Wêreld-vrede—Wat sal dit werklik beteken?

DIE wêreldvrede wat God in gedagte het, sal veel meer behels as ’n wêreldwye skietstaking of ’n kernskaakmat. Dit is duidelik uit die manier waarop die Bybel die woord “vrede” gebruik.

In die Hebreeuse Skrifte (die “Ou Testament”) is die woord vir vrede byvoorbeeld sja·loomʹ. ’n Vorm van hierdie woord word in Genesis 37:14 gebruik, waar die aartsvader Jakob vir sy seun Josef sê: “Gaan tog verneem na die welstand van jou broers en die welstand van die vee, en bring vir my berig terug.”a Sja·loomʹ word weer in Genesis 41:16 (NW) gebruik waar dit as “welsyn” vertaal word.

In Bybelse sin behels ware vrede dus nie bloot ’n staking van vyandigheid nie, maar ook gesondheid, veiligheid en welsyn. Ons vorige nommer het getoon dat mense nie weet hoe die legkaart om vrede tot stand te bring inmekaarpas nie. Slegs Jesus Christus, die “Vredevors”, sal die legkaart se stukke inmekaar kan pas en ware vrede op die aarde bewerkstellig (Jesaja 9:5, 6). Kyk byvoorbeeld wat die Bybel in Psalm 72:7, 8 oor sy heerskappy voorspel: “In sy dae sal die regverdige bloei en volheid van vrede, totdat die maan nie meer is nie. En hy sal heers van see tot see en van die Rivier tot by die eindes van die aarde.” Stel jou voor—gesondheid, veiligheid en welsyn, en dit wêreldwyd! Geen politieke verdrag kan dit ooit regkry nie. Net God se Koninkryk kan, en dit sal nog meer tot stand bring. Die Bybel gee ons ’n paar opwindende profetiese voorskoue van hierdie toekomstige wêreldvrede. Kom ons beskou ’n paar.

Wêreldwye ontwapening—op God se manier!

Psalm 46:9, 10 sê: “Kom, aanskou die dade van die HERE, wat verskriklike dinge oor die aarde bring, wat die oorloë laat ophou tot by die einde van die aarde, die boog verbreek en die spies stukkend slaan, die strydwaens met vuur verbrand.” Die woorde “boog”, “spies” en ‘strydwa’ is simbole van enige soort oorlogswapen of oorlogsmasjinerie. Jehovah gaan dus baie verder as wapenbeperkings of selfs algehele ontwapening. Hy elimineer kernwapens, kanonne, tenks, missiellanseerders, granate, plastiekplofstowwe, gewere, handgewere—enigiets wat wêreldvrede kan bedreig—geheel en al!

Maar wapens op sigself veroorsaak nie oorlog nie. Oorlog spruit gewoonlik voort uit die haatdraende, hebsugtige of gewelddadige geaardheid van onvolmaakte mense. (Vergelyk Jakobus 4:1-3.) God se Koninkryk sal dus werk maak van hierdie grondoorsaak van oorlog deur sulke ongewenste eienskappe in mense uit die weg te ruim. Hoe? Deur middel van ’n wêreldwye opvoedkundige program. “Die aarde sal vol wees van die kennis van die HERE soos die waters die seebodem oordek.”—Jesaja 11:9.

Omdat die mensdom so “deur God geleer” is, sal hulle rasseverskille nie meer as ’n grondslag vir konflik, vyandigheid of minagting beskou nie (Johannes 6:45). “God is nie partydig” nie, en die bewoners van die aarde sal sy onpartydigheid weerspieël (Handelinge 10:34, NW). Die Koninkryk sal ook enige moontlikheid van nasionale konflik uit die weg ruim deur landsgrense te vernietig. ‘Van see tot see en tot by die eindes van die aarde’ sal almal gewillige en dankbare trou aan Christus se heerskappy sweer.—Psalm 72:8.

Om te verseker dat sulke vrede blywend is, sal die Koninkryk ook die verdelendste krag in die mensegeskiedenis elimineer: valse godsdiens (Sefanja 2:11). Die mensdom sal verenig wees in die aanbidding van die enigste ware God (Jesaja 2:2, 3). Daar sal ’n wêreldwye broederskap wees!

Vrede op die tuisfront

Watter waarde sou wêreldvrede egter hê as privaat huise ’n gevegsgebied was waar beledigings, kwetsende woorde en dreigemente voortdurend rondgeslinger word? Vandag is dit die situasie in baie gesinne. Ander gesinne verberg diepgewortelde vyandigheid agter ’n masker van kille stilswye.

