs keisers aangestel en afgesit en geëis dat hulle hul onderdane onder bedreiging met marteling en die dood die Christelike godsdiens oplê. . . . Dit het die Evangelieboodskap vreeslike skade berokken.” Die enigste “misdaad” van party wat vermoor is, was dat hulle ’n Bybel besit het.
16, 17. Watter kommentaar word oor die Inkwisisie gelewer?
16 Aangaande pous Innocentius III van die vroeë 13de eeu sê De Rosa: “Volgens skatting het daar tydens die laaste en mees barbaarse vervolging onder [Romeinse] keiser Diocletianus [derde eeu] sowat tweeduisend Christene oor die hele wêreld vergaan. Tydens die eerste wrede insident van pous Innocentius se Kruistog [teen “ketters” in Frankryk] is tien keer soveel mense uitgewis. . . . Dit kom as ’n skok om uit te vind dat ’n pous, in een slag, baie meer Christene doodgemaak het as Diocletianus. . . . Dit het [Innocentius] nie in die minste gepla om Christus se naam te gebruik om alles te doen waarteen Christus beswaar gemaak het nie.”
17 De Rosa sê dat die inkwisiteurs, “in naam van die pous verantwoordelik was vir die mees barbaarse en volgehoue aanslag op menswaardigheid in die geskiedenis van die ras”. Hy sê die volgende aangaande die Dominikaanse inkwisiteur Torquemada in Spanje: “Hy is in 1483 aangestel en het vyftien jaar lank soos ’n tiran geheers. Meer as 114 000, waarvan 10 220 verbrand is, het sy slagoffers geword.”
18. Hoe kenskets ’n skrywer die Inkwisisie, en watter rede gee hy vir die feit dat dit langer as ses eeue aangehou het?
18 Hierdie skrywer maak die gevolgtrekking: “Die geskiedenis van die Inkwisisie sal vir enige organisasie ’n verleentheid wees; vir die Katolieke kerk is dit verwoestend. . . . Die geskiedenis toon in werklikheid dat die pousdom meer as ses eeue lank sonder tussenpoos die geswore vyand van elementêre geregtigheid was. Uit tagtig pouse wat mekaar sedert die dertiende eeu opgevolg het, het nie een die teologie en meganisme van die Inkwisisie afgekeur nie. Trouens, een na die ander het sy eie wreedhede by die werking van hierdie dodelike masjinerie gevoeg. Die raaisel is: hoe kon pouse hierdie kettery geslag na geslag in die praktyk voortsit? Hoe kon hulle die Evangelie van Jesus om elke hoek en draai loën?” Hy antwoord: “Pouse het verkies om die Evangelie pleks van ’n ‘onfeilbare’ voorganger te weerspreek, want dit sou die pousdom self tot ’n val gebring het.”
19. Watter ander wettelose bedrywigheid is deur die meeste geestelikes goedgepraat?
19 Die rol wat die geestelikes in die instelling van gewelddadige slawerny gespeel het, was eweneens wetteloos. Die nasies van die Christendom het derduisende Afrikane ontvoer, ver van hul eie lande weggeneem en hulle eeue lank fisies en verstandelik as slawe mishandel. Betreklik min van die geestelikeklas het dit daadwerklik teengestaan. Party van hulle het selfs beweer dat dit God se wil is.—Sien Mattheüs 7:12.
Bloedskuld in die 20ste eeu
20. Hoe het die bloedskuld van die wettelose mens in hierdie eeu ’n hoogtepunt bereik?
20 Die bloedskuld van die wettelose mens het ’n hoogtepunt in ons eeu bereik. Die geestelikes het oorloë gesteun wat tienmiljoene lewens geëis het, die ergste oorloë in die hele geskiedenis. Hulle het albei kante in die twee wêreldoorloë gesteun, waartydens lede van dieselfde godsdiens, “broers”, mekaar doodgemaak het. Byvoorbeeld, gedurende die Tweede Wêreldoorlog het Franse en Amerikaanse Katolieke Duitse en Italiaanse Katolieke doodgemaak en het Britse en Amerikaanse Protestante Duitse Protestante doodgemaak. Partymaal het hulle ander doodgemaak wat nie net tot dieselfde godsdiens behoort het nie maar ook tot dieselfde nasionaliteit. Die twee wêreldoorloë het in die hartjie van die Christendom uitgebreek en sou nooit kon plaasvind nie as die geestelikes die gebod om liefde te toon gehoorsaam het en hulle volgelinge geleer het om dieselfde te doen.
