Binnekort—’n wêreld sonder pyn!
’NWÊRELD sonder pyn ophande? Watter welkome nuus sal dit tog wees vir chroniese lyers—of hulle nou liggaamlike, verstandelike of emosionele pyn verduur! Miljoene sal byvoorbeeld baie bly wees as die intense liggaamlike pyn wat veroorsaak word deur sekere kankersoorte, drietaksenupyn en die hartkwaal angina pectoris weggeneem word. Diegene wat ernstige verstandelike probleme ondervind, sal dit verwelkom as hulle dikwels onbeskryflike lyding beëindig word. En miljoene ander sal verheug wees as hulle emosionele pyn weens gevoelens soos vrees, hartseer, skuld, kommer en frustrasie net sou ophou. Maar wil ons werklik hê dat alle pyn beëindig moet word?
“Dit is ’n ramp as ’n mens geen pyn kan voel nie”, sê anatoom Allan Basbaum van die Universiteit van Kalifornië in San Francisco. Hy het hierdie stelling tereg gemaak. Liggaamlike pyn is ’n boodskap wat ons waarsku dat iets skadeliks besig is om te gebeur.
Die onvermoë om liggaamlike pyn te voel kan werklik rampspoedig wees. Dit word getoon deur hierdie verslag in die tydskrif Time: “Die twaalfjarige seun se aangename glimlag staan in pynlike kontras met sy andersins jammerlike uiterlike. Sy arms en bene is gebreklik en skeef, asof hy aan ragitis gely het. Heelparty van sy vingers ontbreek. Hy het ’n groot, oop wond op sy een knie, en die glimlaggende lippe is stukkend gebyt. Hy lyk kompleet soos ’n mishandelde kind . . . Hy is met ’n uiters seldsame genetiese gebrek gebore wat hom ongevoelig maak vir pyn. Sy vingers is òf vergruis òf verbrand omdat hy nie sy hande van warm of gevaarlike goed weggeneem het nie. Sy bene en gewrigte is misvorm omdat hy hulle te hard gestamp het toe hy geloop of gehardloop het. Sy knieë het gesweer omdat hy oor skerp voorwerpe gekruip het wat hy nie kon voel nie. As hy ’n been breek of sy heup uit lit ruk, sal hy nie genoeg voel om om hulp te roep nie.”
Sommige mense is gou om God verantwoordelik te hou vir sulke beproewinge en die ellende wat miljoene ondervind. Maar kan ons God met reg vir die mensdom se lyding beskuldig?
Is dit God se skuld?
Die mensdom verkeer nou reeds sowat 6 000 jaar lank in slawerny aan liggaamlike, verstandelike en emosionele pyn. Trouens, die Christenapostel Paulus het, sowat 19 eeue gelede, tereg gesê: ‘Die hele skepping sug tesame en is tesame in barensnood tot nou toe’ (Romeine 8:22). Ten spyte van al die pynstillers wat by apteke verkrygbaar is en die pogings van geneeskundiges en psigiaters, kom slawerny aan allerhande vorme van pyn steeds algemeen voor. Sommige het God selfs vanweë hulle lyding vervloek, net soos Job se vrou hom baie eeue gelede aangeraai het! Maar soos hy self besef het, is so ’n gesindheid dwaas en verkeerd.—Job 2:9, 10.
Die mens se hedendaagse slawerny aan pyn kan nie met reg aan God toegeskryf word nie. Dit is eerder ’n onsigbare leuenaar en ons eerste ouers wat die skuld dra. Waarom?
Die Skrif toon dat ’n geesskepsel na mag en vernaamheid begin hunker het, al was hy voorheen regverdig. Aan die begin van menselewe op aarde het hy hom ’n menseras op ’n paradysaarde voorgestel wat almal ten volle aan die almagtige God, Jehovah, toegewy is. Hierdie geesskepsel se hart het boos geword en hom aangedryf om teen die Skepper in opstand te kom, en hy wou hê dat mense hom aanbid en hulle aan hom toewy. Sy bose planne is geopenbaar toe hy listig ’n leuen vertel het. Sodoende het sonde in die wêreld gekom.
