Getuieniswerk in sakegebiede op die Japannese manier

JESUS CHRISTUS se opdrag om die getuieniswerk “tot aan die uiterste van die aarde” uit te brei, moet ook sakegebiede insluit (Handelinge 1:8). In Japan is dit ’n taamlike uitdaging om die Koninkryksboodskap aan mense in staatsgeboue en die kantore van groot maatskappye te verkondig. Koninkryksverkondigers in een gemeente het toestemming gekry om gedurende middagete tydskrifwerk in ’n kantoorgebou in die stad te doen. Die verkondigers het nie net tot Jehovah gebid om hulle moed te gee nie, maar het ook besondere aandag aan hulle voorkoms en gedrag geskenk, en het selfs lapelkaarte gemaak waarop hulle name was en wat hulle as Jehovah se Getuies geïdentifiseer het.

Die Getuies het die werkers genader en gesê: “Verskoon my, ek het toestemming om met mense hier te praat. Sal jy omgee om na my te luister terwyl jy eet?” Die Getuies moes goeie oordeel toon en woorde gebruik wat “met sout besprinkel” is (Kolossense 4:6). Met hulle eerste besoek het hulle 39 tydskrifte versprei, maar hulle het eers na vier besoeke met al 1 500 mense wat in die agtverdiepinggebou werk, gepraat. Hulle het meer as honderd tydskrifte versprei en kon tydskrifroetes begin en herbesoeke doen.

Een van die verkondigers het ’n herbesoek op ’n bestuurder gedoen. Toe ’n teks uit die New World Translation vir hom gelees is, het hy gesê: “Dit is maklik om hierdie Bybel te verstaan. Die een wat ek voorheen gelees het, is in verouderde Japannees en is baie moeilik om te lees.” ’n Eksemplaar van die New World Translation is die volgende week by hom afgelewer.

Kan jy meer in jou gemeente se gebied doen om die goeie nuus aan “alle mense”, met inbegrip van dié in sakegebiede, te verkondig?—Vergelyk 1 Timotheüs 2:4.