Insig in die nuus
Die deur na ’n vorige lewe?
’n Paar maande gelede is drie laerskool- en junior hoërskoolmeisies gevind waar hulle weens ’n selfmoordpoging bewusteloos op ’n pad in Tokoesjima, Japan, gelê het. Wat het hulle dit laat doen? Die Asaji Sjimboen het berig: “Hulle het geglo dat hulle reïnkarnasies van prinsesse uit die ou tyd is en het hulleself oortuig dat hulle ’n kykie op hul vorige lewe sou kon kry as hulle na aan die dood kom.” Die koerant sê dat hierdie voorval toegeskryf kan word aan “die neiging onder kinders om hulle in ’n okkultiese wêreld te onttrek, [’n neiging wat] in die afgelope paar jaar heelwat toegeneem het”. Die meisies was geesdriftige lesers van strokiesverhale met reïnkarnasie as tema.
Maar om die gedagte van reïnkarnasie te aanvaar is net so nutteloos as om na ’n lugspieëling in die woestyn te strompel. Die Bybel toon dat die mens, wanneer hy sterf, ‘terugkeer na sy aarde toe; op daardie dag is dit met sy planne gedaan’ (Psalm 146:4). Die waarheid oor die dood is verberg deur die bedrieglike leerstelling dat ’n siel na ’n mens se dood voortleef. Die Bybel sê daarenteen dat die siel sterf en nie dat mense ’n onsterflike siel het nie (Esegiël 18:4). Maar vir diegene in God se geheue is daar die wonderlike hoop op ’n opstanding (Johannes 5:28, 29). Die Bybel stel ook die vernaamste aanstigter van die leerstellings oor die onsterflike siel en reïnkarnasie aan die kaak; hy is Satan die Duiwel, “die vader van die leuen”.—Johannes 8:44, NW; vergelyk Genesis 3:4.
Katolieke en aborsie
Amper ’n dekade het verloop sedert die referendum oor aborsie in Italië waarin die Katolieke Kerk verslaan is. Maar die Katolieke hiërargie wys in ’n dokument wat onlangs deur Italiaanse biskoppe uitgereik is weer daarop dat “die weiering om aborsie te beoefen of selfs om bloot daarmee te help ’n ernstige morele verpligting is, wat gewortel is in die wet wat op die hart van elke mens geskrywe staan en bevestig word deur die kerk in sy wetgewing, waarvolgens Christene wat aborsie beoefen en daarmee help met ekskommunikasie gestraf word”.
Wat dink Italianers van aborsie? ’n Onlangse opname wat onder 2 040 mense gedoen is, het getoon dat Italianers, strydig met die kerkwette, aborsie in vier situasies goedkeur. (1) As ’n swangerskap die moeder se lewe in gevaar stel, is 83 persent ten gunste van aborsie. (2) Wanneer die gevaar bestaan dat die fetus misvorm is, is 76,3 persent ten gunste daarvan dat die swangerskap beëindig word. (3) Wanneer dit gevaar inhou vir die vrou se gesondheid is 71,1 persent ten gunste van aborsie. (4) As ’n swangerskap die gevolg is van verkragting stem 55,2 persent saam dat aborsie toelaatbaar behoort te wees. Meer as 1 uit elke 4 Italianers is ten gunste van aborsie “in alle gevalle wanneer ’n vrou dit wil hê”, berig La Repubblica. Nagenoeg 300 000 wettige en onwettige aborsies word elke jaar in Italië gedoen.
Dit is duidelik dat die Katolieke hiërargie in sulke intieme sake nie die gelowiges genoegsame skriftuurlike onderrigting kon gee om hulle gehoorsaam te laat wees nie. Maar ware Christene word geleer wat die Skrif oor hierdie lewensbelangrike onderwerp sê. Uit respek vir die Bybel se hoë sedelike standaarde beoefen hulle nie aborsies in een van die bogenoemde vier situasies nie.—Exodus 21:22-25; sien ook Psalm 139:14-17; Jeremia 1:5.