Jehovah God het aan die eerste man, Adam, gesê dat dit tot die dood sou lei as hy van die boom van die kennis van goed en kwaad sou eet (Genesis 2:15-17). Maar Adam se vrou, Eva, is oorreed om ongehoorsaam te wees. Die geestelike bedrieër het die slang as spreekbuis gebruik en vir haar gesê: “Julle sal gewis nie sterwe nie; maar God weet dat as julle daarvan eet, julle oë [Eva en haar man s’n] sal oopgaan, sodat julle soos God sal wees deur goed en kwaad te ken” (Genesis 3:1-5). Dit was die eerste leuen en het hierdie goddelose geesskepsel as ‘die vader van leuens’ gebrandmerk (Johannes 8:44). Die feit dat hy die slang by daardie geleentheid in die tuin van Eden gebruik het, kom ooreen met sy skriftuurlike identifikasie as “die ou slang wat genoem word duiwel en Satan”.—Openbaring 12:9.
Sonde het gesug en slawerny aan pyn oor die mensdom gebring. God het sy woord gestand gedoen, en op daardie selfde dag dat Adam gesondig het, het God die doodvonnis oor die oortreders uitgespreek. Geregtelik, uit Jehovah se oogpunt, het Adam en Eva daardie dag gesterf. (Vergelyk Lukas 20:37, 38.) In Eden het Jehovah vir die eerste vrou wat toe sondig was, gesê: “Ek sal grootliks vermeerder jou moeite en jou swangerskap; met smart sal jy kinders baar” (Genesis 3:16). Adam sou hard moes werk om ’n pynlike bestaan te maak buite die tuin van Eden op ’n aarde wat beslis nie paradysagtig was nie. Jehovah het gesê: “In die sweet van jou aangesig sal jy brood eet totdat jy terugkeer na die aarde, want daaruit is jy geneem. Want stof is jy, en tot stof sal jy terugkeer” (Genesis 3:17-19). So het die menseras se slawerny aan pyn begin.
Slawerny aan pyn hou dus verband met onvolmaaktheid, sonde en die dood wat ons van Adam geërf het. Soos die apostel Paulus die saak stel: “Soos deur een mens die sonde in die wêreld ingekom het en deur die sonde die dood, en so die dood tot alle mense deurgedring het, omdat almal gesondig het” (Romeine 5:12). Maar God se Woord help ons om pyn te verdra, want dit vertel ons waarom Jehovah dit toelaat en gee ons die versekering dat dit binnekort sal eindig. God het die slangagtige ‘vader van leuens’, Satan die Duiwel, toegelaat om regverdige Job te teister en sodoende sy onkreukbaarheid op die proef te stel. Die Duiwel het beweer dat Job God uit selfsug gedien het, nie uit liefde nie (Job 1:8-12). Maar Job het getrou gebly aan God, en bewys dat onvolmaakte mense Hom uit liefde kan dien en Sy soewereiniteit ondanks kwaai toetse van hulle geloof getrou kan verdedig. Job se volharding as ’n handhawer van onkreukbaarheid het bygedra tot die heiliging van Jehovah se naam, het bewys dat Satan ’n leuenaar is en het baie seëninge vir daardie voorbeeldige aartsvader meegebring (Job 42:12-17; Jakobus 5:11). Ons kan uit Job se ondervinding aflei dat die mensdom se slawerny aan pyn sal eindig wanneer God se doel bereik is. Maar hoe kan ons seker wees daarvan?
Hoe pyn sal eindig
Jehovah het in werklikheid ’n heeltemal doeltreffende wyse voorsien om die mensdom se slawerny aan pyn te beëindig. Hy het dit gedoen op grond van die losprysoffer van sy Seun, Jesus Christus. Jesus is “die Lam van God wat die sonde van die wêreld wegneem” (Johannes 1:29). Hy het na die aarde gekom nie “om gedien te word nie, maar om te dien en sy lewe te gee as ’n losprys vir baie” (Mattheüs 20:28). Deur ongehoorsaamheid het Adam volmaakte menselewe, en al die regte en vooruitsigte daarvan, verloor. En dit is presies wat deur Jesus se losprysoffer teruggekoop word (1 Timotheüs 2:5, 6; Hebreërs 7:26). Ja, “so lief het God die [mense]wêreld gehad, dat Hy sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê”.—Johannes 3:16.