Ware vrede moet derhalwe kalmte in die huis insluit. Onder die Koninkryk se opvoedkundige program sal mans en vroue geleer word om mekaar met liefde en respek te behandel (Kolossense 3:18, 19). Kinders sal geleer word om ‘hulle ouers in alles gehoorsaam te wees’ (Kolossense 3:20). Daar sal geen opstandige tieners wees wat hulle ouers sal frustreer en bekommerd maak nie. Gehoorsaamheid sal aan die orde van die dag en samewerking die reël wees. Kinders sal ’n aangename gesig en vreugdevolle metgeselle wees.

Vandag word spanning in die gesin grootliks vererger deur ekonomiese druk, aangesien ouers dikwels verplig is om swaar werklaste te aanvaar. Maar onder Christus se heerskappy sal gesinne bevry word van neerdrukkende finansiële laste—opgedrewe huurgeld, hoë verbandpaaiemente, belasting wat die hoogte inskiet, werkloosheid. Sinvolle, besielende werk sal volop wees. En niemand sal dakloos hoef te wees nie. Let op hoe die profesie in Jesaja 65:21-23 hierdie feite beklemtoon: “En hulle sal huise bou en bewoon . . . hulle sal nie bou dat ’n ander dit bewoon nie; hulle sal nie plant dat ’n ander dit eet nie; . . . my uitverkorenes sal die werk van hulle hande self geniet. Hulle sal hul nie tevergeefs vermoei of baar vir skielike ondergang nie; want hulle is ’n geslag van die wat deur die HERE geseën is, en hulle nakomelinge is by hulle.”

Stel jou voor dat jy in ’n omgewing woon waar jy nie omring word deur die tonele, geluide en reuke van stedelike verval nie! Stel jou voor dat jy in ’n groen omgewing woon—jou grond—wat volmaak bewerk, uitgelê en versorg is. Stel jou voor dat jy lug inasem wat verfrissend skoon en suiwer is; dat jy nie die skel wanklanke van die hedendaagse samelewing nie, maar strelende, natuurlike klanke hoor. Dit is waar dat sommige bevoorregtes hierdie dinge reeds in sekere mate geniet. Maar onder God se Koninkryk sal álmal vreedsame lewensomstandighede geniet. Daar sal geen armes, geen hongerlyers, geen minder bevoorregtes wees nie.—Psalm 72:13, 14, 16.

Die Bybel belowe verder dat ‘die goddelose uitgeroei sal word’ (Spreuke 2:22). Dit beteken dat misdaad uit die weg geruim sal word. As jou jongste kind buite gaan speel, sal jy jou nie hoef te bekommer oor kindermolesteerders of ontvoerders wat in die skaduwees skuil, dronk bestuurders wat beheer oor hulle motors verloor of swerwende bendes dwelmdol jongmense nie. Jou kinders sal in algehele veiligheid en sekuriteit kan speel.

Vrede en jou persoonlike welsyn

Ten slotte is daar die aspek van persoonlike welsyn. Selfs paradystoestande verdoof nie die pyn van kanker of artritis nie. Ware vrede moet dus die uitwissing van kwale, siekte en die dood insluit. Is so iets moontlik? Terwyl Jesus Christus op die aarde was, het hy herhaaldelik sy mag oor mensesiektes gedemonstreer (Mattheüs 8:14-17). Christus sal vanuit sy hemelse posisie wonderwerke oor die hele wêreld kan doen! “Dan”, belowe die Bybel, “sal die oë van die blindes geopen en die ore van die dowes ontsluit word. Dan sal die lamme spring soos ’n takbok, en die tong van die stomme sal jubel.”—Jesaja 33:24; 35:5, 6.

Christus se veldtog teen mense-ellende sal egter nie daar ophou nie. Die apostel Paulus verduidelik die volgende aangaande Christus se koningskap: “Want Hy moet as koning heers totdat Hy al sy vyande onder sy voete gestel het. Die laaste vyand wat vernietig word, is die dood” (1 Korinthiërs 15:25, 26). Dit beteken dat al die verwoesting wat die dood van die begin af onder die mensdom aangerig het ongedaan gemaak sal word. Soos Jesus Christus self verduidelik het: “Daar kom ’n uur wanneer almal wat in die grafte is, [Christus se] stem sal hoor en sal uitgaan” (Johannes 5:28, 29). Tallose miljoene wat in ellende geleef en gesterf het, sal dus die geleentheid hê om ook die komende wêreldvrede te geniet.

Sal jy dit ook geniet? Jehovah se Getuies spoor jou aan om meer te leer oor wat die Bybel in hierdie verband sê.b Die vooruitsig op wêreldvrede is te opwindend, te werklik, om geïgnoreer te word. Wees verseker dat as jy jou inspan om God se Woord te leer en toe te pas ‘die God van vrede met jou sal wees’—vir ewig!—Filippense 4:9.

[Voetnote]

[Prent op bladsy 5]

Jehovah sal oorloë laat ophou “tot by die einde van die aarde”

[Erkenning]

USAF Official Photo

[Prent op bladsy 6]

Mans en vroue sal geleer word om mekaar vredeliewend te behandel