21. Wat sê sekulêre publikasies oor die geestelikes se betrokkenheid by oorlog?
21 The New York Times het bevestig: “In die verlede het plaaslike Katolieke priesterheerskappye feitlik altyd die oorloë van hulle nasies gesteun, troepe geseën en gebede om oorwinning gedoen, terwyl ’n ander groep biskoppe aan die ander kant in die openbaar vir die teenoorgestelde uitkoms gebid het. . . . Die kontras tussen die Christelike gees en oorlogsdade . . . word voortdurend duideliker vir baie mense namate wapens al hoe gruweliker word.” En die U.S.News & World Report het gesê: “Die Christelike godsdiens se aansien in die wêreld is ernstig geskaad deur die feit dat die sogenaamd Christelike nasies so dikwels geweld gebruik het.”
22. Waarvoor anders is die geestelikes in ons tyd verantwoordelik?
22 Al is daar vandag geen amptelike Inkwisisie nie het die geestelikes ook die arm van die Staat gebruik om “profete” en “heiliges” wat met hulle verskil te vervolg. Hulle het druk op politieke leiers uitgeoefen om ‘onder die dekmantel van die wet onheil te bewerk’. Sodoende het hulle òf veroorsaak dat godvresende mense van ons eeu in die ban gedoen, opgesluit, geslaan, gemartel en selfs doodgemaak is, òf andersyds sulke dade goedgekeur.—Openbaring 17:6; Psalm 94:20, The New English Bible.
Wanneer hulle tot verantwoording geroep word
23. Waarom sal God die wettelose mens tot verantwoording roep?
23 Die bloed van profete, van heiliges en van almal wat op die aarde gedood is, word inderdaad in valse godsdiens gevind (Openbaring 18:24). Aangesien die ergste bloedvergieting in die Christendom plaasgevind het, is die skuld van die geestelikes die grootste. Hoe paslik beskryf die Bybel hulle tog as ’n “wettelose mens”! Maar God se Woord sê ook: “Moenie dwaal nie; God laat Hom nie bespot nie; want net wat die mens saai, dit sal hy ook maai” (Galasiërs 6:7). God sal die wettelose geestelikes dus tot verantwoording roep.
24. Watter wêreldskokkende gebeure gaan binnekort plaasvind?
24 Jesus het gesê: “Gaan weg van My, julle wat die ongeregtigheid [of, “wetteloosheid”, NW] werk” (Mattheüs 7:23). En hy het verklaar: “Elke boom wat nie goeie vrugte dra nie, word uitgekap en in die vuur gegooi” (Mattheüs 7:19). Die tyd vir die vurige einde van die wettelose mens, tesame met alle valse godsdiens, nader vinnig. Daardie einde sal kom wanneer die politieke elemente waarmee hulle gehoereer het teen hulle sal draai: “Hulle sal die hoer haat en haar verlate maak en naak, en haar vlees eet en haar met vuur verbrand” (Openbaring 17:16). Aangesien sulke wêreldskokkende gebeure binnekort gaan plaasvind, moet God se knegte dit aan ander bekendmaak. Die volgende artikel sal toon hoe hulle dit reeds gedoen het.
Hersieningsvrae
◻ Wat is die wettelose mens, en hoe het dit ontwikkel?
◻ Watter goeie vrugte moet ware Christene voortbring?
◻ Wie is Babilon die Grote, en hoe bloedskuldig is sy?
◻ Watter godonterende geskiedenis het die wettelose mens?
◻ Hoe sal God die wettelose mens tot verantwoording roep?
[Prent op bladsy 18]
Die Kruistogte het verskriklike bloedvergieting in die naam van God en van Christus tot gevolg gehad
[Erkenning]
By courtesy of The British Library
[Prent op bladsy 19]
“Plaaslike Katolieke priesterheerskappye [het] feitlik altyd die oorloë van hulle nasies gesteun”
[Erkenning]
U.S. Army