God het ook uitdruklik belowe dat die slawerny aan pyn sal eindig. Die Christenapostel Johannes het ’n tyd voorspel wanneer pyn wat met sonde gepaard gaan, sal verdwyn, en het onder goddelike inspirasie geskryf:
“Ek het ’n nuwe hemel en ’n nuwe aarde gesien, want die eerste hemel en die eerste aarde het verbygegaan; en die see was daar nie meer nie. . . . Ek het ’n groot stem uit die hemel hoor sê: Kyk, die tabernakel van God is by die mense, en Hy sal by hulle woon, en hulle sal sy volk wees; en God self sal by hulle wees as hulle God. En God sal al die trane van hulle oë afvee, en daar sal geen dood meer wees nie; ook droefheid en geween en moeite sal daar nie meer wees nie, want die eerste dinge het verbygegaan. En Hy wat op die troon sit [Jehovah God], het aan my gesê: Kyk, Ek maak alles nuut. En Hy het aan my gesê: Skryf, want hierdie woorde is waaragtig en betroubaar.”—Openbaring 21:1-5.
Gehoorsame mense sal binnekort ten volle baat vind by Jesus se losprysoffer. Dit sal plaasvind onder die Koninkryksheerskappy waarvoor die opregtes lankal bid wanneer hulle sê: “Onse Vader wat in die hemele is, laat u Naam geheilig word; laat u koninkryk kom; laat u wil geskied, soos in die hemel net so ook op die aarde” (Mattheüs 6:9, 10). Jesus Christus sal in die hemelse Koninkryk regeer totdat hy al sy vyande onder sy voete gestel het, onder meer slawerny aan pyn en die laaste vyand, die dood.—1 Korinthiërs 15:25, 26.
Ja, sover dit gehoorsame mense aangaan, sal God binnekort ‘alle trane afvee, en daar sal geen dood, droefheid, geween of moeite meer wees nie’ (Openbaring 21:4). Die volgende profetiese woorde wat nou ’n geestelike toepassing het, sal dan ook ’n letterlike vervulling hê: “Loof die HERE, o my siel, . . . Wat al jou ongeregtigheid vergewe, wat al jou krankhede genees.” “Geen inwoner sal sê: Ek is siek nie.”—Psalm 103:1-3; Jesaja 33:24.
Wanneer ’n einde aan pyn?
Die einde van slawerny aan pyn is ophande. Ja, dit sal in ons dag gebeur, en hierdie selfde geslag sal dit aanskou. Die vervulling van Bybelprofesie toon dat ons in die tyd van die einde van hierdie goddelose stelsel van dinge lewe. Die ongeëwenaarde oorloë, hongersnode en aardbewings, sowel as die aardwye verkondiging van die goeie nuus deur Jehovah se Getuies, is deel van ’n saamgestelde “teken” van Jesus se onsigbare “teenwoordigheid” in hemelse Koninkryksheerlikheid.—Mattheüs 24:3-14, 21, 34, NW.
“Die eerste hemel en die eerste aarde”, Satan die Duiwel se georganiseerde stelsel van dinge met sy regeringstruktuur, sal binnekort verbygaan. Die onstuimige “see” van goddelose mense sal ophou bestaan. Ons staan dus aan die begin van ’n goddelik geseënde goewermentele “nuwe hemele” oor “’n nuwe aarde”, ’n regverdige mensegemeenskap. Hierin sal “geregtigheid woon”.—Openbaring 21:1; 2 Petrus 3:13.
Met sulke seëninge onder ’n nuwe regering—God se Koninkryk—wat spoedig verwesenlik gaan word, kan jy moed skep. Probeer nog kennis opdoen van die nuwe wêreld sonder pyn en die dood. Jy kan inderdaad uitsien na die geseënde dag wat nou so naby is wanneer almal wat Jehovah liefhet en aan hom gehoorsaam is in ’n wêreld sonder pyn sal lewe.