Koninkryksverkondigers berig

’n Vyfjarige wek belangstelling

ONDER die meer as 40 000 Getuies van Jehovah in Venezuela is ’n vyfjarige seuntjie wat ’n aangrypende ondervinding gehad het. Hy het aandagtig geluister na openbare toesprake oor die boek Lewe—Hoe het dit hier gekom?—Deur evolusie of deur die skepping? en na latere gesinsbesprekings van die boek. Die vyfjarige, wat uit ’n teokratiese gesin kom, het dus verstaan dat evolusie beweer dat die mens uit ’n “sop” ontstaan het. Een van die gedeeltes in die boek bespreek die evolusieleer dat lewe uit ’n organiese sop geëvolueer het.

’n Gesin wat langsaan woon (man, vrou, twee tienderjarige seuns en ’n sewejarige dogtertjie) het 14 jaar lank onverskillig gestaan teenoor die versoeke van die Getuie-gesin om die Bybel te ondersoek en saam met hulle na die Koninkryksaal te gaan.

Eendag het die Getuie-vrou, terwyl sy skottelgoed gewas het, ’n interessante gesprek tussen haar seuntjie en die bure se dogtertjie naby die heining gehoor. Die seuntjie het gesê: “Weet jy wat? Die wêreldse mense sê dat die mens uit ’n sop kom!” Die dogtertjie het soos gewoonlik teruggeantwoord: “Is jy mal?” Die seuntjie het geantwoord: “Nee, ek is nie mal nie. Die wêreldse mense sê dat die mens uit ’n sop kom; maar Jehovah het die mens gemaak.” Die seuntjie het die spot gedryf met die idee, want hy het gedink dat dit gewone sop is wat ’n mens eet en waarvan hy nie gehou het nie. Hy het toe verder vir die dogtertjie gesê: “My pappa moet vir jou pappa die Skepping-boek gee sodat hy kan sien dat God die mens geskep het.” Die dogtertjie het egter gesê dat hulle Katolieke is, en dit het die gesprek beëindig.

Toe die suster se man, wat ’n ouere man is, van die werk af tuisgekom het, het sy vir hom van die gesprek vertel wat sy toevallig gehoor het. Hoewel die voorval tussen die kinders hulle laat lag het, het die broer gedink dat Jehovah miskien wil hê dat hy nog ’n keer vir sy buurman moet getuig. ’n Paar dae later het hy sy buurman dus genader en vir hom van die kinders se gesprek vertel. Hy het gesê dat hy namens sy seun vir hom ’n eksemplaar van die Skepping-boek wil gee. Die Getuie het die buurman aangeraai om dit sonder vooroordeel te lees, aangesien dit die oorsprong van die lewe sou toon.

Tot die broer se verbasing het hierdie egpaar, wat so lank onverskillig teenoor die waarheid gestaan het, ’n paar dae later by die broer se huis opgedaag en hulle spyt uitgespreek oor die houding wat hulle soveel jare lank ingeneem het. Hulle het gesê dat hulle verbaas was oor die wonderlike kwaliteit van die Skepping-boek.

Die uiteinde was dat ’n Bybelstudie met hierdie gesin begin is. Hulle het vergaderinge gereeld begin bywoon en weldra verkondigers van die goeie nuus geword. Die man, sy vrou en die twee tienderjarige seuns is by ’n streekbyeenkoms gedoop, en die dogtertjie is ook ’n Koninkryksverkondiger. Die vrou het onmiddellik met gereelde hulppionierdiens begin nadat sy gedoop is.

Jesus Christus weet wie goeie harte het, en hy kan selfs kindertjies gebruik om sulke goeie harte te bereik, en hy doen dit wel.—Johannes 10:14.