Eerlikheid duur die langste
EERLIKHEID word hoog aanbeveel in die Bybel en is ’n vereiste vir ware Christene (Mattheüs 22:39; 2 Korinthiërs 8:21). Bowendien duur eerlikheid werklik die langste, of is dit die voordeligste, soos blyk uit die lewe van baie wie se verstand en hart in ons dag deur juiste Bybelkennis vernuwe is. ’n Voorbeeld hiervan kom uit Liberië.
Na heelwat biddende oorweging het ’n Christen- ouere man en sy vrou hulle snyerswinkel toegemaak. Waarom? Omdat dit te veel van hulle tyd in beslag geneem en op hulle bediening en persoonlike studie inbreuk gemaak het. Hulle het besluit om tevrede te wees met die beskeie inkomste wat hulle uit die verkoop van materiaalkleurstowwe sou kry. Maar onmiddellik nadat hulle hierdie stap gedoen het, het kleurstofpryse op die plaaslike mark skerp gedaal. Hulle inkomste sou nou nie die gesin onderhou nie. Wat moes hulle doen?
Hulle het die leweransier van die kleurstof gevra om sy prys te verlaag sodat hulle ’n groter winsgrens sou hê. Die versoek is geweier. Die leweransiersfirma het egter aangebied om twee fakture te stuur, een met die werklike prys daarop en die ander met ’n laer prys wat hulle vir die doeane kon wys sodat hulle minder invoerbelasting sou hoef te betaal. Dit sou die ouere man ’n onwettige profyt van R5 200 op elke besending besorg.
Die broer het geweier om iets te doen wat oneerlik is en die regering sou beroof. Die bestuur van die firma was verbaas. Hulle het geskryf: “Ons respekteer jou gewete”, en het die ouere man as die alleenagent vir hulle produk in Liberië aangestel. Omdat hy op dié manier in die stoflike behoeftes van sy gesin kan voorsien, kan die ouere man en sy vrou nou as hulppioniers dien terwyl hulle ten nouste met die broers saamwerk om die gemeente op te bou. Hulle eerlikheid was voorwaar vir hulle ’n seën.
Alfonso, in Spanje, het ook gevind dat eerlikheid die langste duur. Hierdie knaap het die huis verlaat toe hy 12 was, en eerlank het hy dwelms verkoop sowel as by motors, huise en winkels ingebreek om te steel. Partymaal het hy tot tien winkels per dag beroof. Toe hy 21 was, het vier van sy maats hom kwaai geslaan, sy hele voorraad dwelms gesteel en gedreig om hom dood te maak as hy hulle by die polisie aangee. Omdat hy goed bekend was by die polisie, was hy selfs bang om hospitaal toe te gaan vir behandeling.
Terwyl Alfonso stadig van sy wonde herstel het, het hy ernstig nagedink oor sy lewenswyse. Hy het dinge onthou wat sy ma hom oor die Bybel en Christelike beginsels vertel het toe hy nog ’n kind was. Destyds het hy haar woorde geïgnoreer, maar nou het hy ’n Bybelstudie saam met Jehovah se Getuies aangevra. Binne ses maande het hy sy gedrag en persoonlikheid totaal verander en aan die vereistes voldoen om gedoop te word.
Op die dag voor sy doop het hy egter ’n dagvaarding gekry om in die hof te verskyn op aanklag van gewapende roof. Dit was ’n misdaad wat hy geruime tyd tevore gepleeg het. Alfonso het nietemin die misdaad openlik erken en is as verhoorafwagtende aangehou. Sy advokaat het hom aangespoor om te sê dat hy niks gesteel het nie en dat hy nie ’n vuurwapen gedra het nie. Maar Alfonso het daarop aangedring om die waarheid te praat. Weens die aard van die oortreding en omdat hy baie vorige veroordelings gehad het, het die aanklaer ’n vonnis van 13 jaar geëis. Maar danksy sy goeie gedrag en eerlikheid het hy ses maande gekry, wat hy reeds uitgedien het terwyl hy ’n verhoorafwagtende was.
Vandag dien Alfonso en sy vrou Jehovah getrou. Hulle is bly dat hulle ’n ware doel in die lewe gevind het en dat hulle deur hulle eie ondervinding bewys het dat eerlikheid die langste duur.